 | | | ہندوستان کی کئی ریاستیں طوفانی بارش اور سیلاب کی زد میں ہیں |
کل تک بارش کی قلت سے پریشان آندھرا پردیش اب طوفانی بارش اور سیلاب کی مار جھیل رہا ہے۔ اس ہفتے تین دن کی بارش نے سارا نقشہ ہی بدل دیا ہے۔ بارش کی شدت کا عالم یہ ہے کہ وشاکھاپٹنم اور سریکاکلم ضلعوں میں معمول سے سو فیصد زیادہ بارش ہوئی ہے۔ بارش اور سیلاب کی تباہ کاریوں نے تقریباْ پچاس افراد کی جانیں لے لی ہیں۔ ہزاروں بے گھر ہوگئے ہیں اور بڑے پیمانے پر مالی نقصان پہنچا ہے۔ عام طور پر ستمبر اور اکتوبر کے مہینے آندھرا پردیش میں طوفان باد و باراں اور سیلاب کے موسم کے طور پر مشہور ہیں۔ لیکن اس برس یہ سلسلہ اگست کے مہینے سے ہی شروع ہوگیا ہے۔ خلیج بنگال میں ہوا کے دباؤ میں کمی کے سبب ہونے والی اس بارش سے بعض علاقوں میں پانی کی قلت ختم ہوئی ہے اور بہت سے کسان اس سےخوش ہیں۔ لیکن ساحل کے کسانوں اور دوسرے لوگوں کے لیے یہ بارش تباہی کا پیام لائی ہے۔ ریاست کے دونوں بڑے دریا کرشنا اور گوداوری خطرے کے نشان سے اوپر بہہ رہے ہیں اور سینکڑوں دیہات پانی میں گھر گئے ہیں- ریاست کے وزیراعلی راج شیکھر ریڈی کا کہنا ہے کہ نقصان کا صحیح اندازہ لگانے کے لیے مزید وقت درکار ہوگا۔ حکمت عملی پر ماؤسٹ کی نظر ثانی
| ماؤنوازوں سوچ میں بیٹھے  سی پی آئی ماؤسٹ اپنے ریاستی سربراہ براہ چینیا عرف مادھو کی ہلاکت سے لگے دھچکے سے ابھرنے کی کوشش کررہی ہے۔ تنظیم نے کے سدرشن عرف آنند کو ریاستی کمیٹی کا نیا سکریٹری مقرر کیا ہے۔ پارٹی اب اپنی حکمت عملی پر نظرثانی کی ضرورت پر بحث کر رہی ہے۔  |
پارٹی کے اندر ایک ایسا گروپ ابھرا ہے جو یہ محسوس کرتا ہے کہ تشدد اور اپنے مخالفین کو ہلاک کرنے کی پالیسی نے ماؤسٹوں کو عوامی تائید سے محروم کردیا ہے اس لیے پولیس بھی اسے بآسانی نشانہ بنانے میں کامیاب ہورہی ہے۔ اس گروپ کا کہنا ہے کہ پارٹی کو اپنی پالیسی تبدیل کرتے ہوئے عوامی مسائل کے لیے جد و جہد پر توجہ مرکوز کرنی چاہیے۔ لیکن نئے ریاستی سکریٹری کا تعلق ایسےانتہا پسند گروپ سے ہے جو طاقت کا جواب طاقت سے دینے پر یقین رکھتا ہے۔ کے سدرشن عرف آنندگزشتہ تیس برس سے روپوش ہیں اورانہوں نے تنظیم میں کئی اہم ذمہ داریاں سنبھالی ہیں۔ کچھ عرصہ قبل پولیس نے ان کی بیوی لتا اکّا کو گولی مارکر ہلاک کردیا تھا۔ شدرشن کوچننے کی ایک وجہ یہ بھی نظر آتی ہے کہ انہیں نلّہ ملّہ جنگل کے علاقہ پر اچھی گرفت حاصل ہے اور اس وقت پولیس اس ہزاروں مربع کیلومیٹر پر پھیلے جنگل کو اپنے کنٹرول میں لینے کی کوشش کررہی ہے۔ حیدرآباد پر ماؤسٹ حملوں کا سایہ
| | | آندھرا پردیش کے جنگلوں میں ماؤنواز کئی عشروں سے سرگرم رہے ہیں |
شہر حیدرآباد پر اس وقت ماؤنواز انتہا پسندوں کے تشدد کا سایہ لہرارہا ہے۔ خفیہ ایجنسیوں کو ایک وارننگ کا پتہ چلا ہے کہ ماؤنواز ایک ایک بڑے حملے کے لیے شہر میں گھس آئے ہیں جس کے سبب پولیس کو پوری طرح چوکس کردیا گیا ہے۔ وارننگ میں کہا گیا ہے کہ ایک ایکشن ٹیم مادھو اور دوسرے بڑے لیڈروں کی ہلاکت کا انتقام لینے کے لیے وزیراعلی، وزیر داخلہ، ریاستی پولیس کے سربراہ اور دوسری اہم شخصیتوں پر حملہ کرنے کے ارادے سے آئی ہے۔ پولیس عہدیدار اس بات پر زیادہ فکر مند ہیں کہ اس ٹیم کی قیادت واسودیوراؤ عرف آشنا کرر ہے ہیں جنہوں نے اس سے پہلے سابق وزیراعلی چندرا بابو نائیڈو پر قاتلانہ حملے کا منصوبہ تیار کیا تھا۔ انہیں نہایت ہی خطرناک آدمی سمجھا جاتا ہے۔ اس حملے میں نائیڈو بال بال بچے تھے۔ انٹلیجنس کا یہ بھی کہنا ہے کہ ماؤسٹوں کی ٹیم ریاستی سیکریٹریٹ کے آس پاس گھوم کر وہاں کی سیکوریٹی کا جائزہ بھی لے چکی ہے۔ اس خطرے سے نمٹنے کے لیے پولیس نے غیرمعمولی اقدامات کیے ہیں اور اپنے جاسوسوں کی ایک بڑی تعداد پورے شہر میں پھیلا دی ہے۔ خصوصی کمانڈوز کو کہا گیا ہے کہ وہ آشّنا اور اس کے ساتھیوں کو دیکھتے ہی گولی ماردیں۔ اس صورتحال نے عام لوگوں میں یہ خدشہ پیدا کردیا ہے کہ حیدرآباد میں کوئی نہ کوئی ڈرامائی واقعہ ضرور ہونے والا ہے۔ | 
کروناندھی کے چاول بمقابلہ جیہ للیتا کے چاول
