احمدرضا بی بی سی اردو ڈاٹ کام، کراچی

	وکلاء بارہ مئی کو کراچی بار ایسوسی ایشن کے باہر

ایڈیشنل ڈسٹرکٹ اینڈ سیشن جج ضلع جنوبی کراچی محمد عظیم نے یہ حکم ڈسٹرکٹ بار ایسوسی ایشن کراچی کے سیکریٹری جنرل نعیم قریشی کی جانب سے داخل کردہ ایک درخواست پر ہفتہ کو جاری کیا جس میں انہوں نے کہا تھا کہ سٹی کورٹ پولیس نے وکلاء پر تشدد کے واقعات کا مقدمہ درج کرنے سے انکار کردیا ہے اور صرف روزنامچے میں ان کی شکایت درج کی ہے۔

بارہ مئی پولیس افسران اپنے عملے کے ہمراہ سٹی کورٹ میں ڈیوٹی پر موجود تھے اور وکلاء کی بڑی تعداد بار روم میں موجود تھی ایسی صورت میں کسی شرپسند کا اندر جانا ناممکن تھا جبکہ تھانہ سٹی کورٹ کی حدود میں اس دن فائرنگ کا کوئی واقعہ پیش نہیں آیا پولیس رپورٹ

یاد رہے کہ 12 مئی کو چیف جسٹس کے دورہ کراچی کے موقع پر سٹی کورٹ جانے والے وکلاء پر فائرنگ، تشدد اور حبس بے جا میں رکھنے کی شکایت درج کرنے کے اگلے ہی دن پولیس نے جواباً وکلاء کے خلاف بھی رپورٹ درج کی تھی جس میں وکلاء کی شکایت کو جھوٹا قرار دیتے ہوئے دعوی کیا گیا ہے کہ 12 مئی کو تشدد کا کوئی واقعہ سٹی کورٹ تھانے کی حدود میں رونما نہیں ہوا تھا اور وکلاء نے دھونس اور دھمکی کے ذریعے زبردستی جھوٹی رپورٹ درج کرائی ہے۔

	کراچی بار روم کا ایک جلا ہوا حِصّہ

رپورٹ میں دعویٰ کیا گیا ہے کہ وکلاء نے رپورٹ درج نہ کرنے کے صورت میں تھانے کو آگ لگانے کی دھمکی دی تھی۔ ایس ایچ او نے اپنی شکایت میں کہا ہے کہ اگرچہ 12 مئی کو متحدہ قومی موومنٹ کے کارکن سٹی کورٹ کے باہر گیٹ نمبر2 کے قریب جمع تھے لیکن نہ تو وہ مسلح تھے اور نہ ہی انہوں نے کسی وکیل کو زدوکوب کیا جبکہ لیڈیز بار روم میں شارٹ سرکٹ کی بناء پر آگ لگی تھی جسے بروقت بجھا دیا گیا تھا اور کوئی نقصان نہیں ہوا تھا۔

پولیس رپورٹ میں کہا گیا ہے کہ 12 مئی کو پولیس افسران اپنے عملے کے ہمراہ سٹی کورٹ میں ڈیوٹی پر موجود تھے اور وکلاء کی بڑی تعداد بار روم میں موجود تھی ایسی صورت میں کسی شرپسند کا اندر جانا ناممکن تھا جبکہ تھانہ سٹی کورٹ کی حدود میں اس دن فائرنگ کا کوئی واقعہ پیش نہیں آیا۔

تھانہ سٹی کورٹ کے ڈیوٹی افسر سب انسپکٹر اقبال نے کہا کہ 12 مئی کو ان کے تھانے کی حدود میں وکلاء پر تشدد کا کوئی واقعہ پیش نہیں آیا تھا جس کی بناء پر ایس ایچ او نے ضابطہ فوجداری کی دفعہ 157 بی کے تحت حاصل اختیارات کے تحت مقدمہ میں تفتیش روک دی ہے۔