Ўзбекистон Россия ва Хитой билан нимага келишган? – O’zbekiston, Rossiya, koronavirus

Коронавирус ва вакцина: Ўзбекистон Россия ва Хитой билан нимага келишган? - Бугун пойтахт Тошкентда худди шу савол кун тартибига чиққан. Масъуллар Ўзбекистон Россиядан қанча доза вакцина сўрагани ва Хитойнинг яқинда ўзларига қилган таклифи масаласига ойдинлик киритишган.

Бундан аввал тарқалган хабарларга раддия беришган, Россия билан Ўзбекистонга 35 миллион доза вакцина юбориш масаласида ҳеч бир келишув бўлмаганини айтишган.

Ўзбекистонлик мутасаддиларга кўра, бу каби хабарлар ҳақиқатдан йироқ.

Санитария эпидемиологик осойишталик агентлиги Ўта юқумли касалликлар лабораторияси бўлим мудири Иброҳим Маматқулов мазкур масалага АОКА да бўлиб ўтган бугунги брифинг чоғида тўхталган.

У Ўзбекистон Россия вакцинасидан бор-йўғи 5 минг доза сўраганини айтган.

Маматқулов худди шу чиқишининг ўзида Хитойнинг вакциналар клиник синовларининг учинчи босқичини Ўзбекистонда биргаликда амалга ошириш тўғрисидаги яқинда қилган таклифига ўз жавоблари қандай бўлганига ҳам ойдинлик киритган.

Унга кўра, бу хусусда Ўзбекистон Инновацион ривожланиш вазирлиги Хитой "Sinopharm" компаниясининг ваколатли корхонаси - "Yilin International Commerce" МЧЖ, шунингдек, "Zhifei Longcom" компанияси билан келишувлар имзолаган.

Ўзбекистон ва коронавирус вакцинаси

Россия вакцинасини сотиб олиш бўйича икки ўртада мутахассислар ва ҳукуматлар даражасида музокаралар давом этаётгани шу ой бошида маълум бўлган.

Ўзбекистон Соғлиқни сақлаш вазирининг биринчи ўринбосари, санитария-эпидемиологик осойишталик агентлиги директори Баҳодир Юсупалиев Россиянинг "Комерсантъ" нашрига берган суҳбатида бу ҳақда тўхталиб ўтган.

"Ўзбекистон, бу хусусда, балки, икки ҳафталардан кейин қандайдир тўхтамга келиши мумкин"лигини айтган.

"Ўзбекистон ҳукумати жорий пайтда вакцина олиш учун пул ажратиш масаласини кўриб чиқаётгани"ни ҳам қўшимча қилган.

Баҳодир Юсупалиев ўша суҳбатида "Ўзбекистон аҳолиси учун ўз вақтида вакцинани қўлга киритиш учун тайёр эканликлари, бунда вакцинанинг хавфсизлиги ва таъсирчанлиги ўзлари учун катта аҳамият касб этиши"ни таъкидлаб ўтган.

Соғлиқни сақлаш вазирининг биринчи ўринбосари Хитой ва бошқа давлатларда яратилаётган вакциналар клиник синовининг учинчи босқичида иштирок этиш, этмасликлари масаласи ҳам ҳукумат ва мутахассислар томонидан кўриб чиқилаётганини маълум қилганди.

Ушбу суҳбат тафсилотларидан Ўзбекистон коронавирус чўққисидан ўтиб бўлгани, мамлакатда вирус билан боғлиқ аҳвол барқарорлашгани англашилган.

Аммо ўзбекистонлик масъул бу - ўткир респиратор инфекциялар билан кечувчи куз ва қиш мавсумида коронавируснинг яна авж олиши эҳтимолини назардан соқит этишларини англатмаслигини алоҳида қайд этган.

"Худди шу боис ҳам, пандемияга қарши тайёргарлик ишларини кучайтиришда давом этишаётгани"ни билдирганди.

Россия вакцинаси

Россия вакцинаси дунёдаги расман қайддан ўтган биринчи вакцина бўлади.

Уни шу йил август ойида шахсан Россия президентининг ўзи тақдим этган.

Президент Путинга кўра, у коронавирусга қарши лозим даражада қаршилик кўрсата олган.

Вакцина барча текширувлардан ўтган, аллақачон ўзининг қизларидан бири ҳам эмланган.

Россия вакцинасининг инсонлардаги синови икки ойга ҳам етмаган.

Бу эса, дунёдаги кўплаб экспертларнинг жиддий хавотирларига сабаб бўлган.

Экспертлар синовларнинг тўлиқ натижаси ноаён қолар экан, Россия вакцинасига ишониш қийин эканини айтишган.

Россия президентининг ўз вакциналари барча синовлардан ўтганига оид сўзлари ҳам уларни бунинг тескарисига ишонтира олмаган.

Жаҳон Соғлиқни сақлаш ташкилотининг рўйхатида ҳозир синови учинчи босқичгача етиб борган олтита вакцина бор, уларнинг орасида Россияники йўқ.

Аммо шу кунларда пойтахт Москвадан Спутник V нинг учинчи босқич синовлари бошланганига оид хабарлар ҳам олинган.

Учинчи босқич синови вакцинанинг ўн минглаб одамда синаб кўрилишини англатади.

Дунёда устида дастлабки ишлар олиб борилаётган вакциналарнинг сони эса, юздан ортади.

Россиянинг вакцинаси билан боғлиқ янгилик аксарият ўзбекистонликларнинг диққат-эътиборидан четда қолмагани ҳам кўрилган.

Бунга, бир маънода, кибер фазодаги акс-садолар ҳам далолат қилган.

11 август куни ушбу янгиликка оид постлар энг кўп ўқилган, шарҳланган, муносабат билдирилган ва улашилгани бўлган.

Аммо Россия вакцинаси борасидаги фикрларнинг анчайин зиддиятли экани англашилган.

Бундан хурсанд бўлганлари қаторида, эҳтиёт бўлишга чорлаб қолган ўзбекистонликларнинг ҳам оз эмасликлари кузатилган.

Ўзбекистон минтақанинг аҳолиси энг катта давлати бўлади, фуқароларининг сони расман 34 миллиондан ортади.

Шавкат Мирзиёев куни-кеча БМТ Бош Ассамблеясида қилган чиқишида, "Ўзбекистонда КОВИД-19 қайд этилган дастлабки кунлардан бошлаб, барча саъй-ҳаракат ва ресурсларини бу хавфли касалликни жиловлаш ва энг асосийси - одамлар ҳаётини сақлаб қолишга қаратишган"ини айтганди.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek