Лондонда 20 млн долларга бозорлик қилган Замира Ҳожиева ким? Дунё ва O'zbekiston

Британиядаги бойларнинг Harrods дўконида £16 миллион ($20.7 млн) долларга бозорлик қилган Замира Ҳожиева Лондондаги қимматбаҳо уйидан ажралиши мумкин.

Британия тарихида биринчи марта бойликнинг келиб чиқиши шубҳали бўлгани учун ўз эгасидан тортиб олинмоқда.

Замира Ҳожиева (баъзан Ҳажиева, Хаджиева, Гаджиева ёзилмоқда - таҳр.) ўз уйини тортиб олиш ҳақидаги суд қарорига қарши шикоят қилганди.

Бироқ у Апелляцион Маҳкамада ютқазди.

Замира Ҳожиева энди Британиядаги кўп миллионли уйини ва қарийб 20 миллион долларлик гольф майдончасини қонуний йўлда топган пулига сотиб олганини исботлаши керак.

Акс ҳолда Британиядаги молк-мулки тортиб олинади.

Сўнгги маҳкама қарорига кўра, у Британия Олий Судига ҳам мурожаат эта олмайди.

Бойхоним ким?

Замира Ҳожиеванинг эри Озарбайжон давлат банкида ишлаган ва ҳозир қаллоблик учун қамалган.

Рафиқаси ҳали Британияда бирон жиноятда айбланмаган.

Эр-хотин бойликларини ноқонуний йўлда топишганини рад этишади.

Замира Ҳожиева ўз эри Озарбайжондаги ноҳақлик қурбони бўлганини айтмоқда.

Бироқ Британия маҳкамаси унинг давлат банкида ишлаган эри қонуний йўлда бунчалик катта миқдорда бойлик тўплашига ишонмаган.

Кейинги навбатда кимлар турибди?

Мамлакат иқтисодий жиноятлар маркази вакили Сара Притчард озарбайжонлик оила мулкига оид сўнгги қарорни "муҳим натижа" деб атаган.

"Маҳкама қарори келажакдаги шу каби шубҳали йўлда тўпланган бойликларни тафтиш қилишимизда қўл келади" - таъкидлаган у.

Бу дегани - коррупцияга ботган давлатлар бошқарувига алоқадор ёки бойлигини қандай топгани шубҳали бўлган чет элликларнинг мулкларини олиб қўйиш осонлашади.

Яқин орада бундан бошқа яна учта шунга ўхшаш ҳолат кўриб чиқилади.

Мана бу ҳаволада ўқинг:

Собиқ президент қизларининг Британиядаги бойликлари

Британиядаги Spotlight гуруҳи фаолларига кўра, четда ноқонуний йўлда топган шубҳали бойлигини Британияга олиб келиб яширган хорижлик шахсларни текшириш учун янада кўпроқ ишлаш керак.

Халқаро Шаффофлик (Transparency International) ташкилотининг таъкидлашича, Британияда 150 нафардан кўпроқ чет элликнинг 500га яқин қимматбаҳо ва шубҳали пулга олинган мол-мулки аниқланган.

Ўзбекистон марҳум президентининг тўнғич қизи Гулнора Каримова ҳам Британиядаги мулкидан ажралиб қолиши мумкин.

Ҳукуматнинг жиддий фирибгарликка қарши курашувчи ташкилоти Гулнора Каримованинг 2 миллион долларлик қиммат квартирасидан тортиб, токи 40 миллион долларга етадиган саройсимон мулкини ҳам тортиб олмоқчи.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: @bbcuzbek