Ўзбекистон: Олий Мажлис Конституцияга зид қонунлар қабул қилган
Сурат манбаси, uza
Ўзбекистон Олий Мажлиси Қонунчилик палатаси спикерининг ўринбосари Алишер Қодиров парламентнинг Конституцияга зид қонунлар қабул қилинганини тан олган биринчи юқори мартабали расмийси бўлган.
Аввалроқ Ахборот ва оммавий коммуникациялар агентлигида блогерлар билан учрашув чоғида "Миллий Тикланиш" партияси раҳбари "конституцияга зид айрим қонунларнинг қабул қилинган ҳолатлари парламентда бор"лигини айтган.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
"Қонунга, конституциямизга зид айрим қонунларнинг қабул қилинган ҳолатлари бизнинг парламентимизда бор. Буни эътироф этиш керак. Лекин мен бир нарсани айтмоқчиман. Бу сафарги парламент ноёб, тарихий муҳитда ишини бошлади ва бошқача муҳитда ишини тугатяпти. Биз ишимизни бошлаган пайтимизда жуда кўп ҳолатларда конституцияга зид айрим нуқталарда қонунларни қабул қилиниши жараёнларида депутатларнинг жуда кўпчилигида ҳозирги журъат етишмаган. Буни эътироф этишимиз керак. Жамият ҳам айнан шунга эътироз билдирмоқда. Парламент журъатли бўлиши керак", - деган Алишер Қодиров.
Унинг фикрлари блогер Хушнудбек Худойбердиевнинг "Фермерлик тўғрисида"ги ва "Деҳқон хўжалиги тўғрисида"ги қонунларда фермер ва деҳқон хўжаликларининг мазкур Кенгашга мажбурий аъзолигининг белгиланиши Ўзбекистон Республикаси Конституциясига зидлиги юзасидан Ўзбекистон Либерал-демократик партияси раиси Ахтам Хаитовга изоҳ сўраб берган саволидан сўнг янграган.
Айни пайтда Алишер Қодиров парламентнинг Конституцияга зид қонунлар қабул қилинганини тан олиши ортидан бошқа партияларнинг танқиди остида қолган.
"Ваҳоланки, мазкур қонун ҳужжатларига киритилаётган қўшимча ва ўзгартишлардан "Миллий тикланиш" демократик партиясининг Қонунчилик палатасидаги фракциясининг хабари бўлган-ку! Энг қизиғи, нима сабабдан бу масала ўша вақтдаёқ кўтарилмади ва тегишли муносабат билдирилмади? Ҳеч бўлмаса ушбу масалани "Миллий тикланиш" демократик партияси ҳамда Ўзбекистон Либерал-демократик партияси Қонунчилик палатасида бирлашган Демократик блокда муҳокама қилиши мумкин эди-ку!" деб ёзган Олий Мажлис Қонунчилик палатаси депутати, O'zLiDeP фракцияси аъзоси Шуҳрат Бафаев.
Ўзбекистондаги айрим қонун ва норматив ҳужатларнинг асосий қонунга зидлиги мухолифат ва танқидчилар томонидан айтиб келинган.
Аммо расмийлар ҳамиша уларнинг қонунийлигини таъкидлаб келганлар.
Олдинроқ Би-би-си билан суҳбатда Ўзбекистон Адлия вазири Русланбек Давлатов 2011 йилда қабул қилинган "Тошкент шаҳри ва вилоятида прописка қилиниши лозим бўлган шахслар - Ўзбекистон Республикаси фуқаролари тоифаларининг рўйхати тўғрисида"ги қонунни ҳимоя қилганди.
У конституцион ҳуқуқ нуқтаи назаридан муаммо йўқлигини айтган.
Инсон ҳақлари ташкилотлари Ўзбекистоннинг 1998 йилда қабул қилинган "Виждон эркинлиги ва диний ташкилотлар тўғрисида"ги қонуни конституциявий ҳуқуқларини чеклашини айтиб келади.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: https://t.me/bbcuzbek
