సైనికుల డ్రెస్సులో వచ్చి జైలుపై దాడి చేసిన మిలిటెంట్లు...ఆ తర్వాత ఏం జరిగింది?

సోమాలియా రాజధానిలోని అత్యంత భద్రత కలిగిన ఓ కారాగారంపై దాడి సందర్భంగా ఏడుగురు అల్-షాబాద్ మిలిటెంట్లను చంపేసినట్లు ఆ దేశ ప్రభుత్వం వెల్లడించింది.

శనివారం సాయంత్రం మొగదిషు ప్రాంతంలోని అల్-షాబాద్ మిలిటెంట్లు బందీలుగా ఉండే గోడ్కా జిలికోవ్ నిర్బంధ కేంద్రం నుంచి భారీ ఎత్తున పేలుడు, గన్ ఫైర్ శబ్దాలు వినిపించాయి.

ఈ కేంద్రం నుంచి "అందరు ముస్లిం ఖైదీలను" తాము విడుదల చేసినట్లు అల్- షాబాద్ ఓ ప్రకటనలో తెలిపింది.

ఈ క్రమంలో పెద్ద ఎత్తున మరణాలు చోటు చేసుకున్నట్లు కూడా పేర్కొంది.

సైనికుల దుస్తులు ధరించిన మిలిటెంట్లు కారాగారంలోకి ప్రవేశించారని ప్రభుత్వ ఆధ్వర్యంలో నడిచే న్యూస్ ఏజెన్సీ సోనా లైవ్ ఆదివారంనాడు తెలిపింది.

అయితే... ఈ ఘటనలో భద్రతా బలగాలకు చెందినవారు ఎంతమంది మరణించారనే విషయాన్ని ప్రభుత్వం వెల్లడించలేదుగానీ, "నేలకొరిగిన వీరుల" కుటుంబాలకు సంతాపం తెలుపుతున్నట్లు పేర్కొంది.

అదే సమయంలో అల్-షాబాద్ సంస్థ కూడా ఎంతమంది తమ అనుచరులు మరణించారనే విషయాన్ని చెప్పలేదు.

ఈ దాడి స్థానిక కాలమానం ప్రకారం(13:40 జీఎంటీ) సాయంత్రం 4.40 గంటల ప్రాంతంలో మొదలైంది.

అధ్యక్ష భవనం సమీపంలో, అత్యంత భద్రత కలిగిన ప్రాంతంలో..

ఈ గోడ్కా జిలికోవ్ కేంద్రం మొగదిషు నగరం మధ్యలో సోమాలియా అధ్యక్ష భవనం ప్రాంతానికి సమీపంలో ఉంటుంది. దీన్ని సోమాలియా నేషనల్ ఇంటెలిజెన్స్ అండ్ సెక్యూరిటీ ఏజెన్సీ(నిసా) పర్యవేక్షిస్తుంది.

ఇక్కడ అల్- షాబాద్ మిలిటెంట్లతో పాటు, హై-ప్రొఫైల్ ఖైదీలను నిర్బంధంలో ఉంచుతారు.

నిర్బంధ కేంద్రంపై మిలిటెంట్లు జరిపిన ఈ దాడి నిసాకు పెద్ద ఎదురుదెబ్బగా చెప్పవచ్చు.

అలాగే... రాజధాని ప్రాంతంలోని అత్యంత భద్రత కలిగిన వాటిల్లో ఒకటైన ఈ కేంద్రంలో ఉగ్రవాదులు ఎలా ప్రవేశించగలిగారనేదానిపై అనుమానాలు వ్యక్తమవుతున్నాయి.

అల్-ఖైదాకు అల్- షాబాద్ అనుబంధ సంస్థ. దాదాపు 20 ఏళ్లుగా ఈ సంస్థ సోమాలియా ప్రభుత్వానికి వ్యతిరేకంగా తిరుగుబాటు కార్యకలాపాలకు పాల్పడుతోంది.

మొగదిషులో చాలా ఏళ్లుగా మూసి ఉన్నకీలకమైన రోడ్లను శనివారం ఈ దాడి జరగడానికి కొన్ని గంటలముందు ప్రభుత్వం తిరిగి ప్రారంభించింది.

నగరంలో ఇటీవల భద్రతాప్రమాణాలు పెరిగాయని చెబుతూ ప్రభుత్వం వీటిని తెరిచింది. అంతలోనే ఈ ఘటన జరిగింది.

(బీబీసీ కోసం కలెక్టివ్ న్యూస్‌రూమ్ ప్రచురణ)

(బీబీసీ తెలుగును వాట్సాప్‌,ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)