Юзингиздаги ҳар тунги секс: бу ҳақида нима биласиз? Dunyo Ilm-fan Yangiliklar

Умр бўйи юзимиз териси қаърида яшайдиган ва теридаги тешикларни тозалайдиган майда каналар ҳақида эшитганмисиз? Улар ҳар кеч янги тери фолликуласини топиш, жуфти билан учрашиш ва у билан қовушиш учун тешикларни тарк этади...

Алоқадор мавзулар:

Ҳар куни пилинг, намлантириш ва Қуёш нурига қарши кремлар қўллар аксар одамларнинг кундалик одатига айланиб қолган.

Аммо умр бўйи юзимиз териси қаърида яшайдиган Demodex folliculorum каби теридаги тешикларни тозалайдиган майда каналар ҳақида эшитганмисиз?

Кечаси 0,3 мм узунликдаги организмлар янги тери фолликуласини топиш, жуфти билан учрашиш ва у билан қовушиш учун тешикларни тарк этади.

Аммо янги тадқиқот шуни кўрсатдики, каналарнинг ДНКси емирила бошлар экан, улар муаммога дуч келиши мумкин, яъни улар йўқ бўлиб кетиш арафасида.

Агар тозалаш воситасини олиб, терингизнинг ҳар бир сантиметрини артиб ташласангиз, уларга унчалик зарар бермайсиз - улар терида жуда чуқурда яшайди ва ҳеч қачон уларни ювиб ташлаб бўлмайди.

Бизнинг 90 фоиздан ортиғимизда бу каналар бор ва уларга туғилишдан бошлаб уй берганмиз, чунки улар янги туғилган чақалоққа онасини эмаётган вақтдаёқ ўтади.

Тадқиқот ҳаммуаллифи, Ридинг университети доктори Алежандра Перотти каналарга бошпана берганимиз ва улар билан шундай яқинлигимиз учун "миннатдор бўлишимиз" кераклигини айтади.

"Улар жуда кичкина. Хавотирланадиган ҳеч нарса йўқ. Улар бизнинг теримиздаги тешикларимизни очади, уларни тоза сақлайди", дейди у Radio 1 Newsbeat'га.

"Хавотир олманг. Кичик микроскопик жонзот сиз билан бирга яшаётганидан хурсанд бўлинг, у ҳеч қандай зарар келтирмайди.»

Тадқиқот биз уларга қанчалик яқинлигимиз, шунингдек, бу каналарнинг турли ҳашаротлар, ўргимчаксимон ёки қисқичбақасимонлар билан умумий генлари камлигини кўрсатади.

Бу каналарнинг танасини ультрабинафша нурларидан ҳимоя қилувчи гени йўқолган, улар фақат тунда фаол бўлишади.

Айнан ана шу тунги машғулот сизни сескантириши мумкин...

"Кечаси, биз чуқур уйқуда бўлганимизда, улар қовушиш ва бола кўриш учун тери тешикларига тушишади", дейди доктор Перотти.

Ҳа, бу жонзотлар бизнинг тери тешикларимиздан яширин Севги ороли сифатида фойдаланадилар.

Тадқиқот шуни кўрсатадики, уларнинг генетик хилма-хиллиги камайиши билан уларнинг бизга боғлиқлиги кучаяди, бу улар охир-оқибат йўқ бўлиб кетиш хавфи остида қолишини англатади.

Мисол учун, тадқиқотчилар канани уйғотувчи ва уларни уйқуга кетгазувчи генни топишни кутишган, бироқ бундай бўлмади.

Бунинг ўрнига, биз ухлаётганимизда улар теримиздаги айрим гормонларни аниқлайди ва ана шу нарса уларни уйғотади.

Уларнинг бизнинг теримизга мослашиб қолиши муаммога олиб келади. Улар бизга қанчалик кўп мослашган бўлса, шунчалик кўп генларни йўқотадилар ва охир-оқибат улар ўзларининг мавжудлиги учун бутунлай бизга қарам бўлиб қоладилар.

Ушбу қарамлик туфайли улар бизнинг тери тешикларимизни тарк этиб, қовушиш учун янги жуфт топа олмайди. Бу худди барча тухумларни бир саватга жойлашга ўхшайди.

Хўш, агар улар йўқолиб кетса, муаммо нима?

"Улар соғлом тери билан боғлиқ, агар биз уларни йўқотсак, сизда тери муаммолари бўлиши мумкин", деб қўшимча қилади доктор Перотти.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek