ریاض سہیل بی بی سی اردو ڈاٹ کام، کراچی

	بارہ مئی کو کراچی میں ہونے والے تشددکے واقعات میں چالیس سے زائد لوگ ہلاک ہو گئے تھے

صدر جنرل پرویز مشرف بارہ مئی کے بعد پہلی مرتبہ کراچی پہنچے ہیں جہاں انہوں نے وزیر اعلیٰ ہاؤس میں شہر میں امن امان کے حوالے سے اجلاس کی صدارت کی اور لوگوں سے ملاقاتیں کیں۔

صدر مشرف نے وزیر اعلیٰ ہاؤس میں خطاب کرتے ہوئے کہا کہ ان کے چیف جسٹس افتخار محمد چودھری سے ذاتی اختلافات نہیں ہیں۔ ’ریاستی معاملات چلاتے ہوئے ایسی صورتحال پیش آتی ہے جب تعلقات سے بالاتر ہوکر کام کرنا پڑتا ہے۔‘

انہوں نے کہا کہ اگر چیف جسٹس کراچی نہ آتے تو اتنی جانیں ضائع نہیں ہوتیں۔

تحقیقات کیوں نہیں ہوں گی  اگر تحقیقات میں چلے جائیں گے تو اس سے امن امان خراب ہوگا، کوئی اپنی غلطی ماننے کو تیار نہیں ہوگا اور اس کو سیاسی مسئلہ بنایا جائے گا وزیر اعلیٰ سندھ ارباب رحیم

ارباب کا کہنا تھا کہ ’اگر تحقیقات میں چلے جائیں گے تو اس سے امن امان خراب ہوگا، کوئی اپنی غلطی ماننے کو تیار نہیں ہوگا اور اس کو سیاسی مسئلہ بنایا جائے گا۔‘

بارہ مئی کو ہونے والے واقعات سے سندھ کے وزیر اعلیٰ ارباب غلام رحیم اور ان کی جماعت مسلم لیگ (ق) نے لاتعلقی کا اظہار کیا ہے۔

ان کا کہنا تھاکہ وزیر اعلیٰ ہاؤس کو غیرجانبدرانہ جگہ محسوس کیا گیا جہاں ایم کیوایم سمیت تمام لوگ آئے۔

واضح رہے کہ صدر پرویز مشرف کراچی میں اکثر گورنر ہاؤس میں ہی اجلاس اور وفود سے ملاقات کرتے ہیں۔

	اگر چیف جسٹس کراچی نہ آتے تو اتنی جانیں ضائع نہیں ہوتیں: مشرف

پشتون ایکشن کمیٹی کے رہنما شاہی سید بھی صدر سے ملاقات کرنے والوں میں شامل تھے۔

صدر مشرف کے اس دورے کو بارہ مئی کے حوالے سے اہم قرار دیا جا رہا تھا اور تحقیقات کے حوالے سے کسی پیش رفت کا امکان تھا مگر بظاہر صدر کی طرف سے کوئی ایسا بیان سامنے نہیں آیا۔

بعد میں صدر مشرف نے پورٹ قاسم پر ایل پی جی ٹرمینل کا افتتاح کیا۔ تقریب سے خطاب کرتے ہوئے صدر نے کہا کہ حکومت سرمایہ کاروں کے لیے سازگار ماحول بنانے کی کوشش کر رہی ہے، امن امان کی صورتحال کو یقننی بنانے کے لیے سخت اقدام اٹھائے جارہے ہیں ۔

انہوں نے کہا کہ ’دہشت گردی سے عسکری طریقے سے نمٹا جا رہا ہے اور انتہا پسندی کو تبدیلی کے ذریعے ختم کیا جارہا ہے۔‘