Таъкиди Алии Лориҷонӣ бар тамоюли Теҳрон ба ҳалли муноқишаи ҳастаӣ
Алии Лориҷонӣ, раиси Маҷлиси Эрон, бар ҳимояти ҳукумати Эрон аз иқдомоти диплумотики Ҳасани Рӯҳонӣ таъкид карда ва гуфтааст Теҳрон барои ҳаллу фасли парвандаи ҳастаӣ ҷиддӣ аст.
Оқои Лориҷонӣ дар мусоҳиба бо телевизиюни омрикоии Си-Эн-Эн гуфтааст раҳбари Эрон ба таври куллӣ аз сиёсати раёсати ҷумҳурии Эрон ва иқдомоти ӯ ҳимоят мекунад.
Ӯ, ки барои ширкат дар иҷлоси байнулмаҷолиси ҷаҳонӣ дар Женеви Суис ба сар мебарад, дар посух ба Кристиян Амонпур гуфтааст далеле намебинад дар бораи музокироти ҳастаии Эрон ва Ғарб бадбин бошад.
Ба гуфтаи Алии Лориҷонӣ, "Эрон метавонад ба рӯшанӣ нишон диҳад ва собит кунад, ки дар пайи дастёбӣ ба бумби атумӣ нест."
Раиси Маҷлиси Эрон гуфтааст муноқишаи ҳастаии Эрон метавонад дар кӯтоҳмуддат ҳаллу фасл шавад.
Дар айни ҳол, Алии Лориҷонӣ тасреҳ кардааст, ки Ғарб бояд "ҳаққи Эрон барои ғанисозии урониюм бо мақосиди сулҳомез бар асоси муъоҳидаи Эн-пӣ-тӣ"-ро бипазирад.
Оқои Лориҷонӣ аз чеҳраҳои сиёсии наздик ба Оятуллоҳ Алии Хоминаӣ, раҳбари Ҷумҳурии Исломӣ ба шумор меравад.
Ӯ худ пештар дабири Шӯрои Олии Амнияти Миллии Эрон ва раиси тими музокироти ҳастаӣ буда ва пас аз Ҳасани Рӯҳонӣ ин симатро барои ду сол дар даврони раёсати ҷумҳурии Маҳмуди Аҳмадинажод бар уҳда дошт.
Ҳафтаи ояндаи Эрон ва кишварҳои 5+1 дар Женев дар бораи барномаи ҳастаиии ин кишвар гуфтугӯ мекунанд.
Дар ҷаласаи пешини вузарои хориҷаи ин кишварҳо, ки дар Ню-Йурк ва бо ҳузури Муҳаммадҷаводи Зариф, вазири умури хориҷаи Эрон, баргузор шуд, тарафайн нишасти онро созанда ва мусбат хонданд.
"Мавриди таъйид аст"
Алии Лориҷонӣ дар посух ба суоли Си-Эн-Эн тавзеъи дақиқе надод, ки ба назараш раҳбари Ҷумҳурии Исломӣ кадом бахш аз сафари ахири ҳайъати баландпояи эронӣ ба Ню-Йуркро "нобаҷо" шумурдааст.
Раиси Маҷлиси Эрон дар муқобили пофишории Кристиян Амонпур, ки бо Оятуллоҳ Хоминаӣ гуфтугӯи телефунии Ҳасани Рӯҳонӣ бо Борко Убоморо баҷо надониста, гуфт: "Шояд. Ман дақиқан напурсидам, вале мумкин аст чунин бошад."
Ӯ гуфт, ки муҳим ин аст амалкарди оқои Рӯҳонӣ мавриди таъйиди раҳбари Ҷумҳурии Исломӣ қарор гирифтааст.
Пештар Ҳасани Рӯҳонӣ низ дар мусоҳибаҳои худ гуфта буд, ки барои дастёбӣ ба тавофуқи ҳастаӣ бо Ғарб "ихтиёри комил" дорад.
Оятуллоҳ Алии Хоминаӣ, раҳбари Ҷумҳурии Исломии Эрон, рӯзи шанбе дар як суханронӣ аз сафари ахири Ҳасани Рӯҳонӣ барои ширкат дар Маҷмаъи Умумии Созмони Милал ҳимоят кард, аммо гуфт "бархе аз он чи дар сафари Ню-Йурк пеш омад, ба назари мо баҷо набуд."
Алии Лориҷонӣ дар мусоҳиба бо Си-Эн-Эн гуфтааст, ки бо таваҷҷуҳ ба таҷрибаи Ҳасани Рӯҳонӣ ва вузарои ӯ маҷлис аз давлат ҳимоят мекунад.
Намояндагони маҷлис гуфтаанд оқои Лориҷонӣ ҳафтаи пеш дар ҷаласаи муштарак бо Ҳасани Рӯҳонӣ дар маҷлис аз ӯ бобати мавзеъгириҳо ва суханонаш дар сафар ба Ню-Йурк қадрдонӣ кард.
