نثار کھوکھر بی بی سی اردو ڈاٹ کام ڈیرہ الہ یار، بلوچستان

	اپنے ہی ملک میں مہاجر اور پناہ گزین بننے پر مجبور ہونے والے بلوچ جھونپڑیوں پر مشتمل بستیاں بنا کر شدید غربت و بے بسی کی زندگی بسر کر رہے ہیں

بلوچستان میں جاری کشیدگی نے خود اپنے ہی ملک کے دوسرے حصے سندھ اور اپنے ہی صوبے کے دوسرے علاقوں میں مہاجر اور پناہ گزینوں کی زندگی گزارنے پر مجبور ایک نئی آبادی کو جنم دیا ہے۔ یہ لوگ سندھ اور بلوچستان کے مختلف اضلاع میں جھونپڑیوں پر مشتمل بستیاں بنا کر شدید غربت و بے بسی کی زندگی بسر کر رہے ہیں

ضمیمہ: بلوچستان باغی کیوں؟

عبدالرزاق مری ڈیرہ الہیار کے قریب ان نئے مہاجرین کی بنائی گئی جھونپڑیوں میں سے ایک جھونپڑی میں رہتے ہیں۔

رزاق مری کاہان اپنے خاندان کا قافلہ اونٹوں پر لے کر تب روانہ ہوئے جب بقول ان کے کاہان اور کوہلو میں جنگ چھڑ گئی۔ ہر طرف جیٹ جہاز بم پھینکنے لگے۔

	پناہ گزینوں کا کہنا ہے کہ وہ تبب نکلے جب کاہان اور کوہلو میں جنگ چھڑ گئی اور ہر طرف جیٹ جہاز بم پھینکنے لگے

رزاق مری ڈیرہ الہیار میں روزانہ کی اجرت پر مزدوری کرتے تھے جسے دہاڑی کا نام دیا جاتا ہے۔ ان کا کہنا ہے کہ دہاڑی کا کیا ہے کبھی ملتی ہے کبھی نہیں ملتی۔

رزاق اور ان کے خاندان کو موجودہ پناہ گاہ تک رسائی میں تین دن لگ گئے تھے۔

علی خان مری بھی ایک ایسے ہی بےگھر ہیں۔ جب وہ جنگ سے تنگ ہو کر کاہان کو ہلو سے نکلے تو ان کے پاس کوئی سواری نہیں تھی انہیں اپنا سفر پیدل ہی کیا اور اس میں انہیں آٹھ سے دس دن لگ گئے۔

علی خان اپنی جھونپڑی میں اتنا بیزار بیٹھا تھا۔اس شام سب سے آخر میں شریک گفتگو ہو سکا۔ انہیں اپنے علاقے کا دکھ تھا روزگار کا کوئی اور طریقہ نہ آنے کی فکر۔

علی خان کا کہنا تھا کہ جنگ نہ ہوتی تو ہم اپنے علاقے میں بہت خوش تھے۔ ڈیرہ الہیار میں جو مزدوری ملتی ہے وہ کاشتکاری سے منسلک ہے اور وہ کاشتکاری کے بارے میں کچھ نہیں جانتے۔

علی خان بات کرتے ہوئے رونے کی حد تک جذباتی ہو گئے۔ انہوں نے کہا حالات بہت خراب ہیں۔ بیماری کی صورت میں علاج کے لیے دربدر ہونا پڑتا ہے۔

اسی دوران محمد صدیق مری بھی آگئے۔ انہیں شکایت تھی کہ امدادی سامان ان کے خاندان کو نہیں مل رہا۔ انہوں نے سیاست دانوں کی سی روانی سے کہا ’ہمیں کیوں بھوکا ما را جا رہا ہے۔ کیا ہم پاکستانی نہیں‘۔

کوہلو اور کاہان سے نقل مکانی کرنے والے جن مری قبائل کے لوگوں سے ہماری بات چیت ہو سکی انہیں کچھ پتہ نہیں تھا کہ وہ کب اپنے علاقوں میں واپس جا سکیں گے۔ انہوں نے اپنی واپسی کو حالات کی بہتری سے جوڑ رکھا ہے۔

	ان پناہ گزینوں کا کہنا ہے کہ جنگ نہ ہوتی تو ہم اپنے علاقے میں بہت خوش تھے

بہادر شاہ نے بتا یا کہ ابھی ڈیرہ بگٹی واپس جانے کا وقت نہیں آیا۔ ہم ڈیرہ بگٹی واپس جانا چاہتے ہیں مگر ذہنوں میں ایک خوف موجود ہے کہ ابھی کچھ نہ کچھ ہونے والا ہے۔

بہادر شاہ بلوچستان کے نئے مہاجرین میں اس لیے منفرد ہیں کہ انہیں تلاش روزگار کی فکر نہیں۔ وہ سید اور پیر ہیں اور ان کا گزارہ مریدوں پر ہے۔

بلوچستان کے منفرد مہاجرین میں سب سے نمایاں ذکر نواب اکبر بگٹی کے پوتے شاہ زین بگٹی کا کیا جاتا ہے۔

یہ وہی شاہ زین ہیں جن کی کراچی سےگرفتاری کی اطلاع ان کے والد طلال بگٹی نے چند روز قبل کوئٹہ میں پریس کانفرنس کے دوان میڈیا کو دی۔

ڈیرہ الہیار میں لوگوں کا کہنا تھا کہ نواب اکبر بگٹی کی ہلاکت کے بعد شاہ زین نے پٹ فیڈر کے پنجابی ڈپ کے علاقے میں واقع کوٹ بگٹی میں مستقل کیمپ قائم کردیا تھا۔

	شدید ترین گرمی کے موسم میں ان کے پاس صرف یہی جھونپڑیاں ہیں جو سایا بھی دیتی ہیں اور پناہ بھی

کاہان کے متاثر رستم مری کا کہنا تھا کہ صرف جعفرآباد ضلع کے اوستہ محمد، صحبت پور، ڈیرہ الہیار اور دیگر شہروں میں پندرہ سے بیس ہزار متاثرین موجود ہیں۔جن کا کوئی پرسان حال نہیں۔
رستم مری ایک سیاسی سماجی کارکن ہیں اور وہ بالاچ مری کے الیکشن میں کورنگ امیدوار بھی تھے۔
رستم مری کا کہنا تھا کہ متاثرین کی مدد کے لیے حکومت نے ایدھی رضاکاروں کو کام کرنے سے منع کردیا ہے۔ جب کہ دوسری این جی اوز کو بھی ڈرایا دھمکایا جا رہا ہے۔

انہوں نے بتایا کہ کاہان اور کوہلو کے علاقوں کا اب بھی محاصرہ جاری ہے۔ڈیرہ بگٹی جانے والی پبلک ٹرانسپورٹ میں مری قبیلے کے لوگوں کو سوار ہونے سے منع کیا جا رہا ہے۔ کیونکہ ڈاٹسن کو ڈیرہ بگٹی سے آگے نہیں جانے دیا جاتا۔
بلوچستان آپریشن کے متاثرین سندھ کے خیرپور میرس، سکھر، کندہ کوٹ، جیکب آباد، دادو،گھوٹکی، نوابشاہ اور سمیت کئی اضلاع میں بھی پناہ گزین ہیں۔

شدید گرمی کے ان دنوں میں یہ پناہ گزین گھاس پھونس کی جھونپڑیاں میں رہ رہے ہیں۔

ان متاثرین میں ایک سردار گوبند سنگھ بھی ہیں جو ڈیرہ بگٹی پرگزشتہ مارچ میں ہونے والی بمباری کے بعد ہجرت پر مجبور ہوئے۔

	ان پناہ گزینوں کے مطابق کوئی اپنے بیوی بچوں کے ساتھ ڈیرہ بگٹی نہیں جا سکتا کیونکہ ابھی حالا ت ایسے نہیں ہیں۔

سردار گوبند سنگھ نے کشمور شہر میں مطب کھول رکھا ہے۔ ان کا ڈیرہ بگٹی میں بھی اس طرح کا کاروبار تھا۔ وہ اپنے تین بھائیوں کی خاندانوں کے سولہ ارکان کے ساتھ کشمور پہنچے تھے۔ سردار گوبند سنگھ کو حکومت کے ان اعلانات پر بھروسہ نہیں جن میں ڈیرہ بگٹی کے حالات معمول پر بتا ئے جاتے ہیں۔

سردار گوبند سنگھ نے کشمور میں اپنے مطب پر بات چیت کے دوران بتایا کہ ان کا گھر ڈیرہ بگٹی میں ہے اور وہ واپس ضرور جائیں گے مگر ابھی حالات واپسی کے لیے سازگار نہیں۔ ان کے بقول ’ابھی واپس جانے کا سوچتے ہوئے ڈر یہ لگا رہتا کہ جیسے اچانک کچھ نہ کچھ ہوجائے گا۔

انہوں نے بتا یا کہ جو لوگ ڈیرہ بگٹی جا رہے ہیں وہ ملازمت پیشہ ہیں ان کی مجبوری ہے مگر کوئی اپنے بیوی بچوں کو ساتھ ڈیرہ بگٹی نہیں جا سکتا کیونکہ ابھی حالا ت ایسے نہیں ہیں۔