ਕੈਨੇਡਾ-ਅਮਰੀਕਾ ਸਰਹੱਦ 'ਤੇ ਠੰਢ ਕਾਰਨ ਮ੍ਰਿਤਕ ਪਾਏ ਗਏ ਭਾਰਤੀ ਪਰਿਵਾਰ ਦੇ ਮਾਮਲੇ ਵਿੱਚ ਆਇਆ ਇਹ ਫੈਸਲਾ
ਤਸਵੀਰ ਸਰੋਤ, kartik jaani
ਅਮਰੀਕਾ ਦੇ ਮਿਨੀਸੋਟਾ ਸੂਬੇ ਦੀ ਇੱਕ ਅਦਾਲਤ ਨੇ ਇੱਕ ਭਾਰਤੀ ਪਰਿਵਾਰ ਦੀ ਮੌਤ ਦੇ ਮਾਮਲੇ ਵਿੱਚ ਦੋ ਲੋਕਾਂ ਨੂੰ ਦਸ ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਹੈ।
ਜਨਵਰੀ 2022 ਵਿੱਚ, ਅਮਰੀਕਾ ਵਿੱਚ ਗੈਰ-ਕਾਨੂੰਨੀ ਢੰਗ ਨਾਲ ਦਾਖਲ ਹੋਣ ਦੀ ਕੋਸ਼ਿਸ਼ ਕਰਦੇ ਸਮੇਂ ਕੈਨੇਡਾ ਵਿੱਚ ਠੰਢ ਕਾਰਨ ਇੱਕੋ ਭਾਰਤੀ ਪਰਿਵਾਰ ਦੇ 4 ਮੈਂਬਰਾਂ ਦੀ ਮੌਤ ਹੋ ਗਈ ਸੀ।
ਇਸ ਮਾਮਲੇ ਵਿੱਚ, ਅਦਾਲਤ ਨੇ ਹਰਸ਼ ਕੁਮਾਰ ਪਟੇਲ ਅਤੇ ਸਟੀਵ ਐਂਥਨੀ ਸ਼ੈਂਡ ਨੂੰ ਮਨੁੱਖੀ ਤਸਕਰੀ ਦੇ ਇਲਜ਼ਾਮ ਹੇਠ ਦੋਸ਼ੀ ਠਹਿਰਾਇਆ ਹੈ।
ਪਿਛਲੇ ਸਾਲ ਨਵੰਬਰ ਵਿੱਚ, ਹਰਸ਼ਕੁਮਾਰ ਰਮਨਲਾਲ ਅਤੇ ਸਟੀਵ ਐਂਥਨੀ ਵਿਰੁੱਧ ਗੈਰ-ਕਾਨੂੰਨੀ ਢੰਗ ਨਾਲ ਸਰਹੱਦ ਪਾਰ ਕਰਨ ਵਿੱਚ ਮਦਦ ਕਰਨ ਦੇ ਇਲਜ਼ਾਮਾਂ ਤਹਿਤ ਮੁਕੱਦਮਾ ਸ਼ੁਰੂ ਹੋਇਆ ਸੀ।
ਜਾਣੋ ਕੀ ਸੀ ਪੂਰਾ ਮਾਮਲਾ
ਤਸਵੀਰ ਸਰੋਤ, RCMP MANITOBA
ਜਨਵਰੀ 2022 ਵਿੱਚ, ਕੈਨੇਡਾ ਦੇ ਓਟਾਵਾ ਵਿੱਚ ਭਾਰਤੀ ਰਾਜਦੂਤ ਨੇ ਇੱਕ ਬਿਆਨ ਜਾਰੀ ਕਰਕੇ ਕਿਹਾ ਸੀ ਕਿ ਉਸੇ ਸਾਲ 19 ਜਨਵਰੀ ਨੂੰ ਸਰਹੱਦ 'ਤੇ ਚਾਲ ਲਾਸ਼ਾਂ ਮਿਲੀਆਂ ਸਨ ਜੋ ਕਿ ਗੁਜਰਾਤੀ ਪਰਿਵਾਰ ਦੀਆਂ ਸਨ।
ਦੂਤਾਵਾਸ ਨੇ ਕਿਹਾ ਸੀ ਕਿ ਸਥਾਨਕ ਕੈਨੇਡੀਅਨ ਅਧਿਕਾਰੀਆਂ ਨੇ ਚਾਰ ਮ੍ਰਿਤਕਾਂ ਦੀ ਪਛਾਣ ਕੀਤੀ ਹੈ। ਜਿਨ੍ਹਾਂ ਵਿੱਚ ਜਗਦੀਸ਼ ਪਟੇਲ, ਵੈਸ਼ਾਲੀ ਪਟੇਲ, ਵਿਹਾਂਗੀ ਪਟੇਲ ਅਤੇ ਧਾਰਮਿਕ ਪਟੇਲ ਸ਼ਾਮਲ ਸਨ।
ਬਿਆਨ ਵਿੱਚ ਅੱਗੇ ਕਿਹਾ ਗਿਆ ਕਿ ਡਾਕਟਰੀ ਜਾਂਚ ਤੋਂ ਬਾਅਦ ਮੌਤ ਦਾ ਕਾਰਨ ਬਾਹਰੀ ਤੱਤਾਂ ਦੇ 'ਲੰਬੇ ਸਮੇਂ ਤੱਕ ਸੰਪਰਕ ਵਿੱਚ ਰਹਿਣਾ' ਦੱਸਿਆ ਗਿਆ।
ਕੈਨੇਡਾ ਦੀ ਪੁਲਿਸ ਮੁਤਾਬਕ, ਇੱਕ ਛੋਟੇ ਬੱਚੇ ਸਮੇਤ ਇਨ੍ਹਾਂ ਚਾਰ ਲੋਕਾਂ ਦੀਆਂ ਲਾਸ਼ਾਂ ਅਮਰੀਕੀ ਸਰਹੱਦ ਦੇ ਕੋਲ ਇੱਕ ਵੱਡੇ ਮੈਦਾਨ ਵਿੱਚ ਮਿਲੀਆਂ ਸਨ।
ਅਧਿਕਾਰੀਆਂ ਮੁਤਾਬਕ, ਸਾਰੀਆਂ ਮੌਤਾਂ ਬੁੱਧਵਾਰ ਨੂੰ -35 ਡਿਗਰੀ ਸੈਲਸੀਅਸ ਦੀ ਠੰਢੀ ਹਵਾ ਦੇ ਸੰਪਰਕ ਵਿੱਚ ਰਹਿਣ ਕਾਰਨ ਹੋਈਆਂ ਸੀ।
ਮ੍ਰਿਤਕ ਦੇ ਪਿਤਾ ਨੇ ਕੀ ਦੱਸਿਆ ਸੀ
ਜਦੋਂ ਪਟੇਲ ਪਰਿਵਾਰ ਦੇ ਲਾਪਤਾ ਹੋਣ ਅਤੇ ਮੌਤ ਦੀ ਖ਼ਬਰ ਆਈ ਸੀ ਤਾਂ ਬੀਬੀਸੀ ਗੁਜਰਾਤੀ ਸੇਵਾ ਨੇ ਪਰਿਵਾਰ ਦੇ ਮੁਖੀ ਅਤੇ ਲਾਪਤਾ ਜਗਦੀਸ਼ ਪਟੇਲ ਦੇ ਪਿਤਾ ਬਲਦੇਵ ਭਾਈ ਨਾਲ ਗੱਲਬਾਤ ਕੀਤੀ ਸੀ।
ਉਸ ਵੇਲੇ ਬਲਦੇਵ ਭਾਈ ਨੇ ਕਿਹਾ ਸੀ, ''ਦਸ ਦਿਨ ਪਹਿਲਾਂ, ਮੇਰਾ ਬੇਟਾ ਕੈਨੇਡਾ ਲਈ ਰਵਾਨਾ ਹੋਇਆ। ਉਸ ਨੇ ਮੈਨੂੰ ਫ਼ੋਨ ਕਰਕੇ ਦੱਸਿਆ ਕਿ ਉਸ ਨੂੰ ਕੈਨੇਡਾ ਦਾ ਵੀਜ਼ਾ ਮਿਲ ਗਿਆ ਹੈ। ਉਹ, ਉਸ ਦੀ ਪਤਨੀ, ਬੇਟੀ ਵਿਹਾਂਗੀ ਤੇ ਬੇਟਾ ਧਾਰਮਿਕ ਸਾਰੇ ਕੈਨੇਡਾ ਗਏ ਸਨ।''
ਉਨ੍ਹਾਂ ਨੇ ਇਹ ਵੀ ਕਿਹਾ ਸੀ ਕਿ ਪਿਛਲੇ ਪੰਜ-ਛੇ ਦਿਨਾਂ ਤੋਂ ਉਨ੍ਹਾਂ ਦਾ ਜਗਦੀਸ਼ ਪਟੇਲ ਨਾਲ ਕੋਈ ਸੰਪਰਕ ਨਹੀਂ ਸੀ।
ਬਲਦੇਵ ਭਾਈ ਨੇ ਕਿਹਾ ਸੀ ਕਿ ਉਨ੍ਹਾਂ ਨੂੰ ਨਹੀਂ ਪਤਾ ਸੀ ਕਿ ਜਗਦੀਸ਼ ਅਤੇ ਉਨ੍ਹਾਂ ਦੇ ਪਰਿਵਾਰ ਨੇ ਕੈਨੇਡਾ ਦੇ ਵੀਜ਼ਾ ਦੀ ਅਰਜ਼ੀ ਕਦੋਂ ਦਿੱਤੀ ਸੀ।
ਮੈਨੀਟੋਬਾ ਪੁਲਿਸ ਨੇ ਕੀ ਦੱਸਿਆ ਸੀ
ਤਸਵੀਰ ਸਰੋਤ, RCMP Manitoba/X
ਰੌਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਨੇ 27 ਜਨਵਰੀ 2022 ਨੂੰ ਕੁਝ ਟਵੀਟ (ਹੁਣ ਐਕਸ) ਕਰਕੇ ਇਸ ਮਾਮਲੇ ਬਾਰੇ ਜਾਣਕਾਰੀ ਦਿੱਤੀ ਸੀ।
ਟਵੀਟਸ ਵਿੱਚ ਕਿਹਾ ਗਿਆ ਸੀ ਕਿ 19 ਜਨਵਰੀ ਨੂੰ ਰੌਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਨੂੰ ਐਮਰਸਨ ਦੇ ਕੋਲ, ਅਮਰੀਕਾ ਕੈਨੇਡਾ ਸਰਹੱਦ ਤੋਂ ਲਗਭਗ 12 ਮੀਟਰ ਦੂਰ ਚਾਰ ਲਾਸ਼ਾਂ ਮਿਲੀਆਂ ਹਨ।
26 ਜਨਵਰੀ ਨੂੰ ਪੋਸਟਮਾਰਟਮ ਮੁਕੰਮਲ ਕਰ ਲਏ ਗਏ ਅਤੇ ਪੀੜਤ ਇਹ ਹਨ-
- ਜਗਦੀਸ਼ ਕੁਮਾਰ ਪਟੇਲ, 39 ਸਾਲਾ ਪੁਰਸ਼
- ਵੈਸ਼ਾਲੀਬੇਨ ਪਟੇਲ, 37 ਸਾਲਾ ਮਹਿਲਾ
- ਵਿਹਾਂਗੀ ਪਟੇਲ, 11 ਸਾਲ ਬੱਚੀ
- ਧਾਰਮਿਕ ਪਟੇਲ, 3 ਸਾਲਾ ਬੱਚਾ
ਇੱਕ ਹੋਰ ਟਵੀਟ ਵਿੱਚ ਰੌਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਨੇ ਦੱਸਿਆ ਸੀ ਕਿ ਸਾਰੇ ਇੱਕੋ ਪਰਿਵਾਰ ਦੇ ਹਨ ਅਤੇ ਭਾਰਤੀ ਨਾਗਰਿਕ ਹਨ। ਐਮਬੀ ਦੇ ਚੀਫ਼ ਮੈਡੀਕਲ ਐਗਜ਼ਾਮੀਨਰ ਨੇ ਪੁਸ਼ਟੀ ਕੀਤੀ ਹੈ ਕਿ ਮੌਤ ਦੀ ਵਜ੍ਹਾ ਮੌਸਮ ਹੈ।
ਰੌਇਲ ਕੈਨੇਡੀਅਨ ਮਾਊਂਟਡ ਪੁਲਿਸ ਮੰਮੁਤਾਬਕ, ਪਟੇਲ ਪਰਿਵਾਰ 12 ਜਨਵਰੀ ਨੂੰ ਟੋਰਾਂਟੋ ਪਹੁੰਚਿਆ ਸੀ ਅਤੇ ਉੱਥੋਂ ਲਗਭਗ 18 ਜਨਵਰੀ ਨੂੰ ਐਮਰਸਨ ਲਈ ਨਿਕਲ ਪਿਆ ਸੀ। ਉਸ ਥਾਂ ਤੋਂ ਅਤੇ ਆਸੇ-ਪਾਸਿਓਂ ਕੋਈ ਵਾਹਨ ਬਰਾਮਦ ਨਹੀਂ ਹੋਇਆ ਸੀ, ਇਸ ਦਾ ਮਤਲਬ ਹੈ ਕਿ ਕੋਈ ਉਨ੍ਹਾਂ ਨੂੰ ਸਰਹੱਦ 'ਤੇ ਛੱਡ ਕੇ ਚਲਿਆ ਗਿਆ।
ਗੈਰ-ਕਾਨੂੰਨੀ ਦਾਖ਼ਲੇ ਦਾ ਸ਼ੱਕ
ਬੀਬੀਸੀ ਗੁਜਰਾਤੀ ਨੇ ਉਸ ਵੇਲੇ ਅਹਿਮਦਾਬਾਦ ਕ੍ਰਾਈਮ ਬ੍ਰਾਂਚ ਅਤੇ ਸੇਵਾਮੁਕਤ ਏਐਸਪੀ ਦੀਪਕ ਵਿਆਸ ਨਾਲ ਗੱਲਬਾਤ ਕੀਤੀ ਸੀ।
ਵਿਆਸ ਨੇ ਵਿਜੀਲੈਂਸ ਸੈੱਲ ਨਾਲ ਵੀ ਕਈ ਸਾਲ ਕੰਮ ਕੀਤਾ ਹੈ। ਉਨ੍ਹਾਂ ਨੇ ਦੱਸਿਆ ਸੀ, ''ਜੇ ਕੈਨੇਡਾ ਦੇ ਹਾਈ ਕਮਿਸ਼ਨ ਤੋਂ ਇੰਨੀ ਦੇਰ ਤੱਕ ਕਿਸੇ ਦੀ ਮੌਤ ਦੀ ਇਤਲਾਹ ਨਹੀਂ ਮਿਲੀ ਹੈ ਤਾਂ ਇਹ ਸਾਫ਼ ਹੈ ਕਿ ਇਹ ਲੋਕ ਕਿਸੇ ਦੀ ਮਦਦ ਨਾਲ ਵਿਜ਼ਟਰ ਵੀਜ਼ਾ 'ਤੇ ਕੈਨੇਡਾ ਗਏ ਹੋਣਗੇ ਅਤੇ ਗੈਰ-ਕਾਨੂੰਨੀ ਘੁਸਪੈਠ ਦੀ ਕੋਸ਼ਿਸ਼ ਦੌਰਾਨ ਠੰਢ ਨਾਲ ਮਰ ਗਏ।''
ਉਨ੍ਹਾਂ ਕਿਹਾ ਸੀ, ''ਬਾਕੀ ਵਿਦੇਸ਼ੀ ਸਰਕਾਰ ਨੂੰ ਉਨ੍ਹਾਂ ਦੀ ਪਛਾਣ ਕਰਨੀ ਚਾਹੀਦੀ ਹੈ ਤੇ ਭਾਰਤ ਨੂੰ ਜਵਾਬ ਦੇਣਾ ਚਾਹੀਦਾ ਹੈ।''
ਉਨ੍ਹਾਂ ਕਿਹਾ, ''ਜੇ ਅਜਿਹੇ ਮਾਮਲੇ ਵਿੱਚ ਕੋਈ ਧੋਖਾਧੜੀ ਹੁੰਦੀ ਹੈ ਤਾਂ ਸ਼ਾਇਦ ਹੀ ਕਦੇ ਪੁਲਿਸ ਸ਼ਿਕਾਇਤ ਹੁੰਦੀ ਹੈ। ਰੈਕੇਟ ਇਸੇ ਤਰ੍ਹਾਂ ਕੰਮ ਕਰਦਾ ਹੈ।''
ਗੁਜਰਾਤ ਪੁਲਿਸ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਵੀ ਨਾਮ ਨਾ ਛਾਪਣ ਦੀ ਸ਼ਰਤ 'ਤੇ ਸ਼ੱਕ ਜ਼ਾਹਰ ਕੀਤਾ ਸੀ ਕਿ ਗੁਜਰਾਤੀ ਪਰਿਵਾਰ ਗੈਰ-ਕਾਨੂੰਨੀ ਰੂਪ ਵਿੱਚ ਅਮਰੀਕਾ ਵਿੱਚ ਦਾਖਲ ਹੋਇਆ ਸੀ।
ਤਸਵੀਰ ਸਰੋਤ, Getty Images
ਮੈਨੀਟੋਬਾ ਰੌਇਲ ਕੈਨੇਡੀਅਨ ਮਾਊਂਟੇਡ ਪੁਲਿਸ ਦੇ ਸਹਾਇਕ ਕਮਿਸ਼ਨਰ ਜੇਨ ਮੈਕਲਾਚੀ ਨੇ ਕਿਹਾ ਸੀ ਕਿ ਇਹ ''ਲੋਕ ਇੱਕ ਅੰਤਹੀਣ ਖੇਤਰ ਵਿੱਚ ਠੰਢ, ਘਾਤਕ ਹਨੇਰੇ ਅਤੇ ਹਵਾ ਦਾ ਸਾਹਮਣਾ ਬਿਨਾਂ ਕਿਸੇ ਮਦਦ ਦੇ ਕਰ ਰਹੇ ਸੀ।''
ਉਸੇ ਹਫ਼ਤੇ ਜਾਰੀ ਇੱਕ ਬਿਆਨ ਵਿੱਚ, ਮਿਨੀਸੋਟਾ ਵਿੱਚ ਅਮਰੀਕੀ ਫ਼ੈਡਰਲ ਅਧਿਕਾਰੀਆਂ ਨੇ ਫਲੋਰਿਡਾ ਨਿਵਾਸੀ 47 ਸਾਲਾ ਸਟੀਵ ਸ਼ੈਂਡ ਉੱਪਰ ਮਨੁੱਖੀ ਤਸਕਰੀ ਦੇ ਇਲਜ਼ਾਮ ਲਗਾਏ ਸਨ।
ਅਧਿਕਾਰੀਆਂ ਨੇ ਦੱਸਿਆ ਸੀ, ''ਸ਼ਾਂਡ ਸਰਹੱਦ ਦੇ ਇੱਕ ਪੇਂਡੂ ਇਲਾਕੇ ਵਿੱਚ 15 ਯਾਤਰੀ ਵੈਨਾਂ ਫੜ੍ਹੀਆਂ ਗਈਆਂ ਸਨ। ਉਨ੍ਹਾਂ ਦੇ ਕੋਲ ਖਾਣਾ ਅਤੇ ਪਾਣੀ ਵੀ ਸੀ। ਦੋ ਵਿਅਕਤੀ ਜੋ ਉਨ੍ਹਾਂ ਨੂੰ ਮਿਲੇ ਉਹ ਬਿਨਾਂ ਦਸਤਾਵੇਜ਼ਾਂ ਦੇ ਦੋ ਭਾਰਤੀ ਸਨ।''
ਜਦੋਂ ਇਨ੍ਹਾਂ ਸਾਰੇ ਲੋਕਾਂ ਨੂੰ ਬਾਰਡਰ ਪੈਟਰੋਲ ਸਟੇਸ਼ਨ ਲਿਆਂਦਾ ਜਾ ਰਿਹਾ ਸੀ ਤਾਂ ਅਮਰੀਕੀ ਏਜੰਟਾਂ ਨੂੰ ਅਚਾਨਕ ਭਾਰਤੀ ਨਾਗਰਿਕਾਂ ਦਾ ਇੱਕ ਸਮੂਹ ਮਿਲਿਆ। ਉਨ੍ਹਾਂ ਨੇ ਏਜੰਟਾਂ ਨੂੰ ਦੱਸਿਆ ਕਿ ਉਹ 11 ਘੰਟਿਆਂ ਤੋਂ ਭੱਜ ਰਹੇ ਹਨ ਅਤੇ ਕਿਸੇ ਦੀ ਉਡੀਕ ਕਰ ਰਹੇ ਸਨ, ਜਿਸ ਨੇ ਉਨ੍ਹਾਂ ਨੂੰ ਲੈਣ ਆਉਣਾ ਸੀ।
'ਇੱਕ ਪੁਰਸ਼ ਦੇ ਬੈਗ ਵਿੱਚ ਬੱਚਿਆਂ ਦੇ ਕੱਪੜੇ, ਖਿਡੌਣੇ ਅਤੇ ਦਵਾਈ ਵੀ ਸੀ। ਉਸ ਨੇ ਦੱਸਿਆ ਕਿ ਉਹ ਚਾਰ ਜਣਿਆਂ ਦੇ ਪਰਿਵਾਰ ਲਈ ਸਮਾਨ ਲਿਜਾਅ ਰਿਹਾ ਸੀ, ਪਰ ਰਾਤ ਨੂੰ ਵਿੱਛੜ ਗਿਆ।'
ਗੁਜਰਾਤ ਦੇ ਪਟੇਲ ਭਾਈਚਾਰੇ ਵਿੱਚ ਵਿਦੇਸ਼ ਜਾਣ ਦੀ ਲਲਕ ਕਿਉਂ
ਤਸਵੀਰ ਸਰੋਤ, Getty Images
ਗੁਤਜਰਾਤ ਤੋਂ ਵਿਦੇਸ਼ ਜਾਣ ਅਤੇ ਉਥੇ ਆਪਣਾ ਨਾਮ ਕਮਾਉਣ ਵਾਲਿਆਂ ਵਿੱਚ ਪਾਟੀਦਾਰ ਭਾਈਚਾਰੇ ਨੂੰ ਸਭ ਤੋਂ ਅੱਗੇ ਮੰਨਿਆ ਜਾਂਦਾ ਹੈ।
ਖ਼ਾਸ ਕਰਕੇ ਉੱਤਰੀ ਗੁਜਰਾਤ ਦੇ ਪੱਟੀਦਾਰ ਭਾਈਚਾਰੇ ਵਿੱਚ ਵਿਦੇਸ਼ ਜਾਣ ਦੀ ਪ੍ਰਬਲ ਇੱਛਾ ਹੁੰਦੀ ਹੈ।
ਉੱਤਰੀ ਗੁਰਜਰਾਤ ਦੇ ਪਟੇਲ ਸਮਾਜ ਦੇ ਆਗੂ ਅਤੇ ਸੇਵਾ ਮੁਕਤ ਅਧਿਆਪਕ ਆਰਐੱਸ ਪਟੇਲ ਨਾਲ ਬੀਬੀਸੀ ਗੁਜਰਾਤੀ ਨੇ ਇਸ ਬਾਰੇ ਗੱਲਬਾਤ ਕੀਤੀ।
ਆਰਐੱਸ ਪਟੇਲ ਨੇ ਕਿਹਾ, ''ਉੱਤਰੀ ਗੁਜਰਾਤ ਦੇ ਨੌਜਵਾਨ ਅਮਰੀਕਾ ਤੇ ਕੈਨੇਡਾ ਜਾਣ ਲਈ ਕੋਈ ਵੀ ਰਸਤਾ ਅਪਣਾ ਲੈਂਦੇ ਹਨ। ਉੱਤਰੀ ਗੁਜਰਾਤ ਦੇ 42 ਪਿੰਡਾਂ ਦੇ ਜ਼ਿਆਦਾਤਰ ਨੌਜਵਾਨ ਵਿਦੇਸ਼ ਵਿੱਚ ਸਥਾਪਤ ਹੋ ਗਏ ਹਨ। ਅਜਿਹੇ ਨੌਜਵਾਨਾਂ ਦਾ ਜਲਦੀ ਵਿਆਹ ਹੋ ਜਾਂਦਾ ਹੈ।''
ਇਨ੍ਹਾਂ ਪਿੰਡਾਂ ਨੂੰ ''ਡੌਲਰੀਆ ਪਿੰਡ'' ਕਿਹਾ ਜਾਂਦਾ ਹੈ। ਜਿੱਥੇ ਬਾਹਰਲੇ ਦੇਸ਼ਾਂ ਤੋਂ ਡਾਲਰ ਆਉਂਦੇ ਹਨ।
ਇਹ ਪਿੰਡ ਪਟੇਲਾਂ ਦੇ ਪਿੰਡਾਂ ਵਜੋਂ ਹੀ ਜਾਣੇ ਜਾਂਦੇ ਹਨ ਕਿਉਂਕਿ ਇੱਥੇ ਪਟੇਲ ਭਾਈਚਾਰੇ ਵਿੱਚ ਆਪਸਦਾਰੀ ਵਿੱਚ ਵੀ ਵਿਆਹ ਕਰਵਾਏ ਜਾਂਦੇ ਹਨ।
ਆਰਐੱਸ ਪਟੇਲ ਨੇ ਕਿਹਾ, ''ਜੋ ਮੁੰਡੇ ਪੈਸਾ ਕਮਾਉਣ ਵਿਦੇਸ਼ ਜਾਂਦੇ ਹਨ, ਉਨ੍ਹਾਂ ਨੂੰ ਉੱਥੇ ਪਹਿਲਾਂ ਤੋਂ ਵਸੇ ਹੋਏ ਪਟੇਲ ਤੁਰੰਤ ਆਪਣੇ ਕੋਲ ਕੰਮ 'ਤੇ ਰੱਖ ਲੈਂਦੇ ਹਨ। ਇਸ ਤਰ੍ਹਾਂ ਇੱਥੋਂ ਦੇ ਨੌਜਵਾਨ ਚੰਗੇ ਜੀਵਨ ਦੀ ਆਸ ਵਿੱਚ ਵਿਦੇਸ਼ ਜਾਂਦੇ ਹਨ। ਘੱਟ ਪੜ੍ਹੇ-ਲਿਖੇ ਲੋਕ ਆਪਣੀ ਜ਼ਿੰਦਗੀ ਦਾਅ 'ਤੇ ਲਗਾ ਕੇ ਉੱਥੇ ਜਾਂਦੇ ਹਨ।''
ਤਸਵੀਰ ਸਰੋਤ, Roxy Gagdekar and Pavan Jaiswal
ਬੀਬੀਸੀ ਗੁਜਰਾਤੀ ਨੇ ਘਟਨਾ ਦੇ ਬਾਰੇ ਵਿੱਚ ਡਿੰਗੂਚਾ ਪਿੰਡ ਦਾ ਦੌਰਾ ਕੀਤਾ।
ਕੁਝ ਲੋਕਾਂ ਨੇ ਬੀਬੀਸੀ ਗੁਜਰਾਤੀ ਨੂੰ ਦੱਸਿਆ ਕਿ ਜੇ ਪਿੰਡ ਤੋਂ ਕਿਸੇ ਪਿਰਵਾਰ ਵਿੱਚੋਂ ਕੋਈ ਵੀ ਵਿਅਕਤੀ ਅਮਰੀਕਾ ਨਾ ਗਿਆ ਹੋਵੇ ਤਾਂ ਲੋਕ ਉੱਥੇ ਵਿਆਹ ਕਰਨ ਤੋਂ ਝਿਜਕਦੇ ਹਨ।
ਇੱਕ 50 ਸਾਲਾ ਵਿਅਕਤੀ ਨੇ ਨਾਮ ਨਾ ਛਾਪਣ ਦੀ ਸ਼ਰਤ 'ਤੇ ਦੱਸਿਆ ਸੀ ਕਿ ''ਮੇਰਾ ਬੇਟਾ 35 ਸਾਲ ਦਾ ਹੈ ਪਰ ਮੇਰੇ ਪਰਿਵਾਰ ਵਿੱਚੋਂ ਕੋਈ ਵੀ ਵਿਅਕਤੀ ਅਮਰੀਕਾ ਵਿੱਚ ਨਹੀਂ ਰਹਿੰਦਾ ਹੈ।''
ਇਸ ਪਿੰਡ ਵਿੱਚ ਪਲਣ ਵਾਲਾ ਹਰ ਬੱਚਾ ਦੂਜੇ ਦੇਸ਼ ਵਿੱਚ ਵਸਣ ਦਾ ਸੁਪਨਾ ਦੇਖਦਾ ਹੈ। ਇੱਥੇ ਲਗਭਗ ਹਰ ਬੱਚਾ, ਅਮਰੀਕੀ ਵੀਜ਼ੇ ਦੀਆਂ ਕਿਸਮਾਂ ਬਾਰੇ ਜਾਣਦਾ ਹੈ।
ਵਿਜ਼ਿਟਰ ਵੀਜ਼ਾ ਤੋਂ ਗ੍ਰੀਨ ਕਾਰਡ ਤੱਕ ਯਾਤਰਾ ਕਿਵੇਂ ਕਰੀਏ, ਇਸ ਬਾਰੇ ਵੀ ਯੋਜਨਾਵਾਂ ਹਨ। ਪਿੰਡ ਵਿੱਚ ਜ਼ਿਆਦਾਤਰ ਬਜ਼ੁਰਗ ਰਹਿੰਦੇ ਹਨ ਕਿਉਂਕਿ ਜ਼ਿਆਦਾਤਰ ਨੌਜਵਾਨ ਵਿਦੇਸ਼ ਚਲੇ ਗਏ ਹਨ।
ਇੱਕ ਪਿੰਡ ਵਾਸੀ ਨੇ ਕਿਹਾ, ''ਪਿੰਡ ਵਿੱਚ ਜ਼ਿਆਦਾਤਰ ਲੋਕ ਬਜ਼ੁਰਗ ਹਨ ਕਿਉਂਕਿ ਉਨ੍ਹਾਂ ਦੇ ਬੱਚੇ ਅਮਰੀਕਾ ਚਲੇ ਗਏ ਹਨ।''
ਇਸ ਤੋਂ ਇਲਵਾ ਇੱਕ ਪਿੰਡ ਵਾਸੀ ਨੇ ਦੱਸਿਆ.''ਪਿੰਡ ਵਿੱਚ ਹੁਣ ਉਹੀ ਲੋਕ ਰਹਿ ਗਏ ਹਨ ਜਿਨ੍ਹਾਂ ਕੋਲ ਵਿਦੇਸ਼ ਜਾਣ ਲਈ ਪੈਸੇ ਨਹੀਂ ਹਨ।''
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
