Янгиликлар: Зеленский ўз сўзини айтди, Россия президенти ҳозирча жим ва Путин хос топшириқ берганми? Rossiya Ukraina Yangiliklar

Самолёт ҳалокати ортидан нималар бўлмоқда - сўнгги тафсилотлар.

Алоқадор мавзулар:

Украина президенти ҳалокат ортидан халқаро текширув ўтказишни талаб қилди.

Володимир Зеленский Москвани "украиналик тутқунлар ҳаётлари билан ўйнашаётганлик"да айблади.

Ил-76 русумидаги ҳарбий-транспорт самолёти кеча, чоршанба куни Россиянинг Украина чегарасига яқин Белгород вилоятида ҳалокатга учраган.

Россия томонига кўра, Киев уриб туширгач, самолёт бортидаги бирор бир инсон тирик қолмаган.

Самолётдаги 65 нафар украиналик уруш асири, россиялик олти экипаж аъзоси ва уч ҳамроҳнинг барчаси ҳалок бўлган.

Москванинг даъво қилишича, украиналик асирлар айирбошлаш мақсадида олиб кетилаётган бўлган.

Украина ҳарбий разведкасининг айтишича эса, бу гал ўзларидан ҳаво ҳудуди хавфсизлигини таъминлаш сўралмаган.

Уларнинг бу каби изоҳи ҳарбий самолётни Украина уриб туширганлигини тан олиш қабилида талқин ҳам қилинган.

Аммо, Украина ҳарбий разведкасига кўра, ўзлари самолёт бортида ким бўлгани ҳақида ишончли маълумотга эга бўлишмаган.

Уларнинг огоҳлантиришича, мазкур ҳодиса "Россиянинг режалаштирилган ва қасддан қилинган ҳаракатлари билан боғлиқ бўлиши мумкин".

Украина президенти самолёт ҳалокатига ўзининг муносабатини чоршанба тунги видеомурожаатида билдирган.

У, "Руслар украиналик асирларнинг ҳаёти, улар қариндошларининг ҳис-туйғулари ва жамиятнинг ҳиссиётлари билан ўйнашаётгани очиқ-ойдин" эканлигини айтган.

Украина президенти самолёт ҳалокати сабаб, ўзининг туғилган куни билан боғлиқ режалаган сафарларини ҳам бекор қилган.

Володимир Зеленский "яққол кўриниб турган фактларнинг барчаси аниқлаштирилиши керак"лигини таъкидлаган.

Россия президентининг матбуот котиби Дмитрий Песков эса, самолётнинг уриб туширилишини "ёвузона амал", дея қоралаган.

Бу ҳақда Россиянинг ахборот агентликлари хабар беришган.

Дмитрий Песков журналистларга гапираркан, агар жаноб Зеленский "Киев режимининг жиноий ҳаракатлари" бўйича халқаро текширув ўтказишни назарда тутган бўлса, бу албатта зарур", - деб айтган.

Ҳарбий-транспорт самолёт ҳалокати ва Украина президентининг талаби борасида Россия президенти шахсан ўзининг муносабати ҳозирча кўзга ташланмайди.

Аммо шу соатларда олинаётган хабарларга кўра, Дмитрий Песков Путиннинг самолёт ҳалокати ортидан бирор бир хос топшириқ бергани ёки йўқлиги масаласига ҳам ойдинлик киритган, у бу хусусда ҳам журналистларнинг саволларига жавоб берган.

Дмитрий Песков Путиннинг бирор бир кўрсатмаси ҳақида гапириш ҳали эрта экани, бу хусусда аввало ҳарбийлар ўз сўзларини айтишлари лозимлигини айтган.

"Қандай кўрсатма берилиши мумкин? Қандай, бир тасаввур қилинг. Нима бўлганини, барибир, энг аввало ҳарбийлар айтиши керак. Буни фақат уларгина айта олишади ва тушунишимча, бу нарса уларнинг ваколатига киради", - дея таъкидлаган Россия президентининг матбуот котиби.

24 январ - ҳалокат тарихчаси

Россиянинг Белгород вилоятида Ил-76 ҳарбий-транспорт самолёти қулаб тушди. Россия Мудофаа вазирлигининг айтишича, бортда асирларни айирбошлаш учун олиб келинаётган 65 нафар Украина ҳарбийси бўлган.

Ундан ташқари учоқда 6 экипаж аъзоси ва яна уч нафар ҳамрох бўлгани айтилмоқда.

Вазирлик авиаҳалокат натижасида омон қолганлар бор ё йўқлигига аниқлик киритмаган.

Олдинроқ телеграм каналлар ва урушни ёқловчи блогерлар Белгород вилояти Корочанск туманида Ил-76 қулаганини айтиб, видео чоп қилганди. Унда самолёт қулаб тушаётгани ва ерга тушиб портлаганини кўриш мумкин эди.

Украина ОАВ Украина Қуролли кучларидаги манбаларига таяниб, "бу уларнинг иши" эканлигини таъкидлашмоқда.

Бу каби иқтибосларни "Украина ҳақиқати" ва "РБК-Украина" нашрлари бермоқда. Манбанинг айтишича, қулаб тушган Ил-76 асирларни эмас, балки С-300 зенит ракета мажмуасини олиб келаётган бўлган.

Кремл Мудофаа вазирлигининг хабарини изоҳлашдан бош тортган.

"Бу ҳали янги хабар. Буни энди аниқлаштирамиз", деган Россия президенти матбуот котиби Дмитрий Песков.

Белгород губернатори ҳарбий самолётнинг қулаши ҳақида гапирмаган.

Олдинроқ у телеграм каналида "Корочанск туманидаги ҳодиса. Воқеа жойида тергов гуруҳи ва Фавқулодда вазиятлар вазирилиги ходимлари ишламоқда. Иш тартибимни ўзгартириб, туманга бордим. Тафсилотлар кейинроқ", деб ёзди.

Россиянинг Тасс хабар агентлиги ҳодиса жойидан суратлар чоп қилди.

Россия Мудофаа вазирлиги Ил-76 ҳарбий -транспорт самолйти Украина Қуролли кучлари томонидан уриб туширилганини маълум қилди.

Вазирликка кўра, самолёт Харков вилоятидан отилган икки зенит ракетасига нишон бўлган.

Учоқ ҳалокатидан сўнг Украина Қуролли кучлари юаёнот билан чиқди. Унда Ил-76 ҳалокати тўғридан тўғри тилга олинмаган.

Украина "бундан кейин ҳам, шу жумладан Белгород-Харков йўналишида ҳам ҳарбий-транспорт самолётларини йўқ қилиш чораларини кўришини" маълум қилди.

Украина ОАВ буни Ил-76 ростдан ҳам Украина томонидан уриб туширилганига тасдиқ ўлароқ талқин қилмоқда.

https://t.me/bbcuzbek

BBC.COM/UZBEK

Telegramda bog'lanish raqami +44 7858860002