Афғонистон: Толибон соқол қиришни тақиқлади Afg'oniston Tolibon soqol

Толибон сартарошларга эркакларнинг соқолини олишни тақиқлади. Бу тақиқни бузганлар Афғонистонда жорий этилган исломий шариатни бузишда айбланиб жазога тортилишидан огоҳлантирилди.

Бу эълон мамлакат жанубидаги Ҳелманд вилояти диний полицияси томонидан сартарошларга тарқатилган.

Пойтахт Кобулдаги айрим сартарошлар ҳам ўзларига шундай огоҳлантириш бўлганини тасдиқладилар.

Ушбу буйруқни кўпчилик Толибоннинг яна 1990 йиллардаги қаттиққўл сиёсатига қайтаётгани аломати деб кўрмоқда.

Ваҳоланки, Афғонистонда 20 йилдан кейин яна ҳокимиятни қўлга киритган Толибон аввалги хатоларидан сабоқ чиқаргани, бундан кейин мўътадил сиёсат юритишларини эълон қилган эди.

15 августда пойтахт Кобулни қўлга киритиши ва бу билан бутун Афғонистонда қудратни эгаллаши билан Толибон қаттиқ жазо усулларига қайтди.

25 сентябр куни Ҳирот шаҳри марказидаги хиёбонда бир эркак жасади кўтарма кранда осиб намойиш қилинди.

Бу Толибоннинг жиноятчиларни дорга осиш йўли билан жазолаш усули қайтганини англатди.

Толибонга кўра, одам ўғрилари бир бизнесмен ва унинг ўғлини ўғрилаганлар.

Сўнг одам ўғрилари билан Толибон жангчилари ўртасида отишма келиб чиққан.

Тўрт нафар жиноятчи отиб ўлдирилган, бизнесмен билан ўғли озод этилган.

Ҳирот шаҳри яшовчилари овоз кучайтиргичда эълон тарқалаётганини эшитиб кўчага чиққанлар, марказий хиёбонга бир автомобилда тўрт қонга беланган жасад олиб келинганини кўрганлар.

Жасадлардан бири кўтарма кранда осилган, бўйнига жиноятчилар бундан кейин мана шундай жазоланади, деган мазмундаги ёзув бўлган.

Қолган уч жасадни Ҳиротнинг бошқа хиёбонларида осиб қўйиш учун олиб кетдилар, деб айтган маҳаллий дўкондорлардан бири.

Соч ва соқолни олиш янги тартиби ҳақидаги эълонлар Афғонистон жанубидаги Ҳелманд вилоятидаги сартарошхоналарга осиб кетилган.

Эълонда сартарошлар эркакларнинг соч ва соқолини олишга тааллуқли шариат талабларига риоя этишлари лозимлиги айтилган, "ҳеч кимнинг шикоят қилишга ҳаққи йўқ" дея огоҳлантирилган.

"Жангчилар кириб келиб соқолни калта қилишни тўхтатишга буйруқ бериб кетишаяпти. Келганлардан бири "биз назоратчи юборамиз, соқол олдирмоқчи бўлиб келади ва агар соқолларни калта қилаётган бўлсангиз, тутиб оламиз", деб огоҳлантирди деб айтди кобуллик сартарошлардан бири.

Кобулдаги энг йирик соч салонларидан бирининг эгаси айтишича, унга бир киши ўзининг ҳукумат одами эканини айтиб қўнғироқ қилган.

"Америка стилига эргашишни тўхтатинг, бирорта ҳам эркакнинг соқолини қирманг ёки калта қилманг", деб огоҳлантирган у.

Толибон 1996 йилдан 2001 йилгача Афғонистонни бошқарган вақтда эркакларга жуда ўзига жалб қиладиган соч турмакларини тақиқлаган, эркаклардан соқол ўстиришни талаб қилган.

Кейинги 20 йил ичида эса тоза қиртишланган соқол эркаклар орасида машҳур бўлган, ёш йигитлар сартарошлардан сўнгги фасондаги соч турмакларини сўрайдиган бўлганлар.

Ўз хавфсизлиги боисидан исми-шарифи эълон қилинмаслигини сўраган сартарошлар янги тартиб пул топишларини қийинлаштиришини айтадилар.

"Кўп йиллар давомида менинг салоним кўп ёш йигитлар учун сўнгги фасонда соч-соқолини олдириш жойи эди. Бундан кейин бу бизнесни давом эттиришдан маъни йўқ", деб айтди сартарошлардан бири Би-би-сига.

"Соч салонлари ва сартарошхоналар тақиқланган бизнесларга айландилар. Мен бу иш билан 15 йилдан буён шуғулланиб келдим, бундан кейин давом эттироламан деб ўйламайман", дейди у.

Ҳирот шаҳрилик бошқа бир сартарош эса ўзига ҳеч қандай огоҳлантириш бўлмаганини айтади, "ўз ихтиёрим билан сартарошхонамни ёпдим", дейди у.

"Мижозлар соқолларини олдирмаяптилар. Чунки улар кўчада Толибон жангчиларининг нишонига айланишни истамайдилар. Эркаклар бошқалардан ажралмай туришни, ҳамма одамларга, Толибон жангчиларига ўхшаб туришни хоҳлаяптилар", дейди сартарош.

"Энди ҳеч ким сочининг турмаги ҳақида ўйламай қўйди", дейди у.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek