Ўзбекистон: UzAuto Россияга автомобиль экспортини тўхтатганми ва Қозоғистон ноқонуний олиб чиқиб кетилган пулларни қайтармоқчи – янгиликлар O'zbekiston, yangiliklar

Санкциялар тўхтатган экспорт?

Халқаро санкциялар ортидан Ўзбекистон Россияга автомобиль экспорт қилишни тўхтатди, дея хабар қилмоқда Eurasianet.

Eurasianet UzAuto Motors ўз автомобилларида Жанубий Кореяда ишлаб чиқарилган яримўтказгич ва микрочипларидан фойдаланиши, расмий Сеул эса Украинага босқин ортидан Россияга қарши Ғарб санкцияларига қўшилгани ушбу ҳолатнинг сабаби эканини ёзган.

"Агар UzAuto Россияга автомобиль экспортини давом эттирганда, Андижон яқинидаги заводга бутловчи қисмлар етказиб берилиши музлатиб қўйилиши мумкин эди. Завод шундоқ ҳам сўнгги йилларда бутловчи қисмлар муаммосидан қийналмоқда", дейилади хабарда.

Eurasianet GM'нинг Детройтдаги вакилидан олинган мактубга таяниб, UzAuto Motors Россияга автомобиль экспортини 9 мартданоқ тўхтатганини билдирган.

"Шундан сўнг UzAuto Eurasianet'га автомобиллар ва эҳтиёт қисмларини жўнатиш учун Россия портларидан фойдаланишни тўхтатганини тасдиқлади, аммо компания Россияга машиналар сотиш масаласини муҳокама қилишдан бош тортди", ёзган Eurasianet.

Пулларни қайтариш бўйича комиссия

Қозоғистонда мамлакатдан ноқонуний олиб чиқиб кетилган пулларни қайтариш бўйича комиссия тузилган.

Мамлакат Бош вазири Алихан Смаилов 5 апрель куни шу масала бўйича йиғилиш ўтказган.

Ҳукумат сайтида эълон қилинган хабарда комиссия таркибидаги ишчи гуруҳлар томонидан маблағлар чиқиб кетиши сабаблари таҳлил қилинаётгани, сармояларни чет элдан мамлакатга қайтаришни рағбатлантириш ва чеклов чораларини жорий этишга оид таклифлар ишлаб чиқилаётгани айтилади.

Президент Қосим-Жўмарт Тўқаев 7 февраль куни ноқонуний олиб чиқиб кетилган маблағларни қайтариш зарурияти ҳақида гапирган, аммо у маблағларни хорижга олиб чиқиб кетган шахслар номини тилга олмаган ва гап айнан қандай сумма ҳақида кетаётганига тўхталмаган эди.

Бундан аввал Қозоғистон парламенти депутати Максат Раманқулов сўнгги 25 йил ичида мамлакатдан хориждаги офшор ҳисобларига олиб чиқилган маблағлар $140-160 миллиард атрофида эканини билдирганди.

Чегарадаги отишма

Ўзбекистон-Қирғизистон чегарасида ўзбекистонлик чегарачиларнинг қурол қўллаши оқибатида икки инсон ҳалок бўлган.

Қирғизистон Миллий хавфсизлик давлат қўмитаси Чегара хизмати маълумотига таянган ҳолда Kabar.kg сайтининг хабар қилишича, ҳодиса 5 апрель куни Жалолобод вилоятининг Ақси туманида юз берган.

Маълум қилинишича, отларда Ўзбекистонга ноқонуний равишда юк олиб ўтишга уринган бир неча Қирғизистон фуқаролари ўзбек чегарачиларининг тўхташ талабига бўйсунмаган.

Контрабандачилар Ўзбекистон давлат чегара чизиғидан 500 метр нарида Ўзбекистон ДХХ чегарачилари томонидан аниқланган, дея ёзган сайт.

Бу шахсларни қўлга олиш пайтида ўртада жанжал келиб чиққани, оқибатда, ўзбек чегарачилари ўз ҳаётини сақлаш мақсадида қурол қўллагани ва икки инсон ҳалок бўлгани, контрабандачиларнинг қолган қисми Қирғизистон ҳудудига яширингани маълум қилинган.

Ўзбекистон чегарачилари бу шахслар умумий қиймати $20 мингга тенг юкни ноқонуний тарзда чегарадан олиб ўтишга уринганини айтгани хабар қилинган.

"Кейинроқ маълум бўлишича, ҳалок бўлган фуқаролар Ўзбекистондан бўлган, аммо 2012 йилда Қирғизистон фуқаролигини олганлар. Дастлабки маълумотларга кўра, улар Ўзбекистон паспортини ўзи билан олиб юрган", ёзган Kabar.kg.

Билдирилишича, шу куннинг ўзида Ўзбекистон ва Қирғизистон чегара хизматлари вакиллари ҳодиса жойида учрашиб, ҳар бир томон воқеа бўйича ўз текширувини ўтказишга келишиб олганлар.

Ўзгаришсиз қолган ҳукм

Блогер Отабек Сатторийга нисбатан чиқарилган аввалги ҳукм ўзгаришсиз қолдирилган.

Олий суднинг Жиноят ишлари бўйича судлов ҳайъати блогерга оид жиноят ишини кассация тартибида кўриб чиқиб, ўтган йилда Сатторийга нисбатан чиқарилган ҳукм ва ажримни ўзгаришсиз қолдирган, шикоят қаноатлантирилмаган.

Отабек Сатторий ўтган йили туҳмат ва товламачилик жиноятларини содир этганликда айбдор деб топилиб, узил-кесил 6 йил 6 ой муддатга озодликдан маҳрум этилган эди.

Россиядан қайтган мигрантлар

Март ойида 50 минг, йил бошидан буён 133 минг нафар ўзбекистонлик Россиядан қайтиб келган.

Бу ҳақда 5 март куни ўтган матбуот анжуманида Ташқи меҳнат миграцияси агентлиги бошлиғи ўринбосари Азизбек Юнусов маълум қилган.

Шунингдек, агентлик ватандошларнинг Россиядан қайтиш сабабларини ўрганиш мақсадида сўровнома ўтказган.

15 мингга яқин инсон қатнашган сўровнома иштирокчиларининг 36 фоизи Ўзбекистонга қайтиш нияти йўқлигини билдирган бўлса, қолган инсонлар турли сабабларга кўра қайтиш режаси ёки эҳтимоли борлигини кўрсатган.

Масалан, қатнашувчиларнинг 15 фоизи ишини йўқотганлиги, 25 фоизи валюта курсининг беқарорлиги сабаб қайтмоқчилигини маълум қилган.

Иштирокчиларнинг 24 фоизи қайтишнинг уларга қизиғи йўқлиги, ҳозирги пайтда ишлаётгани, агар иш жойини йўқотса, қайтиш ҳақида ўйлаб кўриши мумкинлигини билдирган.

Бундан ташқари агентлик вакиллари февраль-март ойларида Россиядаги ўзбекистонликларнинг иш ҳақини ўз вақтида ололмаётгани тўғрисидаги мурожаатлари сони кескин ошганини қўшимча қилганлар.

Вақтинча ёпилган Ғалаба боғи

Тошкентдаги Ғалаба боғи ёдгорлик мажмуаси ва унинг таркибидаги "Шон-шараф" музейи вақтинча ёпилган.

Мудофаа вазирлиги бу ерда 6 апрелдан 30 апрелга қадар таъмирлаш ва ободонлаштириш ишлари олиб борилишини хабар қилган.

Президент Шавкат Мирзиёевнинг ташаббуси билан Иккинчи жаҳон урушидаги ғалабанинг 75 йиллигига бағишлаб қурилган боғ 2020 йил май ойида очилган эди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek