Қозоқ миллионер мушакбозлик қилиб, Грецияда ёнғин уюштирганликда гумонланлаётганидан "ҳайратда"

Супер яхтада зиёфат вақти мушакбозлик қилиб, ўрмон ёнғини келтириб чиқарганликда гумон қилинаётган Қозоғистоннинг энг бадавлат шахсларидан бири айбловларни рад этди.

Данияр Абулгазин ўтган ой ҳашаматли кема бортида бўлган ва Греция ҳукумати томонидан ўт қўйишда иштирок этганликда айбланаётган саккиз нафар Қозоғистон фуқаросидан бири.

Тадбиркор Persephoni яхтасини ижарага олган ва Афина жанубидаги Гидра оролида 121 гектар майдонни қамраб олган ёнғин содир бўлган вақтда шу ҳудудда бўлган.

Греция 2024 йилнинг биринчи иссиқ тўлқинига дуч келган ва ўт ўчирувчилар ҳар куни бир нечта ўрмон ёнғинлари билан курашмоқда.

Аввалига расмийлар фейерверклар тўғридан-тўғри яхтадан учирилган деб таъкидлаган бўлса, аммо энди грек оммавий ахборот воситалари Persephoniдаги одамлар қайиқни қирғоққа тўхтатганидан сўнг оролдаги пляждан мушаклар учирилган бўлиши мумкинлигини айтмоқда.

Бу ҳолат Грецияда норозилик уйғотди, айниқса, яхтадагилар 21 июн кунги ёнғиндан кўп ўтмай уйларига учиб кетгани ҳақидаги хабарлар норозиликни янада кучайтирди.

Ўз баёнотида жаноб Абулгазин Persephoniни бир ҳафтага ижарага олганини ва эртаси куни уйига учиб кетганини айтди. Доимий режаси ҳам шундай бўлган.

У "бу воқеа юзасидан менга ва меҳмонларимга қарши ҳеч қандай эътирози бўлмаган Греция ҳукумати расмийлари" билан гаплашганини таъкидлаган.

У кейинроқ олдинга сурилган айбловларни эшитиб, "ҳайрон" бўлганини айтган.

Абдулгазин ёнғиндан "жуда қайғурганини" қўшимча қилган, бироқ ўзи ҳам, меҳмонлари ҳам бунга олиб келиши мумкин бўлган ҳеч нарса қилмаган.

"Биз яхтада ўрнатилган ёнғин хавфсизлиги қоидаларига қатъий риоя қилдик. На мен ва на меҳмонларим яхта экипажидан ёки бошқа учинчи шахслардан ёнғинга олиб келиши мумкин бўлган ҳаракатларни амалга оширишни сўрадик", деди у.

Шунингдек, у Греция ҳукумати билан терговда тўлиқ ҳамкорлик қилишга ваъда берди. Қозоғистон Греция билан экстрадиция шартномасига эга эмас, шунинг учун улар сўроқ қилиниши учун у ерга боришлари даргумон.

Яхта капитани ва биринчи ёрдамчиси ҳали ҳам ҳибсда, дастлаб ҳибсга олинган яна 15 экипаж аъзоси баъзи чекловлар билан гаров эвазига қўйиб юборилган.

Жаноб Абулгазин Қозоғистон нефт саноатидаги муҳим шахслардан. Унинг шахсий бойлиги 400 миллион долларга баҳоланади.

Telegram kanalimiz: https://t.me/bbcuzbek

BBC.COM/UZBEK

Telegramda bog'lanish raqami +44 7858860002