Ўзбекистон: Иккинчи тўлқинга тайёрланяпмиз - Баҳодир Юсупалиев

Санитария-эпидемиологик осойишталик агентлиги директори ва соғлиқни сақлаш вазирининг биринчи ўринбосари Баҳодир Юсупалиев Россиянинг «Коммерсант» нашри билан суҳбатда Ўзбекистонда коронавирус пандемиясининг иккинчи тўлқинига тайёргарлик кўрилаётгани ҳақида гапирган.

«Ҳа, биз иккинчи тўлқинни кутяпмиз ва унга тайёргарлик кўряпмиз. Куз-қиш - бу бошқа инфекциялар, жумладан, грипп, ЎРВИ кўпаядиган вақт. Карантин чораларининг бари деярли юмшатилди, одамлар ўртасидаги мулоқот кўпаймоқда, мактаблар, олий таълим муассасалари, боғчалар очилмоқда», деган у.

Ўзбекистон - Россия: Рейслар қачон бошланиши энди аниқ бўлдими? - (видео)

Шунингдек, мулозим Ўзбекистон коронавирусга қарши Россияда ишлаб чиқалажак вакциналарни сотиб олиш масаласини ҳам кўриб чиқаётганини маълум қилган.

«Биз Россия вакцинасини ҳам кўриб чиқмоқдамиз. У Россияда аллақачон рўйхатдан ўтказилгани ва клиник синовларнинг учинчи босқичи давом этаётганидан хабардормиз», билдирган Юсупалиев.

Мулозимнинг сўзларига кўра, вакциналар борасидаги муҳокамалар мутахассислар ва Ўзбекистон ҳукумати даражасида давом этмоқда ҳамда икки ҳафтадан сўнг бу масалада бирор қарор қабул қилиниши мумкин.

Асосий касалланганлар - болалар

8 сентябрь куни ўтган брифингда Коронавирусга қарши кураш штаби аъзоси Барно Абдусаматова коронавирус инфекцияси ва профилактикасига оид саволларга жавоб қайтарган.

У Ўзбекистонда болалар орасида касаллик 7-18 ёшгача бўлган болаларда кўп учраётгани, умумий касалланиш кўрсаткичининг 55 фоизини болалар ташкил этишини маълум қилган.

Масжидлар сони 2073 тага етди

Дин ишлари бўйича қўмита ахборот хизмати хабар беришича, Тошкент вилояти Адлия бошқармаси томонидан "Муоз ибн Жабал" масжиди рўйхатдан ўтказилиб, унинг рўйхатдан ўтказилгани тўғрисидаги гувоҳнома диний ташкилотга топширилган.

Шу тариқа Тошкент вилоятидаги масжидлар сони 226 тага етган.

Пойтахтда янги туман ташкил этилиши мумкин

«Тошкент вилояти Зангиота, Қуйичирчиқ, Янгийўл, ва Ўртачирчиқ туманларининг, шунингдек Тошкент вилояти ва Тошкент шаҳрининг чегараларини ўзгартириш ҳамда Тошкент шаҳри таркибида Янгиҳаёт туманини ташкил этиш тўғрисида» Қонунчилик палатасининг қарори қабул қилинди.

Қарорга кўра, Тошкент вилояти Зангиота, Қуйичирчиқ, Янгийўл ва Ўртачирчиқ туманларининг, Тошкент шаҳри Сергели ва Бектемир туманларининг, шунингдек Тошкент вилояти ва Тошкент шаҳрининг чегаралари ўзгартирилган

Ўзгартирилган чегаралар ҳисобидан Тошкент шаҳри таркибида умумий ер майдони 4,419 гектардан иборат бўлган Янгиҳаёт тумани ташкил этилган.

Эндиликда, бу масала Сенат томонидан кўриб чиқилиши лозим.

Яна киракашлар мавзуси

7 сентябрь куни ўтган брифингда Молия вазири ўринбосари Дилшод Султонов киракашлар (таксичилар) нима учун ўзини-ўзи банд қилган касблар рўйхатига киритилмаётганига изоҳ берган.

"Президентимиз қарори бор, таксичилар деганда юридик шахс сифатида рўйхатдан ва ҳар кунлик тиббий ва техник кўрикдан ўтиши лозим. Бу бўйича иш олиб боряпмиз. Лекин техник нуқтаи назардан жуда қийин бўляпти. Чунки давлат рухсат бергандан кейин кафолатланган бўлиши керак.

Шунингдек, таксичиларга қўйиладиган айрим талаблар бор. Масалан, албатта, агрегатларга уланган бўлиши лозим. Яъни, сиз ким билан кетаётганингизни билишингиз керак. Қолаверса, муайян вақтда техник ва тиббий кўрикдан ўтиши лозим", деган у.

Султоновнинг сўзларига кўра, бу масала юзасидан бир-икки ой ичида Вазирлар Маҳкамасига таклиф киритилади.

«Сабаби бир томонда, ўз-ўзини банд қилган киракашлар манфаати турган бўлса, иккинчи томонда жамоатчилик манфаати турибди», қўшимча қилган у.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek