Озарбайжонлик мухолифатчи Францияда пичоқлаб кетилди – у Илҳом Алиевнинг хорижда ўлдирилган биринчи танқидчиси эмас
Сурат манбаси, Magara Media
Озарбайжонлик сиёсий муҳожир Видади Искандерли ўтган ҳафта Франциядаги уйида пичоқлаб кетилди - номаълум шахслар унга 20 мартадан кўпроқ пичоқ урган.
29 сентябрь куни уч номаълум шахс Видади Искандерлининг Франция шарқида жойлашган Мюлуз шаҳридаги уйига бостириб кирган.
Сиёсий муҳожирнинг акаси Огтай Искандерлининг сўзларига кўра, босқинчилар жигар ва ўпка дохил марҳум танасининг 20 дан ортиқ ерига пичоқ билан зарба берган.
Видади Искандерли 1 октябрь куни шифохонада ҳаётдан кўз юмган.
Маълум қилинишича, француз полицияси айни вақтда тергов-суриштирув ҳаракатларини олиб бормоқда.
Би-би-си полицияга баъзи саволлар билан мурожаат қилган ва жавоб кутмоқда.
Марҳум ким эди?
Видади Искандерли Озарбайжон президенти Илҳом Алиевни танқид қилиб келиши ортидан танилган.
Озарбайжонда у "Демократия ҳимоясига кўмаклашиш" нодавлат ташкилотини бошқарган.
2011 йилда у 2010 йилги парламент сайлови доирасидаги овоз бериш жараёнига аралашишда айбланиб, уч йилга озодликдан маҳрум этилган.
Айни парламент сайловида Искандерлининг ўзи ҳам депутатликка номзодини илгари сурган эди.
Мухолифатчи афв этилишидан кўп ўтмай - 2012 йилда Грузияга, сўнг эса Францияга қочиб ўтган.
"Легитим нишонлар"
Озарбайжон парламенти депутати Заҳид Оруж яқинда президент Алиевнинг танқидчиларини "легитим нишонлардек йўқ қилиш" зарурлигини таъкидлаган эди.
Миллий Межлис депутати ўзининг бу таъкидини "давлат раҳбарининг шаъни ва обрўсини муҳофаза қилишга қаратилган қонунчилик ишламаётган"и билан изоҳлаган.
Ҳукуматпарастлиги билан танилган Оружнинг сўзлари жамоат фаоллари ва мухолифатдаги сиёсатчиларни чиндан ташвишга солган.
Улар депутат шунчаки ўз қарашини эмас, балки Алиев режимининг истак-мақсадини очиқлаётган бўлиши мумкинлигидан хавотир билдиришган.
Илҳом Алиевнинг бошқарув йилларида кўплаб мухолифатчилар, жамоатчи фаоллар, ҳуқуқбонлар ва журналистлар Озарбайжонни тарк этган.
Аммо улар хорижда ҳам ҳаловат топа олмаган.
Айримлари номаълум ва шубҳали вазиятларда жон таслим этган, баъзиларига нисбатан суиқасд уюштирилган.
Масалан, 2021 йилда хорижда яшаётган икки озарбайжонлик фаолнинг жасади орада тўрт ойлик фарқ билан сувдан топилган эди - Вугар Рзу Бельгияда ва Байрам Мамедов Туркияда.
Ўша йили мухолифат фаоли Гусейн Бакиханов Тбилисида номаълум озарбайжонликлар ҳужумига учраган. Орадан икки кун ўтиб, Бакихонов Грузия пойтахтидаги меҳмонхона биноси томидан номаълум сабаблар билан тушиб кетиб, жон таслим қилган.
2017 йил майида журналист Афғон Мухторлини Тбилисида ўғирлаб кетиб, мажбуран Озарбайжонга қайтаришган эди.
Бу воқеадан тўрт ой ўтгач, Киевда Озодлик Радиосининг собиқ мухбири Фикрат Гусейнлини ўзини Интерпол ходимлари дея таништирган озарбайжонликлар дўппослаб кетганди.
BBC.COM/UZBEK
Telegramda bog'lanish raqami +44 7858860002
