Ўзбекистон: Тошкент ёпилмаслиги мумкин, ўзини отган ППХ ходими ва президент Мирзиёев қандай тарихий ташаббусларга қўл урган? O‘zbekiston koronavirus dunyo yangiliklar

Пойтахт Тошкент

Сурат манбаси, daryo.uz

  • Тошкентни ёпиш бўйича қарор бекор қилиниши кутилмоқда;
  • Президентнинг 10 та тарихий ташаббуси рўйхати тузилди;
  • Ангренда ППХ ходими ўзини отди;
  • Август ойида янги вакциналар олиб келинади;

Тошкент ёпилмайди(ми?)

Пойтахт Тошкентга кириб-чиқиш бўйича ўрнатилган чекловлар бекор қилиниши кутилмоқда.

Ўтган ҳафта 28 июндан 12 июлга қадар шаҳарга қўшни вилоятлардан автотранспорт воситаларида киришга чекловлар ўрнатилган эди.

Эндиликда, Daryo.uz нашри ИИВ маълумотига таяниб, ушбу чекловлар бекор қилиниши кутилаётгани ҳақида хабар қилмоқда.

Маълум қилинишича, 27 июнь тунида шаҳарни тўсиқлар билан ёпмаслик бўйича топшириқ келган.

Би-би-си ўқувчиларидан бири 28 июнь куни эрталаб Тошкент вилоятидан пойтахтга киришда ҳеч қандай чекловларга гувоҳ бўлмаганини маълум қилди.

Ўз навбатида, Ички ишлар вазирлиги Тошкент шаҳрига кириш-чиқиш бўйича чекловлар билан боғлиқ ўзгаришлар фақатгина расмий манбалар орқали эълон қилинишини билдирган.

Вазирлик бу борада расмий бўлмаган маълумотларни тарқатмасликни сўраган.

Жағ қисмига ўқ узган ходим

Ангрен шаҳри

Сурат манбаси, Gazeta.uz

Ангренда Пост-патруль хизмати ва жамоат тартибини сақлаш гуруҳи ходими хизмат қуроли билан ўзини отиб ўлдирган.

Skip Энг кўп ўқилган and continue reading
Энг кўп ўқилган

End of Энг кўп ўқилган

ИИВнинг хабар беришича, 34 ёшда бўлган ходим жағ қисмига қарата бир маротаба ўқ узган.

Ходим воқеа содир бўлган жой - Ангрен шаҳар ИИБ биносида вафот этган.

Хабарда ходимнинг ўз жонига қасд қилиши сабаби борасидаги дастлабки хулосалар кўрсатилмаган.

Ушбу ҳолат шахсан ички ишлар вазири назоратига олингани маълум қилинган.

Президентнинг 10 ташаббуси

Президент Шавкат Мирзиёев

Сурат манбаси, official

Президент Шавкат Мирзиёевнинг ўтган беш йиллик фаолияти давомида қўл урган тарихий аҳамиятга эга ташаббуслари рўйхати ишлаб чиқилган.

100 нафар маҳаллий ва нуфузли хорижий экспертлар томонидан ишлаб чиқилгани айтилган рўйхатдан президент ташаббусларининг 10 таси жой олган.

Экспертлар яхши қўшничилик муносабатлари ва чегараларнинг очилиши, валюта бозорининг эркинлаштирилиши, мажбурий меҳнат, хусусан, болалар меҳнатига барҳам берилиши, ОТМларга қабул квоталарининг оширилиши ва ОАВларнинг жамиятдаги ролининг оширилиши кабиларни Мирзиёев қўл урган тарихий аҳамиятдаги ташаббуслари ўлароқ танлаганлар.

Рўйхатдан, шунингдек, президент виртуал қабулхонаси ва Халқ қабулхоналарининг жорий этилиши, ҳуқуқнинг муҳофаза қилиш органлари ва қуролли кучлар тизимининг ислоҳ қилиниши, солиқ ислоҳотлари, давлат хизматлари тизимининг ривожлантирилиши, минтақавий хавфсизлик, жумладан, Афғонистонда тинчлик ўрнатиш бўйича халқаро мулоқотнинг кучайтирилиши бўйича илгари сурилган ташаббуслар ҳам жой олган.

Янги вакциналар

Вакцина

Сурат манбаси, Reuters

Август ойида Ўзбекистонга коронавирусга қарши янги вакциналар олиб келиниши кутилмоқда.

Бу ҳақда Санитария-эпидемиологик осойишталик ва жамоат саломатлиги хизмати бошлиғи ўринбосари Ботир Қурбонов маълум қилган.

Қурбоновнинг сўзларига кўра, булар Covax дастури доирасидаги AstraZeneca, Pfizer, Moderna ёки ЖССТ тасдиқлаган бошқа вакциналар бўлиши мумкин.

Мамлакатда аҳолини оммавий эмлаш ишларига 1 апрель куни старт берилган.

27 июнь ҳолатига кўра, жами 3,2 миллиондан зиёд доза вакцинадан фойдаланилгани маълум қилинган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek