వెనెజ్వేలా : కేజీ బియ్యం కొనాలంటే ఎన్ని కట్టల డబ్బు కావాలో తెలుసా?

20 ఆగస్టు 2018

దేశంలో తారాజువ్వలా దూసుకుపోతున్న ద్రవ్యోల్బణాన్ని నియంత్రించేందుకు వెనెజ్వేలా అధ్యక్షుడు నికోలస్ మడూరో.. చిన్న మొత్తాల్లో ఉన్న కరెన్సీ నోట్లను ప్రవేశపెట్టారు. వెనెజ్వేలాలో ద్రవ్యోల్బణం ఈ ఏడాది 10,00,000 శాతం పెరుగుతుందని అంతర్జాతీయ ద్రవ్యనిధి సంస్థ (ఐఎంఎఫ్) అంచనా వేస్తోంది.

వెనెజ్వేలాలో తలెత్తిన తీవ్ర ఆర్థిక తిరోగమనం నేపథ్యంలో ఆ దేశ కరెన్సీ.. బొలీవర్‌కు విలువ లేకుండా పోయింది. దేశంలో ద్రవ్యోల్బణ తీవ్రతను తెలియజేసేందుకు రాయిటర్స్ ఫొటోగ్రాఫర్ కార్లోస్ గార్సియా రవ్లిన్స్ ప్రయత్నించారు. ఇళ్లలో ప్రతిరోజూ వినియోగించే నిత్యావసరాలు.. వాటిని కొనుగోలు చేసేందుకు అవసరమయ్యే డబ్బు కట్టలను పక్కపక్కనే పెట్టి ఫొటోలు తీశారు.

రాజధాని నగరం కరాకస్‌లో 2.4 కేజీల బరువున్న చికెన్ కొనాలంటే 1,46,00,000 బొలీవర్‌లు కావాలి. (సుమారు 4,107 రూపాయలు)

గత గురువారం టాయిలెట్ పేపర్ 26,00,000 బొలీవర్‌లు పలికింది.

ఈ క్యారెట్లను కొనాలంటే 30 లక్షల బొలీవర్‌లు కావాలి.

అధ్యక్షుడు తీసుకున్న చర్యలు సోమవారం అమల్లోకి రాకముందే తమ ఇళ్లలోకి అవసరమైన, వీలైనన్ని ఆహార పదార్థాలు కొనిపెట్టుకోవాలని ప్రజలంతా భావించారు. ఎందుకంటే కొత్త చర్యల కారణంగా అపోహలు తలెత్తి, బ్యాంకులపై ఒత్తిడి పెరిగి, క్రయవిక్రయాలు సరిగ్గా జరగవేమోనన్నది వారి భయం.

కేజీ బియ్యం ధర 25,00,000 బొలీవర్‌లు.

ఈ ఏడాది జులైలో ద్రవ్యోల్బణం 82,700 శాతానికి చేరింది.

Skip ఎక్కువమంది చదివినవి and continue reading

ఎక్కువమంది చదివినవి

End of ఎక్కువమంది చదివినవి

మరకైబో నగరంలోని ఒక సూపర్ మార్కెట్‌లో సరుకులు కొనుగోలు చేసేందుకు వచ్చిన అలీసియా రమిరెజ్ (38) అనే ఒక బిజినెస్ అడ్మినిస్ట్రేటర్‌.. రాయిటర్స్ వార్తా సంస్థతో మాట్లాడుతూ.. ‘‘కూరగాయలు కొందామనుకున్నా. కానీ ఈ క్యూలైనులో నిలబడలేక వెళ్లిపోతున్నా. ప్రజలకు పిచ్చెక్కుతోంది’’ అన్నారు.

శానిటరీ ప్యాడ్ల ప్యాకెట్ కొనాలంటే 35,00,000 బొలీవర్‌లు అవసరం.

కిలో టొమాటోలు ఎంత? 50,00,000 బొలీవర్లు మాత్రమే!!

సోమవారం దేశవ్యాప్తంగా చిన్న మొత్తాల్లో ఉన్న కరెన్సీ నోట్లను ప్రవేశపెడుతున్నారు. ఈ నేపథ్యంలో సోమవారాన్ని సెలవు దినంగా ప్రకటించారు. కొన్ని గంటల పాటు ఇంటర్నెట్ బ్యాంకింగ్ సేవలు కూడా నిలిచిపోతాయి.