Ўзбекистон, дунё, янгиликлар: Саудия Қозоғистонга, Қозоғистон Саудияга визани бекор қилди

1 октябр 2019

Дунё, янгиликлар: Саудия Қозоғистонга, Қозоғистон Саудияга визани бекор қилди - расмий Нур-Султоннинг бу қарори ар-Риёдникидан саноқли кунлар ўтиб бўй кўрсатди. Муслима журналист эса, зино ва абортда айбланиб, қамалди. Мирзиёев табриги ва Тошкентга Россиядан ташриф - куннинг дайжести:

Ўзбекистон ва Саудия Арабистони ортидан...

Қозоғистон дунёнинг яна 12 та давлатига визани бекор қилди.

Бу каби имтиёз Ватикан, Вьетнам, Индонезия, Қатар, Колумбия, Қувайт, Лихтенштейн, Омон, Саудия Арабистони, Тайланд ва Филиппин фуқароларига берилди.

Хабарларга кўра, энди уларнинг 30 кунгача Қозоғистон ҳудудида бемалол қолишлари мумкин бўлади.

Қозоғистон 2017 йилдан буён 45 та давлатга бу каби енгилликни берган.

Аммо Саудия Арабистони яқинда виза тартибини бекор қилган давлатлар орасида Ўзбекистон йўқ.

Марказий Осиё давлатлари орасидан фақат Қозоғистон бор, холос.

Дунё, янгиликлар: Путинни қувмоқчи бўлган шаман, мусулмонлар ғазабда ва Бош вазир узри

Skip Энг кўп ўқилган and continue reading

Энг кўп ўқилган

End of Энг кўп ўқилган

Дунё, янгиликлар: Осмонга сакраган нефт нархи ва Бин Ладен ўғлининг ўлими

Дунё, янгиликлар: Ўзбекистон Хитойга визани бекор қилди, "Ўзбеккино"га янги раҳбар тайинланди

Мирзиёевдан табрик

Бугун Хитойда байрам - расмий Пекин Хитой Халқ Республикаси ташкил топганининг 70 йиллигини нишонламоқда.

Ўзбекистон Президенти Шавкат Мирзиёев ҳам бу санани беэътибор қолдирмаган.

Бугунги кунда ўзларининг энг йирик савдо-иқтисодий ҳамкорлари бўлган Хитойни табриклаган.

Расмий Пекин айни сана муносабати билан мамлакат тарихидаги энг йирик ҳарбий парадлардан бирини уюштирмоқчи.

Шу йўл билан ўзининг бугунги ҳарбий қудратини бутун дунёга кўз-кўз қилмоқчи.

Хитойнинг ўзида ишлаб чиқарилган янги қурол-яроғларини намойиш этмоқчи.

Ҳарбий парад Тяньаньмэнь майдонида бўлиб ўтади.

Унда дунёнинг юзга яқин давлатидан келган икки юзтача ҳарбий атташелар ҳам ҳозир бўлишади.

Хитой жорий пайтда дунёнинг иккита ҳарбий қудратидан биттаси саналади.

Расмий Пекиннинг бугунги ҳарбий харажати $168.2 миллиард АҚШ долларини ташкил этади.

Россиядан ташриф

Россия Федерацияси Федерал Мажлиси Федерация Кенгаши раиси Ўзбекистонга расмий ташрифини бошламоқда.

Валентина Матвиенко 1-3 октябрь кунлари пойтахт Тошкентда бўлади.

Расмий хабарларга кўра, у Ўзбекистон Олий Мажлис Сенати раиси, Қонунчилик палатаси спикери билан учрашади.

Бундан ташқари, ўзаро ҳамкорлик бўйича парламентлараро комиссиясининг мажлиси ҳам ўтказилади.

Ташриф доирасида Ўзбекистон-Россия ва Россия-Ўзбекистон ишбилармон доиралари кенгашларининг мажлиси ҳам бўлиб ўтади.

Ўзбекистон жорий пайтда Россиянинг минтақадаги энг муҳим геосиёсий, геоиқтисодий шерикларидан бири бўлади.

Минтақадаги иккита энг йирик савдо-иқтисодий ҳамкорларидан бири саналади.

Россия, бундан ташқари, дунёнинг энг катта сондаги Ўзбекистон фуқаролари меҳнат муҳожирлигида банд давлати бўлади.

Расмий ва норасмий рақамларда ҳам уларнинг сонлари бугун миллионларга нисбат берилади.

Улар ортга, Ўзбекистонга юбораётган миллиардлаб доллар маблағлар, йилларки, мамлакат иқтисодини тутиб, юритиб келаётган энг муҳим молиявий манбалардан бири сифатида эътироф этилади.

Россия ёки Қозоғистоннинг ўзларига четдан миграция оқимини тўхтатиб қўйиши - аксарият ўзбекистонликларни чўчитувчи, улар Ўзбекистон учун энг катта хавф, деб билувчи омиллардан бири ҳам бўлади.

Минтақавий сиёсий экспертлар эса, миграцияни Россиянинг Ўзбекистон илова қолган аксарият Марказий Осиё давлатларига сиёсий босим ўтказиш, уларни ўзининг сиёсий орбитасига тортишнинг энг қулай ва имконли воситаларидан бири сифатида ҳам кўришади.

Шавкат Мирзиёев президентлиги билан кечган уч йилча вақт ичида Ўзбекистоннинг ўз ташқи сиёсатида кўпроқ геоиқтисодиётни устун қўяётгани, Россия билан ҳар томонлама алоқаларни янада кучайтириш истагида экани кўрилади.