Украина уруши: Путин қаҳратон совуқ билан ғалабага эришмоқчими? Ukraina Rossiya Dunyo Yangiliklar

Охирги ҳафтада Россия Украинанинг йирик энергетика инфратузилмаларини ҳужумга тутишни кучайтирган, Украина электр таъминоти тизимининг 30 фоизи ишдан чиққан. Таҳлилчилар фикрича, жанг майдонларида мағлубиятга учраётган Путин қаҳратон совуқ ёрдамида Украина ва Европани тиз чўктиришни мақсад қилган.

10 октябрдан бошлаб Россия ўзининг қанотли ракеталари, камикадзе дронлари ва бирваракайига отадиган ракета тизимлари билан бутун Украина ҳудудини бомбаламоқда.

Булар Қрим кўприги портлатилишига қасос экани айтилди, Президент Путиннинг ўзи йирик энергетика инфратузилмалари нишонга олинганини тан олди.

Алоқадор мавзулар:

17 октябрь куни пойтахт Киевга отилган камикадзе дронлари Украинанинг бош энергетика ширкати қароргоҳини нишонга олганлари маълум бўлди.

Украина расмийлари шу куни 20 дан ортиқ дрон Киевга отилгани, лекин уларнинг аксарини уриб туширганларини, фақат бештаси портлаганини хабар қилдилар.

Булар Эронники, Россия номини "Геран" деб ўзгартирган "Шаҳид-136" дрони деб ишонилади.

Россия ҳужумлари сешанба куни ҳам тинмади, Киев шаҳрини ток билан таъминлайдиган икки иссиқлик электр станцияларига ҳужум қилинди.

ИЭСларга жиддий шикаст етган.

Президент Зеленский айтишича, шу вақтга келиб Украина электр станцияларининг 30 фоизи вайрон этилган.

Мамлакатнинг аксар ҳудудида электр ва сув таъминотида узилишлар юзага келган.

Фақат бир кунлик ҳужумларнинг ўзи юзлаб шаҳар ва қишлоқларни электрсиз қолдирди.

10 октябрдаги ҳужумлардан кейин Украина раҳбарияти аҳолидан тунги соатларда электр истеъмолидан фойдаланишни камайтиришни сўраган, бу мамлакат энергетика тизими зўриқиши олдини олиши уқтирилган.

Бир ҳафта олдинги ҳужумлардан кейин электр тизимлари қайта таъмирланди, бироқ яна янги ҳужумлар ва қиш шароитига энергетика тизими қанчалар дош бера олиши номаълум, деб ёзади Би-би-си мухбири.

Шу йил 24 февралида Украина босқинини бошлаган Россия ёз бошидан буён йирик ҳарбий ғалабани қўлга киритолгани йўқ.

Украина Ғарбдан HIMARS ракета тизимларини олганидан кейин уруш жабҳаси ичкарисидаги Россиянинг қурол-яроғ обморлари, техникалари, қўмондонлик пунктлари ва Херсон яқинидаги Антоновский кўприги сингари стратегик муҳим иншоотларни вайрон этиб ишдан чиқарди.

Бу эса қурол-яроғ захирасини тўлдириш, зарур аскарлар ва техникани фронтга етказишни қийинлаштирди.

Сентябрь ойи бошида Украина қўшинлари шимоли-шарқдаги Харкив вилоятида қарши ҳужумга ўтиб, бутун Харкив вилоятини ва Луҳанск вилоятларининг айрим аҳоли масканларини ўз назоратига киритди.

Ўшанда экспертлар, Украина контр ҳужуми Путин учун кутилмаган бўлганини, у Россия Наполеонни енгганидек, қиш келишини кутганини айтишди.

Айрим таҳлилчиларнинг фикрича, жанг майдонида қўли баланд келмаётган Путин газ қувурларини портлатиш билан Европада аҳоли норозиликларини келтириб чиқаришга умид қилган: совуқдан қийналиб кетган европаликлар ўзларининг ҳукуматларидан Украинани қўллаб-қувватлашни тўхтатишни, ўзларини иссиқлик манбаи билан таъминлашни талаб қилишади. Ғарбдан қурол-яроғ ололмай қолган ва ўзидаги электр станциялари ишдан чиққан Украинани ўз шартига кўндириш осон бўлади.

Бироқ Европа сиёсатчилари Украина қўллаб-қувватловида якдилмиз, дейишмоқда.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek