బంగారం కొనాలా? బంగారం బాండ్లు కొనాలా? ఏది లాభం?

బంగారాన్ని భారతీయులు చూసే విధానం పూర్తిగా భిన్నం. పండుగలు, వివాహాలు అంటూ ఏ శుభకార్యం జరిగినా సరే, బంగారు ఆభరణాలు ఉండాల్సిందే. ప్రతి ఇంటా బంగారు ఆభరణాలు కనిపిస్తాయి.

‘నా బంగారం’ అంటూ ఎవరో ఒకరు అన్న మాటలు మీకూ వినిపించే ఉంటాయి. అంతలా దేశ ప్రజల జీవన విధానంలో బంగారం సుదీర్ఘ కాలంగా భాగమై ఉంది.

బంగారాన్ని కేవలం ఆభరణంగా మాత్రమే కాదు, ఆస్తిగా భావిస్తారు. బంగారం వినియోగానికి వస్తే ప్రపంచంలోనే భారత్ ముందు స్థానంలో ఉంది. మిగిలిన దేశాలు కూడా బంగారంలో పెట్టుబడిని పొదుపుగా భావిస్తాయి. అందుకే దేశంలోని బంగారం నిల్వలను బట్టి దేశ ఆర్థిక వ్యవస్థ పరిమాణాన్ని అంచనా వేస్తారు.

ఆర్థిక సంక్షోభం ఎదురైనప్పుడు, దాని నుంచి దేశ ప్రజల్ని రక్షించేందుకు, ఆహార ధాన్యాల కొనుగోలు కోసం నగదుకు బదులుగా బంగారాన్ని విక్రయించడం ద్వారా తిరిగి నిలదొక్కుకున్న సందర్బాలు చరిత్రలో చాలా ఉన్నాయి.

బంగారం కొనడాన్ని పెట్టుబడిగా భావించవచ్చా?

ఒక్క బంగారాన్నే ప్రత్యేకంగా భావించడం వెనుక ఒక కారణం ఉంది. అదేంటంటే బంగారంలో పెట్టుబడుల వల్ల రిస్క్ తక్కువ. బంగారం ఎంత పాతదైనా వన్నె, విలువ తగ్గదు. అందుకే భారత దేశంలో బంగారం కొనుక్కునేందుకు ప్రత్యేకంగా అక్షయ తృతీయ లాంటి పండుగలు ఉన్నాయి.

బంగారం ధర తగ్గితే అది దీర్ఘకాలిక పెట్టుబడిగా సురక్షితమైన, కచ్చితమైన లాభాలు తెచ్చి పెడుతుంది.

అంతర్జాతీయ పరిస్థితులు, ఇతర కారణాల వల్ల బంగారం ధరల్లో అప్పుడప్పుడు హెచ్చు తగ్గులు ఉన్నా.. స్థిరమైన పెరుగుదల ఉంది. తగ్గుతున్న కరెన్సీ విలువ, పెరుగుతున్న నిత్యవసరాల ధరలు, స్టాక్ మార్కెట్‌లో అనిశ్చిత పరిస్థితులు లాంటివి బంగారంలో పెట్టుబడి సురక్షితం అని చెబుతున్నాయన్నారు ఇన్వెస్ట్‌మెంట్ అడ్వైజర్ సతీష్.

“బంగారు ఆభరణాలు కొనుక్కోవడం కంటే బంగారం బాండ్లలో పెట్టుబడులు మరింత లాభదాయకం” అని ఆయన చెప్పారు.

గోల్డ్ బాండ్ అంటే ఏమిటి?

గోల్డ్ బాండ్‌లు సురక్షితమైన పెట్టుబడిగా పరిగణింవచ్చు. అంతేకాకుండా ఎక్కువ రాబడి పొందొచ్చు. దీని గురించి ఇన్వెస్ట్‌మెంట్ కన్సల్టెంట్ సతీష్ మాట్లాడారు.

భారత ప్రభుత్వం నవంబరు 2015లో వీటిని ప్రవేశపెట్టింది. బంగారాన్ని ఆభరణాలు, కాయిన్లు, బిస్కెట్ల రూపంలో దాచుకునే బదులుగా బాండ్ల రూపంలో కూడా పెట్టుబడిగా మార్చుకోవచ్చని తెలిపింది. ఈ బాండ్లను బ్యాంకులు, స్టాక్ మార్కెట్ వెబ్‌సైట్లలో నగదు, చెక్కు, డిమాండ్ డ్రాఫ్ట్, ఎలక్ట్రానిక్ మనీ ట్రాన్స్‌ఫర్..వంటి మార్గాల్లో కొనుగోలు చేయొచ్చు అని తెలిపారు.

ఉదాహరణకు ఓ వ్యక్తి ఒక గోల్డ్ బాండ్స్‌ ద్వారా ఒక గ్రాము బంగారాన్ని కొంటే, ఎనిమిదేళ్ల తర్వాత ఆ బాండ్ విలువకు తగ్గట్లుగా బంగారాన్ని పొందొచ్చు. అంతేకాకుండా ఏడాదికి 2.5 శాతం చొప్పున వడ్డీ లభిస్తుంది.

అంతేకాకుండా బంగారం ఇంట్లో ఉన్నప్పుడు దొంగతనం వంటివి జరుగుతాయేమోనన్న భయం ఉంటుంది. బంధువుల ఇళ్లకు వెళ్లినా సరే, ఇంటిపైనే బెంగ ఉంటుంది. ప్రశాంతంగా ఉండలేం. సీసీకెమెరాల వంటివి ఏర్పాటు చేసుకున్నా కూడా, మనకు ఏం జరుగుతుందో తెలుస్తుంది కానీ, పోగొట్టుకున్న బంగారాన్ని తిరిగి పొందటం అంత సులభం కాదు.

బంగారాన్ని చాలామంది పెట్టుబడిగా భావించినప్పటికీ భద్రత విషయంలో ఉన్న సమస్య వలన వెనకడుగు వేస్తుంటారు. ఒకవేళ బ్యాంకు లాకర్లలో పెట్టినా కొంత సొమ్ము చెల్లించాల్సి ఉంటుంది.

అందువలన గోల్డ్ బాండ్ అనేది సురక్షితం.

భారత రిజర్వ్ బ్యాంక్ కూడా బంగారాన్ని పెట్టుబడిగా పరిగణించే వారి కోసం గోల్డ్ బాండ్స్ అందుబాటులోకి తీసుకొచ్చింది.

గోల్డ్, గోల్డ్ బాండ్‌ల మధ్య తేడా ఏంటి?

బంగారు ఆభరణాలను కొంటే మనం తరుగు, మజూరీ ఛార్జీలు, జీఎస్టీ కూడా చెల్లించాల్సి ఉంటుంది. దీనిపై తరుగు ఆ ఆభరణాన్ని బట్టి 15% నుంచి 18% వరకు ఉంటాయి. మజూరీ ఛార్జీలు 5% నుంచి 15% మధ్య ఉంటాయి. జీఎస్టీ 3% ఉంటుంది.

ఉదాహరణకు మీరు 10 గ్రాముల బంగారు ఆభరణం కొనుగోలు చేశారునుకుందాం. అప్పుడు మీరు చెల్లించాల్సినది..

బంగారం 10 గ్రాములు – 53500

తరుగు (15%) - 8025

మజూరీ (10%) - 5350

జీఎస్టీ (3%) - 1605

చెల్లించాల్సిన మొత్తం-68,480

ఒకవేళ మీరు గోల్డ్ బాండ్‌లను తీసుకున్నట్లయితే మీరు తరుగు, మజూరీ ఛార్జీలు, జీఎస్టీ వంటి ఎలాంటి అదనపు ఛార్జీలు చెల్లించాల్సిన పని లేదు. కేవలం బంగారం ధర చెల్లిస్తే సరిపోతుంది.

అంతేకాక అదాయపు పన్నులో మినహాయింపు ఉంటుంది. బాండ్‌పై ఏడాదికి 2.5% చొప్పున వడ్డీ లభిస్తుంది. అయితే ఈ వడ్డీపై పన్ను ఉంటుంది. ఎనిమిదేళ్ల కాలానికి ఈ గోల్డ్ బాండ్స్ అందుబాటులో ఉన్నాయి. ఎనిమిదేళ్లు పూర్తయ్యాక తర్వాత మార్కెట్ ధర ఆధారంగా డబ్బులు తీసుకోవచ్చు.

ఎంత కొనొచ్చు?

వ్యక్తిగత బాండ్ల రూపంలో ఒక గ్రాము నుంచి నాలుగు కేజీల వరకు కొనుగోలు చెయ్యవచ్చు.

ప్రభుత్వ గుర్తింపు పొందిన ట్రస్టుల లాంటి సంస్థలు 20 కేజీల వరకు బంగారం కొనవచ్చు.

మిగతా బంగారు ఆభరణాల మాదిరిగానే దీన్ని బ్యాంకుల్లో డిపాజిట్ చెయ్యవచ్చు లేదా అమ్ముకోవచ్చు. మార్పిడి కూడా చేసుకోవచ్చు.

గోల్డ్ బాండ్లు కొనుక్కోవడం వల్ల పన్ను మినహాయింపులు పొందే అవకాశం ఉండటం వాటివల్ల లభించే మరో ప్రత్యేక అంశమని ఇన్వెస్ట్‌మెంట్ అడ్వైజర్ సతీష్ తెలిపారు.

గోల్డు బాండ్లు పెట్టుబడిగా కూడా ఉపయోగపడతాయి. పిల్లల పెళ్లి చేసే సమయంలో బంగారం కొనే బదులుగా బంగారం బాండ్లు కొని ఇస్తే... తర్వాతి కాలంలో అవి అమ్ముకుని స్థలం కొనుక్కోవచ్చు. ఇల్లు కట్టుకోవచ్చు. లేదా పిల్లల చదువుకు ఉపయోగించుకోవచ్చు. బంగారం బాండ్లలో పెట్టుబడి లాభాలు ఆర్జించే మార్గంగా ఎంచుకోవచ్చు.

బంగారాన్ని డిజిటల్ రూపంలో కూడా కొనుక్కోవచ్చు. పేటీఎం, ఫోన్‌పే, గూగుల్ పే మీ నెట్‌బ్యాంకింగ్ అకౌంట్ల ద్వారా సావరిన్ గోల్డ్ బాండ్లను కొనుక్కోవచ్చు. ఈ కొనుగోళ్ల ద్వారా యాప్‌ల నుంచి 50 రూపాయల నుంచి వంద రూపాయల వరకూ డిస్కౌంట్ పొందవచ్చు.

ఇవి కూడా చదవండి:

(బీబీసీ తెలుగును ఫేస్‌బుక్, ఇన్‌స్టాగ్రామ్‌, ట్విటర్‌లో ఫాలో అవ్వండి. యూట్యూబ్‌లో సబ్‌స్క్రైబ్ చేయండి.)