Ondo Kidnapping: Àgbà oyè sá àsálà fún ẹ̀mí rẹ̀ nígbà tí orun kàyéfì gbé àwọn ajínigbé tó mu nígbèkùn

Kayefi gbaa ni isẹlẹ kan to waye nipinlẹ Ondo eyi to n se ọpọ eeyan ni haa-hii.

Oloye agba kan ni ilu Igaṣi Akoko ni ipinlẹ Ondo, Ojo Ajagunna ti awọn kan ji gbe lọjọ Ẹti, la gbọ pe o ti fi ẹsẹ ara rẹ rin wọle laisi ọrọ a n san owo itanran kankan.

Agba oye Ajagunna ṣalaye fun awọn eeyan rẹ pe oun lanfani lati sa kuro ni ibuba awọn ajinigbe naa lẹyin ti wọn sun lọ rangbọndan.

O ni oun ko lee sọ boya ogun abẹnugọngọ lo ja wọn tabi asasi.

Gẹgẹ bi iroyin ti a gbọ, pupọ awọn eeyan ilu naa ni wọn banujẹ lasiko ti iṣẹlẹ buruku naa ṣẹlẹ si oloye Ajagunna.

Bi okiki ijinigbe rẹ ṣe rinlẹ to ni ilu naa, ni okiki itusilẹ rẹ naa tun ṣe gbalẹkan gẹgẹ bi a ṣe gbọ

Ki ni ọlọpaa sọ?

Gẹgẹ bi ohun ti ileeṣẹ ọlọpaa nipinlẹ Ondo sọ, iyawo oloye naa lo kọkọ lọ fi iroyin ijinigbe rẹ to awọn ọlọpaa leti ni agọ ọlọpaa to wa ni ilu naa.

Nibi ti awọn ọlọpaa ti n ṣeto iwadii wọn lọwọ, ni iroyin miran tun kan wọn lara pe Oloye Ajagunna ti pada sile rẹ.

Alukoro ọlọpaa ni ipinlẹ Ondo, Arabinrin Funmilayọ Ọdunlami ṣalaye fun BBC Yoruba pe ohun ti oloye naa sọ fun awọn ni pe, fọnfọn ti awọn to ji oun gbe sun, lo mu ki oun yara sa asala fun ẹmi oun kuro ni akata wọn.

Ṣugbọn ohun to fa orun asunmaparada wọn naa, ṣi jẹ eyi ti ẹnikẹni ko tii lee ṣe alaye rẹ.