వెనుజువెలా: పోలీస్ స్టేషన్‌లో అల్లర్లు.. 68 మంది మృతి

ఫొటో క్యాప్షన్, పోలీస్ స్టేషన్ ఎదుట ఆందోళనకు దిగిన మృతుల బంధువులు

29 మార్చి 2018

వెనుజువెలాలోని ఓ పోలీస్ స్టేషన్‌లో అల్లర్లు చెలరేగటంతో మంటల్లో 68 మంది మృతి చెందినట్లు అధికారులు తెలిపారు.

స్టేషన్‌లో తాత్కాలికంగా ఏర్పాటు చేసిన జైలులో ఖైదీలు పరుపులకు నిప్పు పెట్టడంతో మంటలు భారీగా ఎగిసిపడినట్టు చెప్తున్నారు.

ఈ ఘటన కరబోబో రాష్ట్రంలోని వాలెన్సియా పట్టణంలో చోటుచేసుకుంది. దీనిపై అత్యవసర విచారణకు ఆదేశించినట్టు రాష్ట్ర ప్రధాన ప్రాసిక్యూటర్ టారెక్ సాబ్ తెలిపారు.

ఈ ఘటన గురించి వార్తలు వచ్చిన వెంటనే ఖైదీల బంధువులు పెద్ద ఎత్తున పోలీస్ స్టేషన్‌ను చుట్టుముట్టి రాళ్లు రువ్వారు. దాంతో వారిని చెదరగొట్టేందుకు పోలీసులు బాష్పవాయు గోళాలు ప్రయోగించారు. ప్రస్తుతం పరిస్థితి అదుపులో ఉందని రాష్ట్ర ఉన్నతాధికారి ఒకరు తెలిపారు.

పొగ కమ్ముకోవడంతో చాలామంది ఖైదీలు ఊపిరాడక చనిపోయారని వారి బంధువులు ఆగ్రహం వ్యక్తం చేశారు. మృతుల్లో ఖైదీలను చూసేందుకు లోపలికి వెళ్లిన పలువురు మహిళలు, చిన్నారులు కూడా ఉన్నట్టు తెలుస్తోంది.