Ҳиндистон: Масжидлар ва мусулмонларнинг мол-мулкларига қарши ҳужум Hindiston musulmonlar dunyo yangiliklar
Сурат манбаси, PINAKI DAS
Мусулмонларга қарши зўравонликлар бу гал Ҳиндистоннинг шимолий-шарқий Трипура штатида кузатилган. Масжидлар ва мусулмонларнинг дўконларига ҳужум қилинган. Худди шу манзарада Ҳиндистон Покистон спортчиларига ишқибозлик қилган мусулмонларни ҳибсга олган.
Ҳар икки ҳодиса устма-уст, бири Трипура, бошқаси эса Уттар-Прадешда юз берган.
Трипурада вазият ҳануз танглигича қолмоқда.
Штатда хавфсизлик чоралари кучайтирилган.
Одамларнинг бир жойда тўпланишлари маън этилган.
Сурат манбаси, Reuters
Трипурадаги мусулмонларга қарши зўравонликлар ҳинду гуруҳлари ва полиция ўртасидаги тўқнашувлардан кейин юзага келган.
Ҳинду гуруҳларининг норозилигига яқинда Бангладешда юз берган тартибсизликлар сабаб бўлган, у ерда ҳиндулар ҳужумга тутилган.
Ҳиндистондаги ҳинду гуруҳлари бунга қарши кўчаларга чиқишган, полиция уларнинг митингига тўсқинлик қилган.
Бангладешдаги зўравонликларга ҳиндуларнинг йиллик муқаддас айёмларидан бирида Қуръони Каримнинг таҳқирланганига оид гап-сўзлар сабаб бўлган.
Ўшанда камида етти киши ўлдирилган, эҳромлар оёқ-ости қилинган, Бангладешдаги ҳинду озчилигининг юзлаб уй-жой ва мол-мулки вайрон этилган.
Трипура
Трипура уч томондан Бангладеш билан ўралган, бу штатни бошқаси билан фақат тор бир йўлак боғлаб туради.
Уни чорак аср давомида коммунистлар бошқаришган, аммо ҳозир Трипура назорати бошқарувдаги миллатчи ҳинду партияси - Би-Жи-Пи(BJP) назорати остида.
Сўнгги тўрт кун ичида Шимолий Трипура туманидан 10 дан ошиқ диний заминдаги зўравонликларга оид хабарлар олинган.
Мусулмонларга қарши сешанба тунги зўравонликлардан аввал ўз митингини уюштирган Вишва Ҳинду Паришад мутаассиб ташкилоти эса, худди шу партиянинг яқин иттифоқчиси саналади.
Сурат манбаси, PINAKI DAS
Панисагардаги юқори мартабали полиция мулозимининг айтишича, уларнинг митингида 3500 га яқин одам қатнашган.
Полиция мулозимига кўра, ташкилотнинг айрим фаоллари бир масжид, бир қанча уй-жой ва дўконларни вайрон қилишган, яна иккита дўконга ўт ҳам қўйишган.
Полициянинг маълум қилишича, уларнинг барчаси мусулмонларники бўлиб чиққан, бир жабрдийданинг шикояти асосида иш ҳам очилган.
Маҳаллий мутаассиб ҳинду гуруҳларидан бирининг лидери эса, масжид қаршисидаги айрим ёшлар ўзларини ҳақорат қилганликларини иддао қилишган, аммо уларнинг даъволарини мустақил манбалар орқали тасдиқлашнинг имкони бўлмаган.
Трипура полицияси, "айрим одамлар миш-миш ва ижтимоий тармоқларда иғвогорона постлар тарқатишаётгани" ҳақида твит қилиб, одамларни осойишталикка чақирган.
Айни мақолада X томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз X ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири X пост
Мусулмонларга қарши ҳужумлар
Ўтган ҳафта Жамият Уламо-и Ҳинд мусулмон ташкилотининг давлат бўлими иддао билан чиққан, оломон масжидлар ва асосан мусулмонлар яшовчи мавзеъларга ҳужум қилишганини айтганди.
Трипура полициясининг маълум қилишича, ҳозир штатдаги 150 дан ортиқ масжидни қўриқлаб туришибди.
Штат аҳолисининг сони 4 миллиондан ошади. Уларнинг 9 фоизга яқинини мусулмонлар ташкил қилишади.
Trinamul Congress партиясидан депутат Сушмита Девнинг айтишича, штатдаги ноябрь ойига режаланган маҳаллий кенгашларга сайловлар арафасида Би-Жи-Пи Бангладешдаги зўравонликлардан сайловчиларни ўзига оғдириш мақсадида фойдаланмоқда.
Би-би-сининг бу хусусда изоҳ сўраб, штатнинг Миллий озчиликлар вазирига қилган телефон қўнғироқлари бежавоб қолди.
Сурат манбаси, PINAKI DAS
Би-Жи-Пининг матбуотга сўзлашга ҳаққи йўқлигини айтиб, анонимлик остида Би-би-сига ўз муносабатларини билдирган маҳаллий лидерига кўра эса, "мухолифат Бангладешдаги йирик ҳужумларга жавобан кузатилаётган бу каби онда-сондалик ҳодисалардан сиёсий манфаат кўзламаслиги лозим".
Унинг даъво қилишича, штат раҳбарияти вазиятни назорат қилиш учун лозим бўлган ҳамма ишни қилган.
Спорт ишқибозлари ҳибсда
Сурат манбаси, Getty Images
Воқеаларнинг бошқа ривожида эса, Ҳиндистонда покистонлик уч мусулмон ҳибсга олинган.
Хабарларга кўра, Ҳиндистонда бўлиб турган бу мусулмонлар крикет бўйича жаҳон чемпионатида (Т20) ўз жамоалари, яъни Покистоннинг ғалабасини қутлашгани сабаб бўлган.
Ҳодиса Ҳиндистоннинг Уттар-Прадеш штатида юз берган.
Ҳиндистон полициясининг маълум қилишича, улар ўйин чоғида Покистонни қўллашган, Ҳиндистонга қарши шиорларни айтиб, қичқиришган.
"Худди шу боис ҳам, учовлон адоват ва кибертерроризмни тарғиб қилиш"да айланишган.
Қисқача маълумот:
Ҳиндистон мусулмон аҳолиси сони бўйича Индонезиядан кейин дунёнинг иккинчи йирик давлати саналади.
Ҳиндистонда 200 миллиондан ортиқ мусулмон бор.
Бироқ бу мамлакатда диний қарама-қаршилик янгилик эмас, аммо танқидчиларнинг айтишича, аксилмусулмон зўравонликлар 2014 йилда Бош вазир Нарендра Модининг ҳинду миллатчи ҳукумати ҳокимиятга келгач кучайган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
