Халқаро журналист нега Ўзбекистонга киритилмади? «Ёшлар» телеканали нега Украина байроғини хиралаштирди? Ўзбекистон, янгиликлар

Алоқадор мавзулар:

Журналистларни ҳимоя қилиш қўмитаси (CPJ)нинг Европа ва Марказий Осиё бўйича дастурлари координатори Гулноза Саид 30 август куни Ўзбекистонга киритилмаган. Бу ҳақда қўмита ўз расмий сайтида маълум қилди.

CPJ веб-сайтидаги хабарга кўра, Гулноза Саид (АҚШ фуқароси) унга иммиграция хизмати ходимлари унга тизим унга киришга рухсат бермагани ва Ню-Йоркка қайтиш учун 1 сентябргача аэропортда қолиши кераклигини айтишган.

CPJ мамлакатга киришнинг рад этилишини "Гулноза Саидни журналистларни ёритиш ва қўллаб-қувватлашдаги фаолияти учун қўрқитиш учун мўлжалланган таъқиб тури" деб атаган.

Журналист билан боғлиқ муаммога аэропортда беш соатга яқин вақт ўтказганидан сўнг Оммавий ахборот воситаларини қўллаб-қувватлаш жамғармаси аралашган. Шундан сўнг Гулноза Саидга мамлакатга рухсат берилган, аммо расмийлар томонидан унинг Ўзбекистонга кириши тақиқининг бирон бир сабаблари изоҳланмаган.

Оммавий ахборот воситаларини қўллаб-қувватлаш жамғармаси ўзининг Телеграм каналида интернетда Нью-Йоркдаги "Европа ва Марказий Осиёдаги журналистларни ҳимоя қилиш қўмитаси" ННТ дастури координатори Гулноза Саиднинг Ўзбекистонга кириши рад этилгани ҳақидаги маълумот пайдо бўлгани ҳақида ёзди.

- «Масс-медиа фонди зудлик билан Ўзбекистонга кириш ва чиқиш масалаларини тартибга солувчи давлат органларига бу борада тегишли сўров билан мурожаат қилди. Олинган маълумотларга кўра, ҳозирда ушбу масала ҳал этилган ва Гулноза Саидга мамлакатга кириш учун рухсат берилган», - дейилади баёнотда.

Гулноза Саиднинг ўзи «Фарғона» ахборот агентлигига Ўзбекистонга «беш ҳафта олдин ҳеч қандай муаммосиз кириб», икки ҳафта олдин кетганини айтган. У Ўзбекистонга Грузия ва Латвия хизмат сафарларидан сўнг оилавий келган бўлган.

Журналистларни ҳимоя қилиш қўмитаси 40 йилдан ортиқ вақт давомида бутун дунёда матбуот эркинлигини ҳимоя қилиб келаётган мустақил, нотижорат ташкилотдир.

CPJ бутун дунё бўйлаб 40 га яқин экспертлардан ташкил топган ва штаб-квартираси Ню-Йоркда жойлашган. Матбуот эркинлиги бузилганда, CPJ нишонга олинганлар номидан хабар берувчи ва чора кўрадиган мухбирлар тармоғини сафарбар қилади.

Телеканал ходимлари Испания ва Украина байроғини ажрата олмайдими?

Ижтимоий тармоқларда «Ёшлар» телеканалида футбол бўйича эфирга узатилган видеолавҳада Украина байроғи ранглар чапланган тарзда бекитилгани тасвири тарқалди.

Томошабинларнинг ёзишича, бу «Янги давр» ахборот дастурининг Испания чемпионати ўйинларидан намойиш этилган лавҳаларда кузатилган.

«Ёшлар» телеканали бу борада Телеграмдаги расмий каналидан изоҳ берди.

«Ижтимоий тармоқларда тарқалган сурат эса "Янги Давр" информацион дастурининг спорт хабарлари блокидан олинган», дея аниқлик берган телеканал.

Матбуот хизмати футбол баҳслари намойиши давомида кадрларга ҳеч қандай қўшимча эффектлар қўлланилмаслигини билдирган. Шу билан бирга бу монтажчи ва бош муҳаррир хатоси эканлиги айтилади.

- «Лавҳани тайёрлаган монтажчи "Реал Мадрид" жамоаси ўйнаётган футболда Испания байроғи ўрнига Украина байроғи хато қўйилган деб ўйлаб, бу "хатолик"ни ўзбошимчалик билан тўғирламоқчи бўлгани ва шу мақсадда беркитгани маълум бўлди. Бош муҳаррир кўрик пайтида бу ҳолатга эътибор бермай, лавҳани эфирга узатишга рухсат берган. Бу бўйича айбдорларга нисбатан тегишли чоралар кўрилди». - дейилади хабарда.

Шунингдек, телеканал юзага келган вазият учун узр сўраган ва ушбу ҳолатга сиёсий тус бермасликни илтимос қилган.

МДҲдаги энг катта прокат экрани - «Киночилар уйи»да

Ўзбекистон Кинематография агентлиги МДҲ мамлакатларидаги энг йирик прокат экранини тақдим этди.

«Ипак йўли дурдонаси» ХИВ Тошкент халқаро кинофестивали арафасида оммавий томошабинлар учун мўлжалланган МДҲ мамлакатларидаги энг йирик ДCП форматдаги прокат экранининг тақдимоти бўлиб ўтди, дея хабар берди Ўзбекистон Кинематография агентлиги матбуот хизмати.

Хабарга кўра, тақдимот Ўзбекистон Республикаси давлат мустақиллигининг 31 йиллигини нишонлаш, шунингдек, бўлажак кинофестивал доирасида Ўзбекистон кино кунларининг бошланиши муносабати билан ўтказилган.

«Бугун биз овоз ва тасвирнинг тўлиқлигини максимал даражада етказиб бера оладиган кенг кўламли ДCП экранини тақдим этамиз. Киночилар уйига жами 5 та экран - бино ичида 4 та ДCП ва 1 та ёзги ЛЕД дисплей жойлаштирилади. Кинотеатр бир вақтнинг ўзида 1809 кишини сиғдира олади», — дейди Ўзбекистон Кинематография агентлиги Бош директори Фирдавс Абдуҳолиқов.

Байрамолди намойишлар Ўзбекистон мустақиллигининг 31 йиллиги арафасида бошланган бўлиб, кинотеатр аҳоли ва меҳмонлар учун очиқ.

Маълумотга кўра, масштабли экраннинг кенглиги 29,5 метр ва баландлиги 14 метрни ташкил этади.

— "Киночилар уйида МДҲ мамлакатларидаги энг катта прокат экранини ўрнатдик. Экран турли иловалар учун экран ишлаб чиқариш технологиялари соҳасида жаҳонда етакчиси бўлган Франциянинг Ҳаркнесс Сcреенс компанияси томонидан яратилган", — дейди "Асиа Cинема" вакили Сухроб Маҳмудов.

Байрамда ҳам аёлларга зўравонлик мавзуси

Ўзбекистон Президенти сўнгги кунларда ижтимоий тармоқларда кенг муҳакамаларга сабаб бўлаётган ўзбекистонлик хотин-қизларга нисбатан зўравонлик мавзусига эътибор қаратди.

Кўксарой қароргоҳида Мустақиллик байрами арафасида фахрий унвонларга лойиқ кўрилганларни тақдирлаш маросимида Шавкат Мирзиёев бу мавзуга алоҳида тўхталган.

- «Бугун хурсандчилик кунларда кўпчилик муҳокама қилаётган айрим мавзулар кўнгилни хира қилади. Хотин-қизларимизга, азиз аёлларимизга нисбатан айрим зўравонликларни умуман қабул қилиб бўлмайди. Бу бизнинг миллатга хос бўлмаган чидаб бўлмас иллат.

Бунга қўл урганлар аёл қиёфасида ўз онаси сиймосини эсласин. Оқила опа-сингилларимиз бундай муносабатга лойиқ эмас!" - дейди президент Шавкат Мирзиёев ўз нутқида.

Эслатма: Би-би-си ташқи ҳаволалардаги материаллар учун масъул эмас.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek