Қирғизистон: Коронавирус юқтирганлар 12 нафарга етди, 3 қишлоқда фавқулодда ҳолат эълон қилинди
- Author, Шохруҳ Соипов
- Role, Ўш, Қирғизистон
Сўнги уч кун ичида коронавирусга чалинганлар республиканинг жанубий вилоятлари Ўш, Жалолобод ва Боткен вилоятлари яшовчилари орасида қайд этилган. 3 қишлоқда фавқулодда ҳолат эълон қилиниб, у ерга кириш ва чиқиш ёпилди.
Қирғизистон Соғлиқни сақлаш вазир муовини Тўлў Исақов, Бишкекдаги матбуот анжуманида сўнги бир суткада яна олти кишида коронавирус аниқланганини маълум қилди.
"Улардан беш нафари Сузоқ туманида, биттаси эса Боткен вилояти яшовчиси. Улар ҳозир карантинда, шифокорлар назоратида даволанишяпти. Улар билан алоқада бўлганлар аниқланмоқда ", — дейди вазир ўринбосари.
Тўлў Исоқовнинг сўзларига кўра, янги коронавирусга чалинганлар ҳам Умра зиёратидан қайтган, 45-70 ёшлар орасидаги одамлар.
Маълумотларга кўра, коронавирусга чалинган баъзи беморлар қандли диабет дардидан азоб чекиши аниқланган. Бу эса ўз навбатида, юрак қон-томир касалликлари ва гипертензия билан бирга оғриш ва коронавирусни юқтириб олиш хавфини оширади.
Расмий 12 ёшдаги бола коронавирусга чалинган деган маълумотни рад этди.
Қирғизистонда коронавирус билан боғлиқ илк уч ҳолат 18-март куни тасдиқланган.
Улар 12-март куни Шаржа-Бишкек йўналиши бўйича Умра зиёратидан келган, Жалолободнинг Сузоқ тумани яшовчилари экани айтилган.
Вирусга чалинганлар билан Умра зиёратидан қайтган 142 одамнинг барчаси тиббий кузатувга олинган, шифохонага ётқизилган.
Расмий маълумотларга кўра, ҳозирда республика бўйича 649 одам карантинда ётибди. Умрадан келганлар билан алоқада бўлган 2330 одам шифокорлар назоратида.
Ҳозирда Боткен вилояти бўйича 35 одам карантинга ётқизилган. Тўрт одам коронавирусни юқтириб олиши мумкин деб жиддий гумон билан алоҳида изоляцияга олинган, шифокорлар текширмоқда.
Бугун, Боткен вилояти яшовчисида ҳам коронавирус аниқланганлиги сабаб, Самарқандек, Оқ-Сой, Оқ-Тақир қишлоқларида фавқулодда ҳолат эълон қилинган.Қишлоқнинг кириш ва чиқишлари тўсилган. Бу қишлоқда 29 мингга яқин аҳоли яшайди.
Жума куни уч кишининг вирусга чалингани аниқланган Ўш вилоятининг Новқат туманида ҳам фавқулодда ҳолат жорий этилган эди.
Икки кун аввал коронавирус аниқланган Жалолободнинг Сузоқ туманининг Благовешенка, Ўрта Осиё ва Бўстон қишлоқларида фавқулодда ҳолат эълон қилинган.
Ўш шаҳрида 20 мартдан бошлаб, жамоат транспорти тўхтатилган. Шунингдек, дорихона ва озиқ овқат дўконларидан ташқари барча муассаса ва бозорлар ҳам ёпилган.
Бугун, президент Сўўрўнбай Жээнбеков раҳбарлигида ўтган Қирғизистон хавфсизлик кенгаши, коронавирус билан боғлиқ вазиятни муҳокама қилиб, йиғин якунида бош вазирга республикада 22-мартдан бошлаб бир ойлик фавқулодда ҳолат эълон қилиш таклифини берган.
BBCUZBEK.COM билан Telegram орқали +44 7858860002 номери билан боғланинг.
Telegram каналимиз: @bbcuzbek
