ڈیموکریٹس عراق سے امریکی فوج کے انخلاء پر زور دے رہے ہیں

سینیٹ نے اڑتالیس کے مقابلے میں پچاس ووٹوں کے ساتھ ریپبلیکنز کی طرف سے لائی گئی اس ترمیم کو بھی مسترد کر دیا جس کے تحت دفاعی اخراجات کو (عراق سے) فوج کے انخلاء کی شق سے علیحدہ کرنا مقصود تھا۔

ترمیم مسترد ہونے کو ڈیموکریٹس کی فتح اور صدر جارج بش کے لیے دھچکا قرار دیا جا رہا ہے۔ تاہم صدر بش نے اعلان کر رکھا ہے کہ وہ ڈیموکریٹس کا (فوج کے انخلاء سے متعلق) بل منظور ہونے کی صورت میں ویٹو کر دینگے۔

گزشتہ ہفتے امریکی ایوان نمائندگان نے بھی فوجی اخراجات کو 212 کے مقابلے میں 218 ووٹوں سے اکتیس اگست 2008 تک عراق سے فوج کے انخلاء سے مشروط کیا تھا۔

بش انتظامیہ عراق اور افغانستان میں موجود امریکی فوجوں کے لیے 120 ارب ڈالر کے اخراجات کی منظوری چاہتی ہے

فوجی اخراجات کے اس مشروط بل پر سینیٹ میں حتمی رائے شماری اس ہفتے کے آخر میں کی جائے گی اور اس کے منظوری کے لیے ایک درجن کے قریب ریپبلیکنز کی حمایت درکار ہوگی۔

بش انتظامیہ عراق اور افغانستان میں موجود امریکی فوجوں کے لیے 120 ارب ڈالر کے اخراجات کی منظوری چاہتی ہے۔

عراق سے فوج کے انخلاء سے متعلق بِل کو ڈیموکریٹس دو ہفتے قبل سینیٹ سے منظور کرانے میں ناکام رہے تھے، لیکن اس دفعہ دو مزید سینیٹروں کی حمایت حاصل ہونے پر ان کے ووٹوں کی تعداد 50 ہوگئی۔

سینیٹ میں ڈیموکریٹس کے رہنماء ہیری ریڈ کا کہنا تھا کہ یہ صدر بش کے لیے ایک واضح پیغام ہے۔ ’اس رائے شماری سے سینیٹ امریکی فوجیوں کو مطلوبہ وسائل فراہم کرنے کے ساتھ ساتھ عراق میں وہ حکمت عملی بھی دے رہی ہے جو ان کی قربانیوں کے شایان شان ہے‘۔

	ڈانا پیرنو نے کہا کہ صدر بش بل کو ویٹو کر دینگے

ان کا کہنا تھا ’صدر کو اپنی حمکت عملی تبدیل کرنی چاہیے اور یہ قانون سازی انہیں ایسا کرنے کا موقع دے رہی ہے‘۔

لیکن وائٹ ہاؤس کی طرف سے رعایت کا کوئی امکان نہیں۔

صدر بش کی ڈپٹی پریس سیکرٹری ڈانا پیرنو نے ایک بیان میں کہا ہے کہ انہیں (صدر بش) مایوسی ہوئی ہے کہ سینیٹ اس بل کو منظور کر رہی ہے جسے وہ ویٹو کر دینگے اور نتیجتاً اس کے قانون بننے کے کوئی امکانات نہیں ہیں۔