Iléèṣẹ́ ọlọ́pàá mú ọkùnrin ẹni ọdún 55 tó gé ẹ̀yà ara èèyàn nílẹ̀ ìsìnkú ṣọ́ọ̀ṣì l'Ogun

Awọn ọlọpaa nipinlẹ Ogun ti mu ọkunrin ẹni ọdun marundinlọgọta kan, Yesiru Salisu, ti wọn ba ẹya ara eeyan lọwọ rẹ ni Ijebu-Igbo.

Iroyin sọ pe wọn ba agbari eeyan mẹrin, ọwọ meji, ati àgbọn mẹta lọwọ ri.

Afurasi naa, ni wọn sọ pe ilẹ isinku Kristiẹni kan to wa ni adugbo Oke-Eri, nilu Ijebu-Igbo, lo ti ge awọn ẹya ara naa lọjọ Aje, pẹlu iranlọwọ ẹnikan, Lekan Bakare, to ti salọ bayii.

Gẹgẹ bi iwe iroyin abẹle, The Punch, ṣe sọ, ọwọ tẹ Salisu, lẹyin ti awọn araalu fi ẹjọ sun ni agọ ọlọpaa to wa ni Ago-Iwoye.

Alukoro ileeṣẹ ọlọpaa nipinlẹ Ogun, Abimbola Oyeyemi, sọ pe ẹni to lọ fi ẹjọ sun ni oun ri ọkunrin kan to gbe apo dani, ti oun fura si pe ẹru ẹlẹru lo wa ninu rẹ.

Ati pe nigba ti wọn beere ọrọ lọwọ rẹ, o ju apo naa silẹ, o si sa wọ inu igbo lọ.

Eyi lo mu ki awọn ọlọpaa ọtẹlẹmuyẹ lọ si ibẹ, ti wọn si ba awọn ẹya ara eeyan to ti gbẹ ninu apo naa.

"Lẹyin naa ni wọn yẹ inu igbo ti afurasi naa sa wọ daadaa, nibi ti ọwọ ti tẹ ẹ.

"O si jẹwọ pe ilẹ isinku to wa ni Oke-Eri nilu Ijebu-Igbo, ni oun ati ẹnikan ti ge awọn ẹya ara naa."

Nibayii, iwadii ti n lọ lori ọrọ naa.