АҚШ Браун Университетидаги отишмадан сўнг гринкарта лотерея дастурини тўхтатди
Сурат манбаси, Reuters
- Author, София Феррейра Сантос
- Role, BBC Янгиликлар бўлими
- Ўқилиш вақти: 3 дақ
Президент Доналд Трамп ўтган ҳафта Браун Университетида содир бўлган оммавий отишмадан сўнг АҚШ гринкарта лотерея дастурини тўхтатди.
Гумондор шахс - португалиялик эркак пайшанба куни ўлик ҳолда топилган. У 2017 йилда иммиграцион визалар учун мўлжалланган "diversity lottery" (DV1) дастури орқали мамлакатга кирган ва гринкарта олган.
Ички хавфсизлик котиби Кристи Ноэм Трамп кўрсатмасига биноан визалар дастурини "бу ҳалокатли дастур туфайли бошқа америкаликлар зарар кўрмаслиги учун" тўхтатганини айтди.
АҚШ расмийлари гумондор - 48 ёшли Клаудио Невес Валенте шу ҳафта бошида Массачусетс Технология Институтининг португалиялик профессори Нуно Лоуреирўни ҳам ўлдирган бўлиши мумкинлигини билдирди.
Айни мақолада Google YouTube томонидан тақдим қилинган контент мавжуд. Биз бу контент юкланмасидан аввал сизнинг розилигингизни сўраймиз, чунки улар куки ва бошқа технологиялардан фойдаланган бўлиши мумкин. Сиз Google YouTube ҳаволасида кукиларга доир ва шахсий маълумотларга оид қоидалар ҳақида аввал ўқиб, кейин қабул қилишга рози бўлишингиз мумкин. Кўриш учун “қабул қилиш ва давом этиш”ни танланг.
Охири YouTube пост
Дастур ҳар йили АҚШга иммиграция даражаси паст бўлган мамлакатлардан келган аризалар орасида қуръа орқали 50 мингтагача визани тақдим этади.
Ижтимоий тармоқларда ёзганида, Ноэм Трамп 2017 йилда Нью-Йорк шаҳрида содир бўлган юк машинаси билан одамларни уриб кетиш ҳужумида саккиз киши ҳалок бўлгач, ушбу дастурга барҳам бериш учун аввал ҳам курашганини эслатди.
Ноэмнинг айтишича, ҳужумни амалга оширган, ҳозир умрбод қамоқ жазосини ўтаётган, "Исломий давлат" тарафдори бўлган Ўзбекистонлик Сайфулло Саипов АҚШга DV1 дастури орқали кирган.
Ноэм бу фикрларни Невес Валенте Ню-Хемпшир штатидаги Салем шаҳрида сақлаш омборида ўлик ҳолда топилганидан бир неча соат ўтиб билдирди. Полиция уни ўз жонига қасд қилган деб ҳисобламоқда.
Полиция маълум қилишича, видео ёзувлар ва фуқаролардан келган хабарлар терговчиларни автомобил ижараси пунктига олиб борган. У ерда гумондорнинг исми аниқланган ва олти кун давом этган, бир неча штатни қамраб олган қидирувдан сўнг унинг шахси тасдиқлашган.
У ён сумка ва иккита ўқотар қурол билан ўлик ҳолда топилган. Яқин атрофдаги автомобилдан топилган далиллар Род-Айленд бош прокурори Питер Неронҳа маълум қилишича, Провиденсдаги Браун Университетида содир бўлган отишма жойига мос келган.
Сурат манбаси, Reuters
Браун Университети президенти Кристина Пахоннинг айтишича, Невес Валенте 2000 йил кузидан кейинги баҳоргача Ivy League университетида ўқиган ва физика бўйича PhD даражаси учун таҳсил олган.
Унинг сўзларига кўра, Валенте ҳозирда Браун билан "ҳеч қандай фаол алоқага эга эмас".
Расмийлар гумондор душанба куни Массачусетс Технология Институтининг профессори, 47 ёшли Нуно Ф Гомес Лоуреирўни Провиденсдан тахминан 80 км узоқликдаги Бруклиндаги уйида отиб ўлдирган бўлиши мумкинлигини билдирди.
Полиция айтишича, иккала шахс ҳам 1990 йилларнинг охирида Португалиядаги бир хил университетда таҳсил олган.
Расмийлар ишлар гумондорнинг автомобили CCTV ёзувлари ва Браун Университетидаги гувоҳ орқали аниқлангач боғланганини маълум қилди.
Худди шу автомобил икки кундан кейин профессор отиб ўлдирилган жой яқинида ҳам кўрилган.
Ҳокимиятлар ҳозирча ҳар иккала ҳужум учун эҳтимолий сабабни ошкор қилмаган.
13 декабрь куни Браун Университетининг муҳандислик биносига қуролланган шахс бостириб кириб, якуний имтиҳонлар пайтида ўқ узиши натижасида икки талаба ҳалок бўлди, яна тўққиз киши яраланди.
Ҳалок бўлганлар - 19 ёшли Элла Кук, Алабамадан келган иккинчи курс талабаси, ва 18 ёшли Муҳаммад Азиз Умурзоков, университетда эндигина ўқишни бошлаган ўзбек-америкалик талаба.
