Ўзбекистон: Янги афв, $60 минг эвазига АҚШга ва Андижонда ИИБ ходимлари тошбўрон қилиндими? O'zbekiston yangiliklar

Президент яна ўнлаб инсонни афв қилди. Самарқандда одамларни хавфли йўл билан АҚШга юбормоқчи бўлган шахс ушланди. Ўзбекистон Тожикистондан $23 миллионлик электр сотиб олган. Андижонда ИИБ ходимлари тошбўрон қилингани ҳақида хабар тарқалди. ЎзЭОАВМА раиси ўзгарди - bbcuzbek.com дайжести.

Алоқадор мавзулар

Афв этилган 63 инсон

Ўзбекистонда яна ўнлаб одам афв қилинди. Давлат раҳбари бу тўғрида янги фармонга имзо чекди.

Президент Шавкат Мирзиёев афви билан 44 нафар инсон жазони ўташдан муддатидан илгари шартли озод этилади.

Яна 19 маҳкумга тайинланган озодликдан маҳрум этиш жазоси муддати қисқартирилади.

ЎзАнинг хабар беришича, президент билиб-билмай жиноят содир этган, ҳозирги вақтда қилмишига чин кўнгилдан пушаймон бўлган ва тузалиш йўлига қатъий ўтган шахсларни афв этиш тўғрисидаги фармонга имзо чеккан.

Хабарда афв этилганларнинг 2 нафари 60 ёшдан ошган инсонлар экани билдирилган.

Аммо расмий хабарларда янги афв сабаби очиқланмаган.

Президент Шавкат Мирзиёев сўнгги бор ўтган йил декабрь ойида, Ўзбекистон Конституцияси куни муносабати билан 182 нафар маҳкумни афв қилган.

Бу Шавкат Мирзиёевнинг Ўзбекистон президенти этиб қайта сайланиши ортидан илк афв тўғрисидаги фармони бўлганди.

$60 минг эвазига АҚШга

ДХХ Самарқанд вилоятида уч фуқарони $60 минг эвазига АҚШга ноқонуний йўл билан жўнатишга уринган шахсни қўлга олган.

Маълум қилинишича, Самарқанд тумани яшовчиси бўлган 32 яшар шахс шу мақсадда фуқароларнинг ҳар биридан $20 мингдан олаётган вақтда ушланган.

Расмий хабарда ушбу шахс учовлонни Ўзбекистон-Россия-Туркия-БАА-Буюк Британия-Мексика-АҚШ йўналишида кўзланган манзилга жўнатишга ваъда қилгани айтилади.

Ўтган йилнинг декабрь ойида ҳам ДХХ Самарқандда жами $60 минг эвазига икки фуқарони Ўзбекистон-Туркия-Боливия-Колумбия-Мексика-АҚШ йўналиши орқали АҚШга юборишни режалаштирган шахслар қўлга олинганини хабар қилган эди.

"Тошбўрон қилинган" ИИБ ходимлари

1 февраль куни Андижон вилоятида ИИБ ходимлари гўё фуқаролар томонидан тошбўрон қилинаётгани тасвирланган видео ижтимоий тармоқ бўйлаб тарқалган.

Видеода бузилган иншоотга туташ майдончадаги бир неча шахс ИИБ ходимлари турган томонга тош отаётгани кўринади.

Андижон вилоят ИИБнинг ойдинлик киритишича, воқеа 28 январь куни Балиқчи туманида содир бўлган.

Расмий изоҳда туман яшовчиси Сувоқова ташкилотига тегишли бўлган сув қазиб чиқариш иншооти ва ҳудудини ўзининг томорқасига ноқонуний қўшиб, девор билан ўраб олганлиги айтилади.

"…агар сув иншооти носоз ҳолга келса, таъмирлаш учун келган фуқароларни бу ҳудудга ўтишга тўсқинлик қилаётганлиги учун маҳалла аҳолиси билан ушбу оила ўртасида низо юзага келганлиги маълум бўлди», дейилади ИИБ изоҳида.

Билдирилишича, ўтган йилнинг май ойида суд ноқонуний қурилган бинони бузиш тўғрисида қарор чиқарган.

Бироқ ИИБ изоҳида оила бу қарорни бажаришга рўйхушлик бермай келгани ҳақида сўз боради.

Вилоят ИИБ ижрони таъминлаш учун МИБ ходимлари 28 январь куни воқеа жойига борганда, ноқонуний девор қуриб олган оила аъзолари ва маҳалла аҳли ўртасида жанжал чиқиб, ўзаро тош отилганини билдирган.

"Отилган тошлар у ерда бўлган ИИБ ёки бошқа мутасадди ташкилот ходимларга ёхуд фуқароларга қаратилмаган ва уларга тегмаган", дейилади расмий изоҳда.

$23 миллионлик электр

2021 йилда Ўзбекистон Тожикистондан умумий қиймати $23 миллиондан зиёдроқ миқдордаги электр энергияси сотиб олган.

Бу ҳақда мамлакат энергетика ва сув ресурслари вазири Далер Жума берган маълумотларга таяниб, Спутник Таджикистан хабар қилмоқда.

Маълум қилинишича, ўтган йили Ўзбекистон қўшнисидан сотиб олган электр энергияси миқдори 1 миллиард киловатт соатга етган.

Бир вақтнинг ўзида Ўзбекистон сотиб олган қувват миқдори бошқа йилларга нисбатан бироз камайгани қайд этилган.

2021 йилда Тожикистондан энг кўп электр энергияси харид қилган давлат Афғонистон бўлган - қарийб $55 миллион қийматдаги 1 миллиард киловатт соатдан кўпроқ қувват.

Раиси ўзгарган ЎзЭОАВМА

Sevimli телеканали билан боғлиқ можаро ортидан Фирдавс Абдухолиқов ЎзЭОАВМА (Ўзбекистон электрон оммавий ахборот воситалари миллий ассоциацияси) раислигидан кетган.

UzReport телеканалининг хабар беришича, 1 февраль куни бўлиб ўтган ассоциация аъзолари умумий йиғилишида Абдухолиқов ўз лавозимидан озод этилишни сўраган.

Шу куннинг ўзида унинг ўрнига Ўзбекистон Журналистика ва оммавий коммуникациялар университети ректори, Халқаро пресс-клуб раиси Шерзодхон Қудратхўжа сайланган.

ЎзЭОАВМАга 2003 йилдан раислик қилиб келган ва 2019 йилдан Кинематография агентлиги (Ўзбеккино) бош директори саналувчи Фирдавс Абдухолиқов январь ойида Sevimli телеканали атрофида юзага чиққан можаро марказига тушиб қолган.

Ўтган ойда Абдухолиқовнинг рафиқаси, қизи ва ўғли таъсисчилари бўлган телеканал эфирга узатган "Сабрия" сериалида ахлоқсиз саҳна тасвирланган видеопарча ижтимоий тармоқда тарқалиши ортидан АОКА томонидан текширув ишлари бошланган эди.

Ушбу текширув натижаларига кўра, сериалда ахлоқсиз саҳна мавжудлиги ўз тасдиғини топган.

Бундан ташқари Коррупцияга қарши курашиш агентлиги раҳбари Абдухолиқов бўлмиш Кинематография агентлиги ва Sevimli телеканали ўртасида шартномалар тузиш ва субсидиялар ажратишда манфаатлар тўқнашувига йўл қўйилгани аниқланганини ҳам хабар қилган эди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek