Ўзбекистон, расман: Шавкат Мирзиёев яна президентлик учун беллашади, номзоди тасдиқланди O‘zbekiston mintaqa dunyo yangiliklar

Шавкат Мирзиёев Ўзбекистон Либерал-демократик партиясининг номзоди этиб расман тасдиқланди. Партиянинг қурултойи тугади. Шавкат Мирзиёев 2016 йилги муддатидан илгари сайловда Ўзбекистон президенти этиб сайланган. Бу галги президент сайлови шу йилнинг 24 октябрь кунига белгиланган.

Амалдаги президент Шавкат Мирзиёев бу гал президентлик учун номзоди илгари сурилган бешта номзоддан бири бўлади.

Шавкат Мирзиёев, "Президентлик лавозимига номзоди кўрсатилганини беҳад қадрлаши"ни айтган.

Сўнгги сайловда у 88,61 фоиз овоз билан ғалаба қозонган.

Шавкат Мирзиёевнинг номзодини 7 август куни яна бир бор ЎзЛиДеП партияси илгари сурган.

Беш номзоднинг барчаси бир ҳафтанинг ичида Ўзбекистоннинг ўзида фаолиятда бўлган барча беш сиёсий партия томонидан кўрсатилган.

Бу йил ҳам президентликка номзоди таклиф этилганлар орасида четдаги бирор бир мухолиф партия вакиллари ёки мустақиллари йўқ.

Ўзбекистон президентлигига ўз номзодини кўрсатиш учун партия Адлия вазирлигида расман рўйхатдан ўтган бўлиши керак.

Ўзбекистондаги мавжуд қонунчикка мувофиқ номзодларнинг ўз партиялари қурултойи томонидан тасдиқланиши лозим, деб кўрилади.

Ўз номзодларини Марказий Сайлов Комиссиясида расман рўйхатдан ўтказиш учун яна Ўзбекистондаги жами сайловчилар умумий сонининг камида бир фоизининг имзоси билан имзо варақаларини тақдим этишлари тақозо этилади.

Мақсуда Ворисова эса, бу йилги президент сайловида бир партия номидан беллашажак ягона аёл номзод бўлади.

Унинг номзодини 7 август куни Халқ Демократик партияси илгари сурган.

Ўзбекистон президент сайловида аёл номзод илк ва сўнгги бор 2007 йилги сайловда беллашган.

Бу йилги сайловолди кампаниясига 23 июл куни расман старт берилган.

Қонунчилик

Мамлакатда амалда бўлган Сайлов кодексига мувофиқ, сиёсий партия сайлов кампанияси эълон қилинадиган кунгача тўрт ойдан кечиктирмаган муддатда ўз номзодини кўрсатиши мумкин.

Сайлов кампаниясининг ўзи эса, Ўзбекистон Марказий Сайлов комиссияси томонидан президент ваколатлари тугашидан камида уч ой олдин оммавий ахборот воситаларида эълон қилинади.

Мавжуд қонунчиликда президентликка номзодларнинг Марказий сайлов комиссияси томонидан рўйхатга олинишини айтилган.

Сайловга тайёргарлик кўриш ҳамда уни ўтказишни сайлов комиссиялари очиқ ва ошкора амалга оширилиши кўзда тутилган.

Сайловолди ташвиқотининг эса, номзодларни рўйхатга олиш учун белгиланган охирги куннинг эртасидан эътиборан бошланиши белгиланган.

Амалда бўлган Сайлов кодексига мувофиқ, Ўзбекистонда сайлов умумий, тенг, тўғридан-тўғри сайлов ҳуқуқи асосида яширин овоз бериш орқали ўтказилади.

Сайловда эркин ва яширин овоз берилади. Сайловчиларнинг хоҳиш-иродасини назорат қилишга йўл қўйилмаслиги, сайлов очиқ ва ошкора ўтказилиши айтилади.

Ўзбекистон Конституциясининг 90-моддасига мувофиқ:

Шавкат Мирзиёев ўтган йил декабрь ойида мамлакат парламентига қилган мурожаатида президент сайлови халқаро стандартларга мувофиқ ўтказилиши кераклигини таъкидлаган.

Марказий сайлов комиссияси бўлажак сайлов миллий қонунчилик ва умумэътироф этилган халқаро демократик тамойиллар асосида, юксак савияда ташкил этилишига алоҳида эътибор қаратиши лозимлигини айтган.

Президент мамлакатда ўтган сайловларда халқаро кузатувчилар томонидан берилган мақбул тавсияларни миллий қонунчилик ва амалиётга татбиқ этиш ишлари давом эттирилишини урғулаган.

Бу галги президент сайловига тайёргарлик бўйича асосий тадбирлар дастури шу йилнинг 14 апрель куни расман тасдиқланган.

Ўтган ҳафта Ўзбекистон Марказий сайлов комиссияси сайловга тайёргарлик кўриш ва уни ўтказиш учун ажратиладиган маблағнинг чекланган миқдори ҳажмини эълон қилган.

Бу маблағ 300 миллиард сўм этиб белгиланган.

Сиёсий партияларга ташвиқот ва тарғибот ишлари учун 15 миллиард сўмдан ошиқроқ, ҳар бир номзодга эса 3 миллиард сўмдан ажратилаётгани маълум бўлган.

Шу пайтгача Ўзбекистондаги "Миллий тикланиш" партияси лидери ўз номзодини президентликка илгари суриш режасида экани хабар берилган.

Бундан ташқари, мамлакатда расман рўйхатдан ўтиш ҳаракатида бўлган айрим мустақил партиялар ҳам худди шу каби истакда эканликлари кўрилган.

Кеча, 21 июнь куни эса, Адлия вазирлиги "Ҳақиқат ва тараққиёт" социал-демократик партиясини давлат рўйхатидан ўтказишни расман рад қилгани маълум бўлган.

Вазирлик бунинг сабабини талаб этилганидан қарийб 3 марта кам имзолар тақдим этилгани билан изоҳлаган ва бунга яна қатор омилларни ҳам илова қилган.

Ўзбекистондаги фаолияти 1991 йилдан буён расман қайта тикланмаган партия фаоллари 26 май куни қурултой ўтказиб, "Эрк" номидан собиқ хонанда Жаҳонгир Отажонов номзодини президент сайловида илгари суришга қарор қилгани маълум бўлган.

Аммо ўтган ой Жаҳонгир Отажоновнинг ўзи "ота-онасини ўйлаб", сиёсатдан вақтинча чекиниши ва қўшиқчилик фаолиятини давом эттиришини айтган.

У бу ҳақда ўзининг Instagram акаунтида маълум қилган.

Президент Шавкат Мирзиёев Мустақиллик санасининг 30 йиллигида қилган чиқишида, "бўлғуси сайловлар юксак демократик мезонлар асосида ўтиши ва янги Ўзбекистон халқининг ўсиб бораётган сиёсий тафаккурини, ижтимоий фаоллиги ва маданий савиясини яққол намоён этишига ишониши"ни айтган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek