عدنان عادل بی بی سی اردو ڈاٹ کام ، لاہور

ملزمان نے بچہ کو رہا کرنے کے لیے پچاس لاکھ روپے تاوان میں مانگے تھے۔

شہر میں بیس روز پہلے تاوان کے لیے اغوا کیے جانے والے بچے کی لاش آج قریبی نہر سے ملی جس کے جنازے میں شہر کے ہزاروں لوگوں نے شرکت کی۔

سیالکوٹ کے معروف کاروباری حیدر پہلوان ، جو صوبائی وزیر صنعت اجمل چیمہ کے رشتہ دار بھی ہیں، کے بیٹے ٹیپو سلطان کو بیس روز پہلے اغوا کرلیا گیا تھا۔

دس جون کو بچے کو نامعلوم کار سوار افراد نے اس وقت اغوا کیا تھا جب وہ گھر سے باہر سائیکل چلا رہا تھا۔ ملزمان نے بچے کو رہا کرنے کے لیے پچاس لاکھ روپے تاوان میں مانگے تھے۔

بچہ کی لاش آج سیالکوٹ سے پینتالیس کلومیٹر دور مرالہ راوی لنک نہر سے تھانہ قلعہ کالر والا کے علاقہ نور پور سیفل کے قریب سے ملی ہے۔

بچہ کی پوسٹ مارٹم رپورٹ کے مطابق اس کے جسم پر تشدد کےنشانات ہیں اور اسے رسیوں سے باندھ کر رکھا گیا۔

بچہ ٹیپو سلطان کو قبرستان بابا شاہ جمال راجہ روڈ پر سپرد خاک کردیا گیا۔ بچہ کو اغوا کرکے قتل کرنے والے ملزموں کا ابھی تک سراغ نہیں مل سکا۔