Ўзбекистон карантиндан уч рангга бўлиниб чиқади, Сардоба фожиаси қанчага тушди? Янгиликлар O'zbekiston
Сурат манбаси, qalampir.uz
Ўзбекистон карантиндан чиқишнинг 3 рангли усулини қўллайди.
Сардоба фожиаси Ўзбекистондаги коррупция ва ура-урачилик оқибати бўлиши мумкин.
Ўзбекистонда содир бўлаётган сўнгги янгиликлар:
6 май куни Ўзбекистонда аниқланган коронавирус ҳолатлари сони 2217 тага етган, беморларнинг 1547 нафари касалликдан тўлиқ соғайган.
Беморлардан 10 нафарининг аҳволи оғир, 1 нафариники эса ўта оғир экани хабар қилинган.
Қайд этилган ўлим ҳолатлари сони 10 талигича қолмоқда.
Ўзбекистон уч рангга бўлинади
5 май куни ўтган видеоселектор давомида президент Шавкат Мирзиёев карантин чораларини юмшатиш заруриятини алоҳида қайд этиб, санитария-эпедемиологик вазиятдан келиб чиққан ҳолда туман ва шаҳарлар «қизил», «сариқ» ва «яшил» ҳудудларга ажратиб чиқилишини маълум қилган.
Президентнинг сўзларига кўра, бунда касаллар сони ва даволаниш динамикасига асосланган аниқ мезонлар ҳисобга олинади.
Бундан ташқари давлат раҳбари транспорт воситалари учун берилувчи махсус рухсатнома - стикерлар бекор қилиниши ҳамда шахсий автомобиллардан фойдаланишга рухсат берилишини ҳам айтган.
"Эпидемиологик вазият яхшиланиши билан биз чекловларни бекор қилишда давом этамиз. Агарда вазият, аксинча, ёмонлашса, биз карантин чораларини қайта тиклаймиз", деган президент.
Наманган ва Самарқанд қизил
Ҳар икки вилоят ҳокимликлари ахборот хизматининг хабар беришича, Наманган ва Самарқанд вилоятларида эпидемиологик жиҳатдан юқори хавф бўлгани сабабли бу ҳудудларда карантин чоралари ҳозирча юмшатилмайди.
Вилоятлар ҳокимликлари аҳолидан карантин чораларига қатъий амал қилишни сўраган.
Айрим жамоат жойлари ҳозирча очилмайди
5 май куни ўтган видеоселекторда президент Мирзиёев карантин чоралари юмшатилиши доирасида ноозиқ-овқат дўконлари, тиббий диагностика, такси хизмати, таъмирлаш, тикувчилик, маиший техника ва пойабзал тузатиш, сартарошхоналар фаолиятига рухсат берилишини айтган.
Аммо у одамлар кўп тўпланадиган жойлар ҳозирча очилмаслигини қўшимча қилган.
"Коронавирус тўла бартараф бўлмагани сабабли, одамлар кўп тўпланадиган объектлар, жумладан, театр, концерт ва спорт заллари, тўйхоналар, жамоат транспорти бўйича чекловлар маълум муддатгача сақланиб қолади», билдирган президент.
Сардоба фожиаси қанчага тушди?
Сурат манбаси, Gazeta.uz
Сардоба фожиасининг илк зарарлари ҳисоблаб чиқилди
Фавқулодда вазиятлар вазирлиги матбуот хизматининг хабар беришича, Сардоба сув омбори тўғони ўпирилиб кетиши ортидан юзага келган тошқин зарарли ҳисоблаб чиқилган.
"Дастлабки ҳисоб-китобларга кўра, зарар етган инфратузилма объектларига 8 та болалар боғчаси, 16 та мактаб, 7 та тиббиёт муассасаси, 1 та коллеж, 7 та қабристон, 3 та масжид, 13 та республика аҳамиятидаги кўприк, 52 км узунликдаги йўл, 1 та деҳқон бозорини киритиш мумкин. Шунингдек, 99 та кўп қаватли турар-жой биносига қисман зарар етган", дейилади вазирлик матбуот хизмати хабарида.
"Кўп одамлар билан хайрлашишга мажбур бўламан..."
5 май куни ўтказилган видеоселекторда президент Шавкат Мирзиёев Бухоро ва Сирдарё воқеалари коррупция, масъулиятсизлик ва «ура-ура»чилик оқибатида юзага келгани ҳақида гапирган.
Маҳаллий Kun.uz нашрининг ёзишича, президент қурилишларнинг сифатсизлигини танқид қилган, қурилиш соҳасидаги коррупция, ўғрилик, тендерлардаги «ура-урачилик» кўламини тилга олган.
"Бухоронинг Қоракўл туманида 2020 йилда қуриб битказилган боғчаларнинг ярми қолган. Бу нима деган гап?! Мана, бизнинг қурилиш соҳасидаги сифатимиз.
Ўзим бир эмас, бир неча марта юқоридан кўрдим. Қаерда сифат бўлган бўлса, натижаси кўриниб турибди. Қаерда сифат бўлмаган бўлса, коррупция, ўғрилик, тендерларни «ура-ура» қилган ташкилотлар... бош вазир ўринбосарлари, «бажарамиз», «есть» қиламиз, деган одамлар энди ишлолмайди. Бу ишнинг якуни бошқача бўлади. Жуда катта таҳлил қиламан, мажбурман таҳлил қилишга. Кўп одамлар билан хайрлашишга мажбур бўламан…", дея президент сўзларидан иқтибос келтирган Kun.uz.
Алоқадор мавзулар:
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
