Дайжест. Ўзбекистон: Карантинда нималар бўлаяпти? Бухоро помидорига тақиқ, блогер мухлисларига жазо, янги вакциналарга талаб Rossiya O'zbekiston yangiliklar

Блогер мухлисларига жавобгарлик

Тошкент милицияси россиялик блогер Субхан Мамедов билан учрашиш учун Тошкентдаги Амир Темур хиёбонига карантин чекловларига риоя этмасдан тўпланган 200 га яқин фуқаролар бўйича маълумот берди.

- Мазкур ҳолат юзасидан Тошкент шаҳар ИИББ томонидан ўтказилган дастлабки текширув натижасига кўра, 26 нафар фуқаро (шу жумладан С.Мамедов ва унинг кузатувчилари) карантин қоидаларига зид равишда жамоат жойида тиббий ниқобсиз бўлганликлари учун Ўзбекистон Республикаси МЖтКнинг 54-моддасига асосан маъмурий жавобгарликка тортилди, 83 нафар фуқарога нисбатан ҳужжатлар расмийлаштириш жараёнида, 9 нафар вояга етмаган шахсларнинг ота-онаси билан профилактик суҳбат ўтказилиб, огоҳлантирилди, - дейилади расмий маълумотда.

Хабарга кўра, пайни пайтда суриштирув ишлари давом эттирилмоқда.

Янги вакциналар келтирилади

Ўзбекистонда коронавирус билан боғлиқ жараён тобора жиддийлашиб бораяпти.

14 июль куни мамлакатда 493 нафар кишида коронавирус, 367 нафар кишида пневмония аниқланган, 4 нафар бемор вафот этган. Бундан ташқари, кеча кун давомида 367 нафар кишида пневмония аниқланган. Шу кунгача Ўзбекистонда коронавирус инфекцияси қайд этилганлар сони 117902 нафарни ташкил этмоқда.

Аҳолини вакциналаш борасида мамлакатда коронавирусга қарши тўлиқ эмланганлар сони 972 807 нафарга етган.

Мамлакатда вакцинага талабнинг юқорилиги кузатилади.

- Июль ойи охиригача яна 4 млн. доза вакцина келтирилади, дея Телеграм каналида маълумот берди Дониёр Ғаниев.

Хабарга кўра, Соғликни сақлаш вазирлигининг ахборот беришича, жорий йилнинг 20-25-июль кунлари ZF-UZ-VAC 2001 вакцинасидан қўшимча 4 млн. доза олиб келиш кўзда тутилган.

Шунингдек, август ойида Спутник V вакцинасидан 160 минг доза ҳамда август-сентябрь ойларида COVAX дастури доирасида яна 660 минг доза (AstraZeneca yoki Moderna) вакциналари олиб келиниши кутилмоқда, дейилади хабарда.

Бухоро помидори тақиқда

Россельхознадзор 2021 йил 15 июлдан бошлаб Россияга Бухоро вилоятидан помидор ва қалампир етказиб беришда вақтинчалик чекловларни жорий этди.

Ташкилот бу вақтинчалик чеклов сабабини минтақадан келтирилган помидорларда жигарранг тусдаги чизиқли мева вирусини (ТоBRF) аниқлаш билан боғлиқ, дея изоҳлаган.

Бухородан Россияга 15 июлгача жўнатилган юклар эса Россия ҳудудига фақат карантин фитосанитария экспертизасидан ўтганидан кейин киритилишига рухсат берилади.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek