నైరుతి రుతుపవనాలు ఏపీ, తెలంగాణల్లోకి ఎప్పుడొస్తాయి?

నైరుతి రుతుపవనాలు దాదాపు వారం ఆలస్యంగా ఈ నెల 8న శనివారం కేరళ తీరాన్ని తాకాయి. మరి ఆంధ్రప్రదేశ్, తెలంగాణలకు ఎప్పుడు రావొచ్చు?

గత మూడునాలుగు రోజుల్లో కేంద్ర పాలిత ప్రాంతమైన లక్షద్వీప్‌తోపాటు కేరళలోని అనేక ప్రాంతాల్లో భారీ వర్షపాతం నమోదైనట్లు భారత వాతావరణ విభాగం(ఐఎండీ) తెలిపింది.

సోమవారానికల్లా లక్షదీవులు, కేరళ అంతటా నైరుతి రుతుపవనాలు పూర్తిగా విస్తరించే అవకాశాలున్నాయని వెల్లడించింది.

శనివారం పశ్చిమ బెంగాల్, సిక్కిం, ఒడిశా, కోస్తాంధ్ర, యానాం, మధ్య మహారాష్ట్ర, కర్ణాటక దక్షిణ ప్రాంతంలో అక్కడక్కడా ఉరుములు, మెరుపులతో కూడిన వర్షం పడింది.

విశాఖపట్నం, శ్రీకాకుళం, విజయనగరం, తూర్పు గోదావరి జిల్లాల్లోని కొన్ని ప్రాంతాల్లో శనివారం తేలికపాటి నుంచి ఓ మోస్తరు వర్షాలు కురిశాయి. ఇవి రుతుపవనాల ఆగమనానికి ముందు పడే వానలు.

ఈ నెల 11లోగా దక్షిణ కోస్తాంధ్రకు, 15లోగా ఉత్తర కోస్తాంధ్రకు రుతుపవనాలు విస్తరించేందుకు అనువైన పరిస్థితులు ఉన్నాయని భారత వాతావరణ శాఖ అంచనా వేస్తోంది.

కోస్తాంధ్ర, రాయలసీమల్లో వర్షాలు దాదాపు సాధారణంగా ఉంటాయని హైదరాబాద్‌లోని వాతావరణ కేంద్రం డైరెక్టర్ వైకే రెడ్డి చెప్పారు.

'ఆగస్టు, సెప్టెంబరులోనే ఎక్కువ వర్షపాతం'

ఈసారి కేరళకు వారం ఆలస్యంగా రుతుపవనాలు వచ్చాయని, ఆంధ్రప్రదేశ్, తెలంగాణలకు కూడా ఆలస్యమవుతుందని విశాఖపట్నంకు చెందిన వాతావరణ నిపుణుడు భానుకుమార్ చెప్పారు. రుతుపవనాల ఆలస్యానికి వాతావరణ మార్పులే కారణమన్నారు.

ఆంధ్రప్రదేశ్, తెలంగాణల్లో రుతుపవన వర్షపాతం జూన్, జులై మాసాల్లో కంటే ఆగస్టు, సెప్టెంబరు నెలల్లో ఎక్కువగా ఉంటుందని ఆయన బీబీసీతో చెప్పారు.

వర్షపాతం సాధారణం: ఐఎండీ

నైరుతి రుతుపవన కాలం జూన్ నుంచి సెప్టెంబరు.

దేశంలో నైరుతి రుతుపవన వర్షపాతం ఈ సంవత్సరం దాదాపు సాధారణంగా ఉండే అవకాశముందని ఏప్రిల్ 15న విడుదల చేసిన అంచనాల్లో ఐఎండీ తెలిపింది.

లాంగ్ పీరియడ్ యావరేజ్(ఎల్‌పీజీ)లో 96 శాతం వర్షపాతం నమోదయ్యే అవకాశముందని చెప్పింది. ఈ అంచనా ఐదు శాతం మేర అటూ ఇటూ కావొచ్చని పేర్కొంది.

దేశంలో 1951 నుంచి 2000వ సంవత్సరాల మధ్య నైరుతి రుతుపవనాల సీజన్ వర్షపాతం ఎల్‌పీఏ 89 సెంటీమీటర్లుగా ఉందని ఐఎండీ తెలిపింది.

ఎల్‌పీఏలో 96 శాతం నుంచి 104 శాతం వరకు వర్షపాతాన్ని 'దాదాపు సాధారణ వర్షపాతం'గా ఐఎండీ పరిగణిస్తుంది. ఎల్‌పీఏలో 90 నుంచి 96 శాతం వరకు వర్షపాతాన్ని సాధారణం కంటే తక్కువ వర్షపాతంగాను, ఎల్‌పీఏలో 90 శాతం కంటే తక్కువ వర్షపాతాన్ని లోటు వర్షపాతంగాను పేర్కొంటుంది.

రానున్న 24 గంటల్లో తమిళనాడు, ఆంధ్రప్రదేశ్, తెలంగాణ, విదర్భ(మహారాష్ట్ర), ఇతర ప్రాంతాల్లో అక్కడక్కడా తేలికపాటి వర్షాలు పడొచ్చని 'స్కైమెట్' సంస్థ ఆదివారం మధ్యాహ్నం తెలిపింది.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)