దిల్లీ హింస: తప్పిపోయిన పది రోజుల తర్వాత తల్లి ఒడికి చేరిన మూడేళ్ల చిన్నారి

కొద్ది రోజుల క్రితం అల్లర్ల కారణంగా తమ ప్రాంతాన్ని వదిలి వెళ్లిపోతున్న ఓ కుటుంబానికి మసీదు వద్ద ఓ మూడేళ్ల చిన్నారి కనిపించిందన్న వార్తను బీబీసీ ప్రచురించింది.

మహమ్మద్ సూద్ ఆలమ్, అతని భార్య దిల్లీలోని శివ్ విహార్ ప్రాంతానికి వెళ్తుండగా ఆ చిన్నారిని గమనించారు.

రాళ్ల దాడుల కారణంగా హింస చెలరేగిన సమయంలో తాము ఆ చిన్నారిని మదీనా మసీదు దగ్గర చూశామని.. ఆమె తలకు గాయంకావడంతో ఏడుస్తూ కనిపించిందని ఆలమ్ బీబీసీతో అన్నారు.

ఆమెను తమతో పాటు తమకు ఆశ్రయం కల్పించిన ప్రాంతానికి తీసుకువెళ్లిపోయామని చెప్పారు.

ఇంటింటికీ వెళ్లి విచారించిన దిల్లీ మహిళా కమిషన్

అయితే మీడియాలో ఆ చిన్నారి గురించి కథనాలు ప్రసారంకావడంతో దిల్లీ మహిళా కమిషన్ బృందం ఆ ప్రాంతంలో ఇంటింటికీ వెళ్లి విచారించింది. అలాగే ఆ చిన్నారి కనిపించిన మసీదు దగ్గర బహిరంగ ప్రకటనలు చేయించింది కూడా.

బుధవారం ఆ చిన్నారి తాత మహమ్మద్ హరూన్‌కు ఓ స్వచ్ఛంద సేవకుని ద్వారా తన మనవరాలి ఆచూకీ తెలిసింది. దీంతో వెంటనే ఆయన పోలీసుల్ని సంప్రదించారు.

ఆ చిన్నారి పేరు సఫియా అని ఆమె తమ దగ్గరే ఉంటోందని చెప్పారు. సఫియా తల్లిదండ్రులిద్దరూ నగరంలోని వేరే ప్రాంతంలో ఓ డ్రైనేజీ ప్రాజెక్టులో రోజుకూలీలుగా పని చేస్తుండటంతో ఆమె ఆలనా పాలనా తామే చూస్తున్నామని అన్నారు.

ఫిబ్రవరి 24న అల్లర్ల నుంచి తాము తప్పించుకునే ప్రయత్నంలో ఉండగా సఫియా తప్పిపోయిందని చెప్పారు.

సఫియా తల్లిదండ్రులు ఆమె తమ బిడ్డేనంటూ ఆమెకు సంబంధించిన ఆధారాలను చూపించడంతో పోలీసులు ఆ చిన్నారిని వారికి అప్పగించారు.

తన తల్లిని చూడగానే సఫియా ఒక్కసారిగా ఆమెను హత్తుకొని తన తల్లి ఒడిలో హాయిగా విశ్రాంతి తీసుకుంది. ఈ అపురూపమైన సన్నివేశానికి సాక్ష్యంగా నిలిచామని స్క్రోల్ వెబ్ సైట్ పేర్కొంది.

ఇవి కూడా చదవండి

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)