EndSARS aftermath: Iléeṣẹ́ kò ní gba ẹnikẹ́ni láàyè láti ṣe ìfẹ̀hónúhàn kankan mọ́ ní ìpínlẹ̀ Eko

Ileeṣẹ ọlọpaa ipinlẹ Eko ti ṣeleri pe ohun ko ni faye gba iwọde tabi ifẹhonuhan kan mọ kaakiri ipinlẹ naa.

Ikilọ yii jade lẹyin ti ileeṣẹ ọlọpaa ni awọn kan n gbero lati ṣe iwọde miran ki wọn le fi ẹhonu wọn han daadaa lori iwa ifiyajẹni awọn ọlọpaa, eto aabo to mẹhẹ ati iṣejọba ti ko rọ araalu lọrun.

Ileeṣẹ ọlọpaa ni idi ti ohun ko fi ni faye gba iwọde mii ni pe ipinlẹ Eko ko tii bọ ninu ofo ko laarọ to tẹle iwọde EndSARS to lọ.

Ninu atẹjade ti alukoro ileeṣẹ ọlọpaa Eko, Olumuyiwa Adejobi fi sita ileeṣẹ ọlọpaa ni wọn ti fi to awọn leti pe awọn kan tun fẹ da rogbodiyan lati tẹsiwaju aawọ to ṣẹlẹ lasiko iwọde EndSARS.

''Idi eyi lo jẹ ki ileeṣẹ ọlọpaa maa kilọ fun ẹnikẹni tabi ẹgbẹ kẹgbẹ kan to ba n gbero lati ṣe iwọde yala ifẹhonuhan wọọrọwọ tabi lile pe ileeṣẹ ọlọpaa atawọn eṣọ aabo mii ko ni gba fun wọn,'' Adejobi lo sọ bẹẹ.

O ni ẹnikẹni to gbimọ lati da alaafia ilu ru lasiko yii ti ipinlẹ ifẹhonuhan EndSARS ṣẹṣẹ lọọlẹ tan yoo jẹ iyan rẹ ni iṣu.

Bakan naa ni ileeṣẹ ọlọpaa kilọ fawọn obi ninu atẹjade naa lati kilọ fawọn ọmọ wọn pe ki wọn maa jẹ ki ẹnikẹni lo awọn ọmọ wọn fun ifẹhonuhan kankan nitori awọn janduku ni yoo ja iru iwọde bẹẹ gba.

Ileeṣẹ ọlọpaa tun rọ gbogbo olugbe ipinlẹ Eko lati kọ eti ikun si ẹnikẹni to ba pe wọn si ibi iwọde kankan.