 | | | | | | | |||||||||||||||||||||||||||||||||||
| | ||||||||||||||||||||||||||||||||||||||||
|
ترک سفیر کو واپسی کی ہدایت | ||||||||||||||||||||||||||||||||||||||||
ترکی نے امریکہ کے ایوان نمائندگان کی ایک کمیٹی کی جانب سے پہلی جنگِ عظیم میں سلطنت عثمانیہ کے ہاتھوں آرمینیائی باشندوں کے قتل عام کو نسل کُشی قرار دیے جانے کے بعد امریکہ میں اپنے سفیر کو مشاورت کے لیے واپس بلانے کا اعلان کیا ہے۔ ترکی کا کہنا ہے کہ وہ مانتا ہے کہ سنہ 1915 سے 1917 تک بڑی تعداد میں آرمینیائی باشندوں کو قتل کیا گیا لیکن اس عمل کو نسل کشی قرار نہیں دیا جا سکتا۔ ترک وزارتِ خارجہ کے مطابق امریکہ میں ترکی کے سفیر’ہفتے دس دن‘ کے لیے وطن واپس آ رہے ہیں۔ وزارتِ خارجہ کے ترجمان لیونٹ بلمین کا کہنا تھا کہ’ہم اپنے سفیر کو مستقل بنیادوں پر واپس نہیں بلا رہے اور ہم نے انہیں مشاورت کے لیے ترکی واپس آنے کو کہا ہے‘۔ امور خارجہ کی کمیٹی کے ارکان نے آرمینیائی باشندوں کے قتل عام کو نسل کُشی قرار دیے جانے کی قرارداد بدھ کو اکیس کے مقابلے میں ستائیس ووٹوں سے منظور کی تھی جس پر ترکی کے صدر عبداللہ گل نے کہا ہے کہ ماضی کی کمیٹیوں کی طرح اس کمیٹی کا یہ ناقابلِ قبول فیصلہ ترک عوام کے مزدیک کسی وقعت کا حامل نہیں۔ یہ قرارداد بش انتظامیہ کےاظہار تشویش کے باوجود منظور ہوئی جس میں انہوں نے کہا تھا کہ اس قرارداد کی منظوری کی وجہ سے ترکی کے ساتھ تعلقات خراب ہو سکتے ہیں جو عراق اور افغانستان میں جاری امریکی کوششوں میں ایک اہم اتحادی ہے۔ بدھ کو ایوان نمائندگان میں کارروائی کے آغاز پر آرمینیا کے سب سے بڑے پادری کیریکن دوئم نے دعا کروائی۔ ان کا کہنا تھا کہ’ہم نسل کُشی کے شکار آرمینیائی باشندوں کو آج ایک بوجھل تاریخی حقیقت کے تناظر میں یاد کرتے ہیں جس کے اثرات نسل کشی کی کئی صورتوں میں آج بھی پوری دنیا محسوس کر رہی ہے‘۔ اس سے پہلے امریکہ کی وزیر خارجہ کونڈلیزا رائس نے کہا تھا کہ اگر یہ قرارداد منظور ہوگئی تو اس کے اثرات عراق اور افغانستان میں کی جانے والی امریکی کوششوں پر اثر انداز ہوں گے کیونکہ ترکی کا کردار ان کوششوں میں خاصا اہم ہے۔ اس معاملے پر خود صدر بش نے بھی تشویش کا اظہار کیا تھا۔ ان کا کہنا تھا کہ’ہم سب کو آرمینائی باشندوں پر انیس سو پندرہ میں شروع ہونے والے قتل عام پر شدید افسوس ہے لیکن یہ قرار داد اُس تاریخی قتلِ عام کا درست ردعمل نہیں ہے اور اِس کی منظوری نیٹو کے ایک اہم اتحادی کے ساتھ ہمارے تعلقات اور دہشت گردی کے خلاف جنگ میں نقصان کا باعث ہوگی‘۔ یاد رہے کہ ماضی میں ایوان نمائندگان کی کمیٹیوں نے اِس قرارداد کو ووٹنگ کے لیے منظور تو کیا تھا لیکن ریپبلک ارکان نے اسے ہمیشہ کانگریس میں پیش ہونے سے روکے رکھا۔ لیکن اب ڈیموکریٹ اراکین کے پاس کنٹرول ہونے کی وجہ سے اس قرارداد پر ووٹنگ ہو سکتی ہے۔ |  اسی بارے میں  ترکی آرمینیائیوں کے قتل عام کو مانے‘ 24 April, 2005 | آس پاس ’آرمینیا میں قتل عام نہیں کیا‘09 March, 2005 | آس پاس | ||||||||||||||||||||||||||||||||||||||||
| |||||||||||||||||||||||||||||||||||||||||
| |||||||||||||||||||||||||||||||||||||||||
