Коронавирус: Қирғизистондаги ўзбек муҳожирлари ватанига қайтмоқда

Ўш шаҳри яқинида жойлашган "Дўстлик" қирғиз-ўзбек чегарасида 100га яқин одам бир ҳафтадан бери Ўзбекистонга ўтиш илинжида туришибди.

Карантин сабаб чегаралар ёпилиши ортидан, икки давлат фақат ўз фуқароларини қабул қилаяпти. Бироқ қайси куни экани номаълум.

Ўзбекистонга қўшни Ўш Қирғизистон коронавирус ўчоғими?

Сўх: Ўзбекистон Қирғизистон билан гаплашиш учун қўлида кузир қолмаганми?

Коронавирус: Қирғизистонда масжидлар очилди, вирусга чалинганлар яна кўпаймоқда

Уч ой аввал Бишкекка келган Риштонлик Алишер Каримов қурилиш ишларида уста бўлиб ишлаган. У ҳам уч кундан бери "Дўстлик" чегараси ёнида тунамоқда.

"Бишкекка келганимиздан кейин карантин эълон қилинди. Ўша ерда қолиб кетдик. Орада хонадонларда ишлар бўлса қилиб юрдик. Яхши инсонлар бор, иш кўрсатишди, пулимизни беришди. Тозаликка риоя қилиб, кўчага чиқмасдан, карантин қоидаларига риоя қилган холда ишладик. Чегарадан одам ўтказаяпти деганди, келсак тўплаб, карантинда жойлар бўшаса ўтказади дейишди. Кутаяпмиз", дейди суҳбатдош.

Касби дурадгор бўлган Алишер ака, бунчага бир неча марта Қирғизистонга келиб, икки ойлик регистрация билан ишлаб кетган. Унгача Россияга ҳам бориб ишлаган.

"Россияга борганмиз. Россия узоқ, у ерда ишлаб топадиган пулни, Қирғизистонда ҳам топса бўлади. Аста-секин Ўзбекистонда ҳам бу пулни топса бўладиган бўлиб қолди. Биз Бишкекда ишлаганимизда, ишларимиз одамларга ёққани учун, кейинги сафар ҳам ўзлари телефон орқали чақиришади ", дейди Фарғоналик Алишер ака.

У Ўзбекистонга қайтгач 14 кунлик карантиндан сўнг, бу йил Фарғонанинг ўзида ишлашини айтади.

Сўнги йиллари Ўзбекистондан Қирғизистонга келиб ишлаётганлар сони ортган. Эркаклар асосан қурилиш ишларида, чойхона, кафеларда новвой ва ошпаз бўлиб ишлашади. Аёллар эса далаларда кундалик ҳақ олиб ишлашади.

Ошпаз Муротали ака чегара яқинида Ўзбекистонга ўтиш илижида турганларга ош пишириб бериш учун масаллиқ тайёрламоқда. У Бишкекдаги кафеларда ошпаз бўлиб ишлайди. Жорий йилнинг январь ойида Қирғизистонга келганида, карантин сабаб ватанига қайтаолмаган.

"Мен бу ердаги 50 та одамга Қўқонча ош қилиб бермоқчиман. Бишкекда карантин бўлиб, кафелар ёпилди ва ишлар бўлмади, 3-4 ой уйда ётдик. 15 кундан бери кафелар очилиб, ишлар юришиб қолди. Лекин ватанга қайтмоқчиман. Ўзбекистонда ҳам бу ерда топган пулни топаман, фақат у ерда топганим, кундалик ҳаражатларга сарфланиб кетади. Қирғизистонда эса ишлаб, пулни тўплайман", дейди Фарғонанинг Беш-Ариқ туманидан бўлган Муротали ака.

У ҳам Ўзбекистонга қайтгач, пандемия вазиятга қараб, Қирғизистонга қайтиб ишлаш ниятида.

Қирғизистон коронавирус сабаб ўз ҳудудида қолиб кетган Ўзбекистонликлар учун жорий йилнинг 1 июлигача юришларига рухсат берган.

Тошкентлик Румия Раҳимова жорий йилнинг 5 февралида Бишкекка, дугонасининг тўйига келган. У Қирғизистонда юриш учун икки ойга регистрация қилдирган. Бироқ март ойи бошида коронавирус хавфи сабаб чегаралар ёпилиши ортидан бугунги кунгача Ўзбекистонга қайта олмаган. Тўрт ойдан ортиқ танишлари уйида яшаган аёл "Дўстлик" чегарасига бир ҳафта аввал келган.

"Йўлга чиқишдан аввал Ўзбекистоннинг Бишкекдаги элчихонасига қўнғироқ қилиб, чегара қачон очилиши тўғрисида сўрадим. Улар 2 кундан кейин очилади, чегарага бораверсангизлар бўлади деган. Бироқ келганимизга олти кун бўлди, ҳануз чегарадан ўтаолмаяпмиз. Эрта, индинга дейишаяпти. Чегара яқинидаги кафеда овқатланиб, шу ерда ётаяпмиз, аёллар. Тўрт ҳомиладор аёл бор. Бир аёл ёш боласи билан. Бошқа ерга боролмаймиз. Бу ерда бизга ёрдам беришаяпти. Бироқ ювинишга имкон йўқ. Кунда ҳаражат қилиб, ҳозир ёнимда 1,5 доллар қолди. Бизни тезроқ чегарадан ўтказиб юборишсин, илтимос" дейди икки фарзанднинг онаси, отаси касал эканини айтган суҳбатдош.

Румия опа ҳар куни элчихонага қўнғироқ қилаётганини, бироқ аниқ жавоб ололмаётганини айтади.

"Қўнғироқ қилсам, бир соатдан кейин деди. Бир соатдан кейин қилсам, яна бир соат деди. Беш марта қўнғироқ қилдим. Сўнгисида гўшакни кўтаришмади. Сизни ишингиз қараляпти, ҳокимият ҳал қилади деган бўйича жимлик", дея сўзлайди Тошкентдаги мехмонхонада ишлайдиган аёл.

Чегарадаги келинлар

Бунгача "Бибиси" айни шу чегарадан ўтолмай сарсон бўлаётган келинлар аҳволини ёритган эди.

Ўзбекистонга келин бўлиб тушганига 20 йилдан ошган бўлса ҳам бу давлат фуқаролигини ололмаган қирғизистонлик келинлар ҳар икки ойда чегарадан ўтиб, паспортларига "кирди-чиқди" муҳрини бостиришга мажбур бўлади.

Улар учун коронавирус ортидан эълон қилинган карантин ҳам қўшимча муаммоларни пайдо қилган.

Дунё бўйлаб кенг тарқалаётган коронавирус сабаб, март ойининг ўрталарида Қирғизистон билан Ўзбекистон чегаралари ҳам ёпилган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek