عزیزاللہ خان بی بی سی اردو ڈاٹ کام کوئٹہ

	پولیس اغوا کے واقعات کو روکنے میں ناکام رہی ہے

چھ سالہ عادل کو سکول سے چھٹی کے بعد ایک ٹو ڈی گاڑی میں سوار تین افراد سریاب روڈ سے بندوق کی نوک پر رکشے سے اتار کرساتھ لے گئے ہیں جبکہ نویں جماعت کے ایک طالب علم احسان اللہ کو سیٹلائیٹ ٹاؤن کے علاقے سے نامعلوم افراد سکول وین سے زبردستی اتار کر ساتھ لے گئے ہیں۔

اس سے پہلے ایک کمسن بچی شگفتہ کو فاطمہ جناح روڈ سے اٹھایا گیا تھا اور ان سب کا اب تک کچھ پتہ نہیں ہے کہ کہاں ہیں۔

عادل کے والدعبدالستار نے بی بی سی کو بتایا کہ وہ دکاندار ہیں اور ان کی کسی سے کوئی ذاتی دشمنی نہیں ہے۔ انہوں نے کہا کہ ان کے بچے کو دہاڑے دکانداروں کے سامنے اٹھایا گیا ہے، اس غم کی وجہ سے کسی نے گھر میں کچھ نہیں کھایا اور سب پریشان ہیں۔

گزشتہ کچھ ماہ میں بچوں کی گمشدگی کے کوئی بیس واقعات ان کے سامنے آئے ہیں جن میں سے سترہ بچے واپس پہنچ گئے ہیں اور اکثر بچے گھریلوں تنازعات کی وجہ سے خود گھر چھوڑ کر گئے تھے۔ سپرنٹنڈنٹ آف پولیس غلام ڈوگر

اس سلسلے میں کوئٹہ کے سینیئر سپرنٹنڈنٹ آف پولیس غلام محمد ڈوگر سے رابطہ قائم کیا تو انہوں نے کہا کہ حالیہ اغوا کے واقعات کے حوالے سے پولیس سے تین مشتبہ افراد کو حراست میں لیا ہے جن سے پوچھ گچھ کی جارہی ہے۔ انہوں نے کہا کہ گزشتہ کچھ ماہ میں بچوں کی گمشدگی کے کوئی بیس واقعات ان کے سامنے آئے ہیں جن میں سے سترہ بچے واپس پہنچ گئے ہیں اور اکثر بچے گھریلوں تنازعات کی وجہ سے خود گھر چھوڑ کر گئے تھے۔

ان واقعات کی وجہ سے کوئٹہ کے شہریوں میں تشویش پائی جاتی ہے۔ ایک دکاندار اسماعیل داوی نے کہا ہے کہ شہر میں امن و امان کی صورتحال انتہائی ابتر ہوچکی ہے، کاروبار نہ ہونے کی وجہ سے لوگ بچے اغوا کررہے ہیں تاکہ سرمایہ داروں سے کچھ رقم بٹور سکیں جس سے شہر کا امن تباہ ہو چکا ہے۔