Россия режими террорчи деган резолюция тайёрланди Rossiya Putin Yangiliklar

13 октябрь куни ҳам бутун Украина ҳудуди бўйлаб ҳаво ҳужумидан огоҳлантириш сиреналари янгради, яна шаҳарларга Россия отган ракеталар тушди, инсонлар ҳалок бўлиб, бинолар вайрон этилди.

Россия Қрим кўприги портлатилишига жавоб деб Украина ҳудудларини қанотли ракеталар, дронлар ва ёппасига отиладиган ракета тизимларини 11 октябрдан буён бомбалаб келади, халқаро ҳамжамият ушбу ҳужумларни кескин қораламоқда.

Алоқадор мавзулар:

Шу куни НАТОга аъзо 14 мамлакат Украинанинг ҳаво ҳужумидан мудофаа тизимини кучайтиришга ёрдам беришга ваъда қилдилар.

Брюсселда НАТО аъзолари Россия босқинига қарши дастак йўлларини муҳокама этмоқдалар.

Европа Кенгашининг Парламент Ассамблеяси эса Россия режимини террористик, бу мамлакатнинг БМТ Хавфсизлик Кенгашидаги аъзолигини ноқонуний, деб тан оладиган резолюция матнини тайёрлади.

Резолюция муҳокамаси жонли эфирда тўғридан-тўғри намойиш этилган, матнга 14 та тузатиш киритилди.

Тузатишлардан бири "Россия режими" деган атама ҳақида бўлди.

Матннинг илк кўринишида "Россия Федерацияси режими" деб ёзилган бўлган.

Муҳокамалардан кейин резолюция тексти "бугунги кунда ҳокимиятда қолаётган Россия режими" деб ўзгартирилган.

Парламент Ассамблеяси мажлисининг аксар иштирокчилари резолюция матнини ёқлаб овоз бердилар.

Экспертларга кўра, ушбу эътирофни Россияни терроризмни қўллаб-қувватлаётган давлат деб тан олиниши томон илк қадам сифатида баҳолаш мумкин.

Шунингдек, Европа Кенгаши Парламент Ассамблеяси Россия жиноятлари бўйича халқаро трибунал тузишга чақирган, унда Украинанинг босиб олинган ҳудудларида содир этилган жиноятлар, шунингдек, урушни олиб бориш қонун ва тартиблари бузилишини тергов қилишни талаб қилган.

Путин ва Эрдўғон учрашуви

Қозоғистон пойтахти Остонада учта саммит бўлиб ўтаяпти, уларда Россия Президенти Владимир Путин, Туркия Президенти Ражаб Тойиб Эрдўғон ҳам қатнашаяптилар.

13 октябрь куни Президент Путин ва Президент Эрдўғон учрашуви бўлиб ўтди.

Кремль матбуот котиби Дмитрий Песков айтишича, президентлар Россия-Украина можаросини ҳал этиш масаласини муҳокама этмаганлар.

Бундан олдин илк сулҳ март ойи охирида Истанбулда бўлиб ўтган, Туркия воситачилигида Украина донини жаҳон бозорига олиб чиқиш келишувига эришилган ҳамда Украинанинг 215 ҳарбийси Россия асирлигидан қутқарилган, шунинг учун ҳам Остонада Президент Эрдўғон урушни тўхтатишда воситачилик қилиш масаласини Президент Путин билан гаплашади, деб кутилганди.

Мухбирларга кўра, Путин ва Эрдўғон ғаллани олиб чиқиш бўйича шартномани ноябрь ойидан кейин ҳам чўзиш ҳамда Россия газини Туркия орқали Европага олиб чиқиш масалаларини муҳокама қилганлар.

Президент Путин Туркияни газ етказиб марказига айлантириш таклифини илгари сурган.

Илк сафарбар қилинганлар ҳалок бўлди

Россия расмийлари Украина урушига мобилизация этилган илк ҳалок бўлган россияликлар ҳақида хабар тарқатди.

Шу йил 24 февралида Украина босқинини бошлашга буйруқ берган Президент Путин кўп марта ҳарбий сафарбарлик бўлмаслиги ҳақида гапирганди.

Аммо 21 сентябрда Россияда "қисман сафарбарлик" қарорини чиқарди, Мудофаа вазири Сергей Шойгу 300 минг киши Украинага юборилади, деб эълон қилди.

Бир неча юз минг россиялик урушдан қочиб, мамлакатни тарк этди.

Ҳарбий сафарбар этилганларни жойлаштириш, улар учун зарур кийим-кечак топиш мушкул экани аёнлашди.

13 октябрь куни Россиянинг Челябинск вилояти расмийлари беш ҳамюртлари Украинада ҳалок бўлгани хабарини тасдиқладилар.

Свердловск вилоятидан уч эркак Лисичанск яқинида ҳалок бўлгани хабар қилинди.

Санкт-Петербург шаҳрида адвокатлик билан шуғулланган ҳуқуқшунос сафарбар этилганидан 12 кун ўтиб ҳалок бўлган.

Бундан олдин ҳали уруш кетаётган ҳудудга етиб бормасдан 10 дан ортиқ россиялик ҳалок бўлгани тасдиқланди.

Украина урушига сафарбар этилганлар бунча тез ҳалок бўлганларининг асосий сабабларидан бири, жанглар кечаётган жабҳада Россия ҳарбийларининг сони талабдагидан анча кам эканидадир.

Россия ҳолдан тойди, қурол-яроғи тугаяпти

Британия разведкаси бир кун олдинги ҳисоботида Россия ҳарбийларининг силласи қуригани, айрим турдаги қурол-яроғи тугаб бораётгани ҳақида хабар қилди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek