Украина уруши: Европада газ нархи тушиб кетди, урушга кетаётган россияликлар спермаларини бепул музлатиши мумкин, Херсонликлар нега шаҳарни тарк этяпти?

Европада газ нархи уруш бошланган вақтдаги нархдан ҳам тушиб кетди. Сешанба куни Европадаги энг йирик Нидерландияда TTF ҳабида газ нархи бир мегаватт-соат учун 77 еврога ёки минг куб метрга 820 еврога тушди. Бу Россия шу йилнинг феврал ойида Украинага бостириб киргандан сўнг энг паст кўрсатгичдир.

DW телекомпаниясининг эслатишича, Россия бостириб киришидан олдин 22 феврал куни TTF бир мегаватт-соат газ 80 еврога баҳоланганди. Газ нархи шу йилнинг август ойида ўзининг энг бқори нуқтасига чиққан. Ўшанда бир мегаватт-соат газ 350 еврога баҳоланган.

Германия тамоқлар бўйича федерал агентлигининг хабарига кўра, газ нархининг тушишига Европада декабр ойининг охирида кузатилган илиқ ҳаво сабаб бўлган. Қўшимча равишда шамол электр станцияларида кўпроқ энергия ишлаб чиқарилган. Натижада газ истеъмоли тушган.

Янги йил арафасида Германиядаги газ омборлари 88,2 фоиз тўла ҳолда етиб келган. Россиядан газ етказиб бериш тўхтаган бўлса-да, ноябр бошида Германия газ омборлари 99 фоиз тўлганди.

Урушга кетаётган россияликлар спермаси нега керак?

Урушга сафарбар қилинаётган россияликларга фронтга жўнашдан олдин спермаларини бепул музлатиш ҳуқуқи берилади. Аскарларнинг спермалари махсус криобанкларда сақланади, деб хабар бермоқда ТАСС хабар агентлиги.

Агентлик Россия Соғлиқни сақлаш вазирлиги хатидан иқтибос келтирган.

Унда махсус ҳарбий амалиётга сафарбар қилинган Россия фуқароларининг жинсий тўқималарини (сперма) олиб криобанланкларда текин сақлаш учун молиявий таъминот ажратилгани ҳақида айтилади.

Урушга кетганларнинг оила аъзолари кейинчалик мажбурий тиббий суғуртасини кўрсатиб, ушбу спермалардан бепул фойдаланиши мумкин.

Сентябр охирида Президент Путин "қисман" сафарбарлик эълон қилиши ортидан расмийлар 300 минг одам армияга сафарбар қилинган дейишади. Бироқ кўплаб мутахассислар асл рақамлар анча кўплигини айтишади.

Армияга чақириладиган ёшдаги 100 минглаб россияликлар мамлакатдан қочган.

Россия ҳукумати октябр ойи охирида сафарбарлик борасидаги режа тўлгани ва яна ҳарбий хизматчи чақириш режаси йўқлигини айтган бўлса-да, сафарбарликни бекор қилиш тўғрисида фармон чиққани йўқ. Кўплаб кузатувчилар яқин ойлар ичида сафарбарликнинг иккинчи тўлқини кутилаётганини тахмин қилишади.

Юзлаб херсонликлар шаҳарни тарк этмоқда

Россия ҳарбийлари сўнгги кунларда Херсонни тўплардан ўққа тутишни кескин кучайтирганидан сўнг шаҳарнинг кўплаб аҳолиси уни яна тарк этишга ҳаракат қилмоқда.

Сешанба куни кечаси Херсон шифохонасининг туғруқхонаси зарбага тутилди. Ўша вақти туғруқхонада энди кўзи ёриган беш нафар аёл бор эди. Уларнинг бирортаси ҳам жароҳат олмаган. Шунга қарамасдан бомбардимонлар натижасида ҳалок бўлган тинч аҳоли ҳақида деярли ҳар куни хабар келмоқда.

Би-би-си мухбири Йогита Лимайенинг хабар беришича, Россия қўшинлари Херсонга аёвсиз зарбалари бермоқда ва ҳавода тўпларнинг гумбурлаши тинимсиз эшитилмоқда. Зарбалар тартибсиз берилмоқда, снарядлар одамларни шаҳар кўчаларида ва ўзларининг шахсий уйларида ўлдирмоқда.

Таҳлилчиларга кўра, саккиз ойлик ишғолдан сўнг яқинда Херсондан чекинган Россия қўшинлари минтақада ҳимоявий ҳолатни эгаллаган. Улар ҳеч қандай ҳужум амалиётлари ўтказмаяпти.

Мухбиримизнинг айтишича, шаҳарни тинимсиз бомбалаётган россияликлар қандай мақсадни кўзлагани тушунарсиз.

Telegram каналимиз: https://t.me/bbcuzbek

BBC.COM/UZBEK билан Telegram орқали +44 7858860002 номери билан боғланинг.