Афзоиши ҳимоят аз таҳрими бештар алайҳи Эрон дар Сенои Омрико
Тарҳи таҳримҳои бештар алайҳи Эрон ҳимояти беш аз ниме аз сенотурҳои омрикоиро ҷалб кардааст. Бо ин ҳол, ҳанӯз нишонае аз ин дида намешавад, ки ин тарҳ барои раъйгирӣ ба саҳни Сено оварда шавад.
Бо пайвастани шаш сенотури дигар дар рӯзи чаҳоршанбеи 8 январ тарҳи "Эрони орӣ аз силоҳи атумӣ" ҳоло дастикам ҳимояти 54 узви Сенои Омрикоро ҷалб кардааст.
Хабаргузории Руйтерз аз қавли дастёри яке аз сенотурҳо гуфтааст, ки ду сенотури дигар ҳам рӯзи панҷшанбеи 9 январ ба ҳомиёни ин тарҳ пайвастаанд ва теъдоди имзоҳо ба 56 расидааст.
Дар миёни ҳомиёни феълии ин тарҳ номи 16 сенотури демукрот низ дида мешавад.
Бо ин ҳол, хеле дигар аз аъзои демукроти Сено бо ин тарҳ башиддат мухолифат кардаанд.
Даҳ сенотури демукрот, ки руасои кумитеҳои Сено ҳастанд, пештар дар номае ба Ҳарӣ Рейд, раиси аксарияти Сено, бо ин тарҳ мухолифат карда буданд.
Барои ба раъй гузошта шудани ин тарҳ дар саҳни Сено раиси аксарияти демукрот бояд мавонеъи ойинномаии тарҳи он дар саҳни Сеноро рафъ кунад, аммо ҳанӯз нишонае дида намешавад, ки Ҳарӣ Рейд чунин мавзеъе гирифта бошад.
Тарҳи "Эрони орӣ аз силоҳи атумӣ", ки аз сӯйи Роберт Менендез, раиси демукроти кумитеи равобити хориҷии Сено, ва Морк Кирк, сенотури ҷумҳурихоҳ, пешниҳод шуда, хостори вазъи таҳримҳои бештар алайҳи Эрон дар сурати амал накардан ба тавофуқи Женев ё сар боз задан аз пазируфтани як тавофуқи ниҳоии "қобили қабул" аст.
Ин тарҳ хостори қатъи комили содироти нафтии Эрон зарфи ду сол ва ҳамчунин маҳдуд кардани ихтиёри давлати Борок Убомо дар коҳиши таҳримҳост.
Таҳдид ба вету
Тавофуқи Женев, ки барои он унвони "Барномаи иқдоми муштарак" интихоб шуда, дар пайи музокироти Эрон ва шаш қудрати ҷаҳонӣ, шомили Омрико, Бритониё, Чин, Русия, Фаронса ва Олмон, дар 3 озар (24 ноябр) ба даст омад.
Бар асоси матне аз ин тавофуқ, ки дар расонаҳо мунташир шуда, қарор шуда Эрон ба муддати шаш моҳ баъзе аз барномаҳои атумии худро маҳдуд ва имкони бозрасии густардатарро фароҳам кунад ва тарафи муқобил низ аз вазъи таҳримҳои ҷадид алайҳи Ҷумҳурии Исломӣ худдорӣ варзад ва аз фишори таҳримҳо дар баъзе заминаҳо бикоҳад.
Эрон мегӯяд ҳар гуна таҳрими ҷадид ба маънои "марги" тавофуқи Женев аст.
Давлати Омрико низ бо ин тарҳ башиддат мухолифат карда ва онро омили шикасти талошҳои диплумотик барои ҳаллу фасли парвандаи ҳастаии Эрон донистааст.
Ҷен Сокӣ, сухангӯйи Вазорати хориҷаи Омрико, рӯзи панҷшанбе бори дигар бар мухолифати давлат бо ҳар гуна таҳрими ҷадид алайҳи Эрон таъкид кард ва онро хилофи рӯҳи тавофуқи Женев бо Эрон ва дигар кишварҳои Гурӯҳи "Панҷ ба иловаи як" шумурд.
Музокироти Эрон ва кишварҳои Гурӯҳи "Панҷ ба иловаи як" барои иҷрои тавофуқи Женев идома дорад. Дар ин бора рӯзи панҷшанбеи 9 январ Аббоси Ароқчӣ ва Вендӣ Шерман, муъовинони вузарои хориҷаи Эрону Омрико дар Женев бо ҳузури Ҳелго Ишмит, муъовини Котрин Аштун, раиси сиёсати хориҷии Иттиҳодияи Урупо, дидор кардаанд.
Пештар сухангӯйи Кохи Сафед гуфта буд Борок Убомо, раиси ҷумҳурии Омрико, чунин тарҳеро вету хоҳад кард. Раъйи беш аз ду севуми аъзои Сенои Омрико, яъне 67 раъй лозим аст, то ветуи раиси ҷумҳурӣ беасар шавад.
Дар рӯзҳои гузашта нуҳ коршиноси сиёсати хориҷӣ, аз ҷумла Роён Крукер, сафири собиқи Омрико дар Исроил ва Созмони Милал, аз пешниҳоддиҳандагони ин тарҳ хоста буданд онро дунбол накунанд, чун ба гуфтаи ин коршиносон, чунин иқдоме метавонад Иёлоти Муттаҳидаро дар маърази ҷанг қарор диҳад.
Соъоте пеш аз эъломи ин хабар, Оятуллоҳ Алии Хоминаӣ, раҳбари Ҷумҳурии Исломӣ, гуфт: "Яке аз баракоти музокирот ин буд, ки душмании Омрико бо Эрон ва эронӣ ва ислом барои ҳама рӯшан шуд."
