طیب اردگان پانچ نومبر کو امریکی صدر بش سے بھی ملاقات کر رہے ہیں

ان کا کہنا تھا کہ یورپی یونین میں شامل ممالک نہ تو ’پی کے کے‘ کے اراکین کو گرفتار کر رہے ہیں اور نہ ہی انہیں ملک بدر کیا جا رہا ہے۔

طیب اردگان نے یہ بات ’پی کے کے‘ کے علیحدگی پسندوں کی جانب سے ترک علاقے میں کی جانے والی کارروائیوں پر قابو پانے کے حوالے سے عراق اور ترکی کے بے نتیجہ مذاکرت کے اختتام کے بعد کہی۔

ترکی پہلے ہی کہہ چکا ہے کہ وہ اب مزید کوئی حملہ برداشت نہیں کرے گا اور اس نے شمالی عراقی سرحد پر فوجیں بھی جمع کرنا شروع کر دی ہیں۔

رجب طیب اردگان نے ’پی کے کے‘ کے حوالے سے یورپی یونین کے ممالک کے خلوص پر بھی سوال اٹھایا۔ ان کا کہنا تھا کہ’ کسی یورپی ملک نے اب تک پی کے کے کو دہشتگرد تنظیم قرار دینے کے باوجود اس کے ممبران کو ترکی کے حوالے نہیں کیا ہے‘۔

خبر رساں ادارے اے ایف پی کے مطابق طیب اردگان نے کسی ملک کا نام تو نہیں لیا تاہم آسٹریا کی جانب سے ’پی کے کے‘ کے ایک سینئر ممبر کوگرفتار نہ کرنے کے واقعے کی جانب اشارہ ضرور کیا۔

	ترکی شمالی عراقی سرحد پر فوج جمع کر رہا ہے

یاد رہے کہ عراق اور ترکی کے درمیان کرد تنازعے کے حوالے سے ہونے والے مذاکرات جمعہ کو بغیر کسی نتیجے کے ختم ہوگئے تھے۔ بغداد میں بی بی سی کے نمائندے جم میور کا کہنا ہے کہ بات چیت میں شامل عراقی وفد کا کہنا ہے ان کی جانب سے دی جانے والی تجاویز قابل عمل اور حقیقت پسندانہ ہیں۔

بی بی سی کے نامہ نگاروں کے مطابق ان تجاویز میں سرحد کی نگرانی کے لیے کثیر القومی فوج کی تعیناتی، عراقی سرحدی چوکیوں پر دوبارہ تعیناتی اور پی کے کے کے مالی ذرائع پر پابندی لگانے جیسی باتیں شامل ہیں۔

ادھر ترکی کا کہنا ہے کہ عراقی تجاویز پر عمل میں وقت لگ سکتا ہے۔ ترکی چاہتا ہے کہ شمالی عراق کی پہاڑیوں میں قائم پی کے کے کیمپ فوری طور پر بند کیے جائیں اور ان کی قیادت کو ترکی کے حوالے کیا جائے۔

ترکی کے وزیراعظم رجب طیب اردگان اس حوالے سے پانچ نومبر کو امریکی صدر جارج بش سے بھی ملاقات کرنے والے ہیں اور ایک سینیئر ترک جنرل کے مطابق عراقی علاقے میں ترک فوج کی کارروائی اس ملاقات سے قبل ممکن نہیں ۔