6-6-6 ਵਾਕਿੰਗ ਰੁਟੀਨ: ਚਰਚਾ 'ਚ ਆਇਆ ਸੈਰ ਕਰਨ ਦਾ ਇਹ ਤਰੀਕਾ ਕੀ ਹੈ, ਦਿਲ ਅਤੇ ਦਿਮਾਗ ਦੀ ਸਿਹਤ ਨਾਲ ਇਸ ਦਾ ਕੀ ਸਬੰਧ
ਤਸਵੀਰ ਸਰੋਤ, Getty Images
ਪੈਦਲ ਚੱਲਣ ਨੂੰ ਸਭ ਤੋਂ ਆਸਾਨ ਕਸਰਤ ਮੰਨਿਆ ਜਾਂਦਾ ਹੈ। ਇਸ ਵਿੱਚ ਕੋਈ ਨੁਕਸਾਨ ਨਹੀਂ ਹੈ, ਭਾਵੇਂ ਤੁਸੀਂ ਇਸਨੂੰ ਕਿਵੇਂ ਵੀ ਕਰੋ।
ਇਸ ਵਿੱਚ ਕੋਈ ਸ਼ੱਕ ਨਹੀਂ ਹੈ ਕਿ ਰੋਜ਼ਾਨਾ ਤੁਰਨ ਦੀ ਆਦਤ ਸਾਡੀ ਸਿਹਤ 'ਤੇ ਚੰਗਾ ਪ੍ਰਭਾਵ ਪਾਉਂਦੀ ਹੈ। ਲੈਂਸੇਟ ਪਬਲਿਕ ਹੈਲਥ ਵਿੱਚ ਪ੍ਰਕਾਸ਼ਿਤ ਇੱਕ ਤਾਜ਼ਾ ਅਧਿਐਨ ਵਿੱਚ ਕਿਹਾ ਗਿਆ ਹੈ ਕਿ ਰੋਜ਼ਾਨਾ ਸੱਤ ਹਜ਼ਾਰ ਕਦਮ ਤੁਰਨ ਨਾਲ ਕੈਂਸਰ, ਡਿਮੈਂਸ਼ੀਆ ਅਤੇ ਦਿਲ ਦੀਆਂ ਗੰਭੀਰ ਬਿਮਾਰੀਆਂ ਦਾ ਖ਼ਤਰਾ ਘਟ ਜਾਂਦਾ ਹੈ।
ਅਜਿਹੇ ਬਹੁਤ ਸਾਰੇ ਅਧਿਐਨ ਹਨ ਜੋ ਤੁਰਨ ਜਾਂ ਵਾਕ ਕਰਨ ਦੇ ਬਹੁਤ ਸਾਰੇ ਲਾਭਾਂ ਬਾਰੇ ਦੱਸਦੇ ਹਨ। ਪਰ ਵਾਕ ਕਿਵੇਂ ਕਰਨੀ ਹੈ, ਕਿੰਨੀ ਕਰਨੀ ਹੈ.. ਇਸ ਨੂੰ ਲੈ ਕੇ ਵੱਖ-ਵੱਖ ਤਰੀਕੇ ਅਤੇ ਨਿਯਮ ਦੱਸੇ ਜਾਂਦੇ ਹਨ।
ਪਿਛਲੇ ਕੁਝ ਮਹੀਨਿਆਂ ਤੋਂ ਸੋਸ਼ਲ ਮੀਡੀਆ 'ਤੇ ਇੱਕ ਵਾਕਿੰਗ ਟ੍ਰੈਂਡ ਜਾਂ ਵਾਕਿੰਗ ਚੈਲੇਂਜ ਦੀ ਚਰਚਾ ਹੋ ਰਹੀ ਹੈ, ਜਿਸਨੂੰ ਦਿਲ ਦੀ ਸਿਹਤ ਤੋਂ ਲੈ ਕੇ ਮਾਨਸਿਕ ਸਿਹਤ ਲਈ ਵੀ ਲਾਭਦਾਇਕ ਦੱਸਿਆ ਜਾ ਰਿਹਾ ਹੈ। ਇਸ ਨੂੰ ਨਾਮ ਦਿੱਤਾ ਗਿਆ ਹੈ, 6-6-6 ਵਾਕਿੰਗ ਰੁਟੀਨ।
ਤਸਵੀਰ ਸਰੋਤ, Getty Images
ਤਾਂ ਇਹ 6-6-6 ਵਾਕਿੰਗ ਰੁਟੀਨ ਕੀ ਹੈ? ਇਹ ਸਾਡੀ ਸਿਹਤ ਲਈ ਕਿਵੇਂ ਲਾਭਦਾਇਕ ਹੋ ਸਕਦਾ ਹੈ? ਇਸ ਵਾਕਿੰਗ ਰੁਟੀਨ ਦੀ ਪਾਲਣਾ ਕਿਵੇਂ ਕੀਤੀ ਜਾਵੇ? ਅਤੇ ਸਭ ਤੋਂ ਅਹਿਮ.. ਇਸਦੀ ਪਾਲਣਾ ਕਰਦੇ ਸਮੇਂ ਕਿਹੜੀਆਂ ਗੱਲਾਂ ਧਿਆਨ ਵਿੱਚ ਰੱਖਣਾ ਜ਼ਰੂਰੀ ਹੈ?
ਇਨ੍ਹਾਂ ਸਵਾਲਾਂ ਦੇ ਜਵਾਬ ਜਾਣਨ ਲਈ ਬੀਬੀਸੀ ਹਿੰਦੀ ਨੇ ਡਾਇਟੀਸ਼ੀਅਨ, ਵੈਲਨੈੱਸ ਥੈਰੇਪਿਸਟ ਅਤੇ ਵੈਲਨੈੱਸ ਪਲੇਟਫਾਰਮ ਮੈਟਾਮੋਰਫੋਸਿਸ ਦੀ ਸੰਸਥਾਪਕ ਅਤੇ ਸੀਈਓ ਦਿਵਿਆ ਪ੍ਰਕਾਸ਼ ਅਤੇ ਉੱਤਰ ਪ੍ਰਦੇਸ਼ ਸਥਿਤ ਲਕਸ਼ਯ ਸਟ੍ਰੈਂਥ ਐਂਡ ਕੰਡੀਸ਼ਨਿੰਗ ਦੇ ਸੰਸਥਾਪਕ ਅਤੇ ਹੈੱਡ ਕੋਚ ਕੈਲਾਸ਼ ਮੇਨਨ ਨਾਲ ਗੱਲ ਕੀਤੀ।
6-6-6 ਵਾਕਿੰਗ ਰੁਟੀਨ ਕੀ ਹੈ?
6-6-6 ਵਾਕਿੰਗ ਰੁਟੀਨ ਵਿੱਚ ਹਰ ਰੋਜ਼ ਸਵੇਰੇ 6 ਵਜੇ ਜਾਂ ਸ਼ਾਮ 6 ਵਜੇ 60 ਮਿੰਟ ਲਈ ਤੁਰਨਾ ਸ਼ਾਮਲ ਹੈ। ਇਸ ਦੇ ਨਾਲ, 6 ਮਿੰਟ ਦਾ ਵਾਰਮ-ਅੱਪ ਅਤੇ 6 ਮਿੰਟ ਦਾ ਕੂਲ-ਡਾਊਨ ਵੀ ਕਰਨਾ ਹੈ।
ਡਾਇਟੀਸ਼ੀਅਨ, ਵੈਲਨੈੱਸ ਥੈਰੇਪਿਸਟ ਅਤੇ ਮੈਟਾਮੋਰਫੋਸਿਸ ਦੇ ਸੰਸਥਾਪਕ ਅਤੇ ਸੀਈਓ ਦਿਵਿਆ ਪ੍ਰਕਾਸ਼ ਦਾ ਕਹਿਣਾ ਹੈ ਕਿ ਇਹ ਹਫ਼ਤੇ ਵਿੱਚ 6 ਦਿਨ ਕਰਨਾ ਹੈ।
ਲਕਸ਼ਯ ਸਟ੍ਰੈਂਥ ਐਂਡ ਕੰਡੀਸ਼ਨਿੰਗ ਦੇ ਸੰਸਥਾਪਕ ਅਤੇ ਹੈੱਡ ਕੋਚ ਕੈਲਾਸ਼ ਮੇਨਨ ਦਾ ਕਹਿਣਾ ਹੈ ਕਿ 6-6-6 ਵਾਕਿੰਗ ਰੁਟੀਨ ਦੇ ਵੱਖ-ਵੱਖ ਅਰਥ ਕੱਢੇ ਜਾ ਰਹੇ ਹਨ।
ਉਹ ਕਹਿੰਦੇ ਹਨ, "ਕੁਝ ਲੋਕ ਇਸ ਵਿੱਚ 6 ਹਜ਼ਾਰ ਕਦਮ ਚੱਲਣ ਬਾਰੇ ਗੱਲ ਕਰ ਰਹੇ ਹਨ, ਜਦਕਿ ਕੁਝ ਲੋਕ 6 ਦਿਨਾਂ ਲਈ ਇਸ ਰੁਟੀਨ ਦੀ ਪਾਲਣਾ ਕਰਨ ਬਾਰੇ ਗੱਲ ਕਰ ਰਹੇ ਹਨ। ਇਸ ਵਿੱਚ ਮਹੱਤਵਪੂਰਨ ਗੱਲ ਇਹ ਹੈ ਕਿ ਰੋਜ਼ਾਨਾ 60 ਮਿੰਟ ਤੁਰਨਾ ਹੈ। ਭਾਵੇਂ ਇਹ ਸਵੇਰੇ 30 ਮਿੰਟ ਅਤੇ ਸ਼ਾਮ ਨੂੰ 30 ਮਿੰਟ ਹੀ ਕਿਉਂ ਨਾ ਹੋਵੇ।"
ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਸਦਾ ਉਦੇਸ਼ ਸੈਰ ਨੂੰ ਆਪਣੇ ਰੋਜ਼ਾਨਾ ਜੀਵਨ ਦਾ ਹਿੱਸਾ ਬਣਾਉਣਾ ਹੈ।
6-6-6 ਵਾਕਿੰਗ ਰੁਟੀਨ ਨਾਲ ਦਿਲ ਦੀ ਸਿਹਤ ਕਿਵੇਂ ਬਿਹਤਰ ਹੁੰਦੀ ਹੈ?
ਤਸਵੀਰ ਸਰੋਤ, Getty Images
ਲੈਂਸੇਟ ਪਬਲਿਕ ਹੈਲਥ ਵਿੱਚ ਪ੍ਰਕਾਸ਼ਿਤ ਇੱਕ ਤਾਜ਼ਾ ਅਧਿਐਨ ਵਿੱਚ ਕਿਹਾ ਗਿਆ ਹੈ ਕਿ ਹਰ ਰੋਜ਼ ਸੱਤ ਹਜ਼ਾਰ ਕਦਮ ਚੱਲਣ ਨਾਲ ਕੈਂਸਰ, ਡਿਮੈਂਸ਼ੀਆ ਅਤੇ ਦਿਲ ਦੀਆਂ ਗੰਭੀਰ ਬਿਮਾਰੀਆਂ ਦਾ ਖ਼ਤਰਾ ਘਟ ਜਾਂਦਾ ਹੈ।
ਮਾਹਿਰ ਦਿਵਿਆ ਪ੍ਰਕਾਸ਼ ਅਤੇ ਕੈਲਾਸ਼ ਮੇਨਨ ਦੇ ਅਨੁਸਾਰ, 6-6-6 ਵਾਕਿੰਗ ਰੁਟੀਨ ਸਰੀਰ, ਦਿਲ ਅਤੇ ਦਿਮਾਗ ਨੂੰ ਸਿਹਤਮੰਦ ਰੱਖਣ ਵਿੱਚ ਮਦਦਗਾਰ ਹੋ ਸਕਦੀ ਹੈ।
ਦਿਵਿਆ ਪ੍ਰਕਾਸ਼ ਦਾ ਕਹਿਣਾ ਹੈ ਕਿ ਦਿਲ ਨੂੰ ਸਿਹਤਮੰਦ ਰੱਖਣ ਲਈ ਹਫ਼ਤੇ ਵਿੱਚ 150 ਮਿੰਟ ਤੁਰਨ ਦੀ ਸਲਾਹ ਦਿੱਤੀ ਜਾਂਦੀ ਹੈ, ਜਦਕਿ ਏਸ਼ੀਆਈ ਲੋਕਾਂ ਨੂੰ ਹਫ਼ਤੇ ਵਿੱਚ ਘੱਟੋ-ਘੱਟ 250 ਮਿੰਟ ਤੁਰਨ ਦੀ ਸਲਾਹ ਦਿੱਤੀ ਜਾਂਦੀ ਹੈ।
ਉਹ ਦੱਸਦੇ ਹਨ, "ਜਦੋਂ ਅਸੀਂ ਹਫ਼ਤੇ ਵਿੱਚ 6 ਦਿਨਾਂ ਤੱਕ ਰੋਜ਼ਾਨਾ 60 ਮਿੰਟ ਤੁਰਦੇ ਹਾਂ ਤਾਂ ਇਹ ਹਫ਼ਤੇ ਵਿੱਚ ਕੁੱਲ 360 ਮਿੰਟ ਤੁਰਨ ਦੇ ਬਰਾਬਰ ਹੋ ਜਾਂਦਾ ਹੈ, ਜੋ ਸਾਡੇ ਦਿਲ ਲਈ ਸਿਹਤਮੰਦ ਹੈ।"
ਹਾਲਾਂਕਿ, ਦਿਲ ਦੀ ਸਿਹਤ ਲਈ ਉਹ ਇਸ ਵਾਕਿੰਗ ਰੁਟੀਨ ਵਿੱਚ 60 ਮਿੰਟ ਤੇਜ਼ ਤੁਰਨ ਭਾਵ ਬ੍ਰਿਸਕ ਵਾਕਿੰਗ 'ਤੇ ਜ਼ੋਰ ਦਿੰਦੇ ਹਨ।
ਬ੍ਰਿਸਕ ਵਾਕਿੰਗ ਬਾਰੇ ਦੱਸਦੇ ਹੋਏ ਉਹ ਕਹਿੰਦੇ ਹਨ ਕਿ ''ਇਸ ਵਿੱਚ ਤੁਹਾਡਾ ਹਾਰਟ ਰੇਟ ਤੁਹਾਡੇ ਵੱਧ ਤੋਂ ਵੱਧ ਹਾਰਟ ਰੇਟ ਦੇ 60 ਫੀਸਦੀ ਤੋਂ 70 ਫੀਸਦੀ ਦੇ ਵਿਚਕਾਰ ਹੋਣਾ ਚਾਹੀਦਾ ਹੈ। ਇਸਨੂੰ ਜ਼ੋਨ 2 ਦਿਲ ਦੀ ਧੜਕਣ ਕਿਹਾ ਜਾਂਦਾ ਹੈ।"
ਸਾਡਾ ਜ਼ਿਆਦਾ ਤੋਂ ਜ਼ਿਆਦਾ ਹਾਰਟ ਰੇਟ ਕੀ ਹੋਣਾ ਚਾਹੀਦਾ ਹੈ? ਦਿਵਿਆ ਪ੍ਰਕਾਸ਼ ਇਸਦੇ ਲਈ ਇੱਕ ਫਾਰਮੂਲਾ ਦੱਸਦੇ ਹਨ।
ਪਹਿਲਾਂ 220 ਵਿੱਚੋਂ ਆਪਣੀ ਉਮਰ ਘਟਾਓ। ਮੰਨ ਲਓ ਤੁਹਾਡੀ ਉਮਰ 50 ਸਾਲ ਹੈ, ਤਾਂ 220 'ਚੋਂ 50 ਘਟਾਉਣ 'ਤੇ 170 ਆਵੇਗਾ। ਇਹ 50 ਸਾਲ ਦੇ ਵਿਅਕਤੀ ਲਈ ਵੱਧ ਤੋਂ ਵੱਧ ਦਿਲ ਦੀ ਧੜਕਣ ਹੈ।
ਇਸ 170 ਦੇ 60 ਤੋਂ 70 ਫੀਸਦੀ ਨੂੰ ਕੈਲਕੁਲੇਟ ਕਰੀਏ ਤਾਂ 102 ਤੋਂ 119 ਦੇ ਵਿਚਕਾਰ ਆਉਂਦਾ ਹੈ। ਤਾਂ 50 ਸਾਲ ਦੇ ਵਿਅਕਤੀ ਨੂੰ ਇੰਨੀ ਰਫ਼ਤਾਰ ਨਾਲ ਵਾਕ ਕਰਨਾ ਚਾਹੀਦਾ ਹੈ ਕਿ ਉਸਦਾ ਹਾਰਟ ਰੇਟ 102 ਤੋਂ 119 ਬੀਟ ਪ੍ਰਤੀ ਮਿੰਟ ਦੇ ਵਿਚਕਾਰ ਹੋਵੇ।
ਹਾਰਟ ਰੇਟ ਨੂੰ ਫਿਟਨੈਸ ਟਰੈਕਰਾਂ ਅਤੇ ਸਮਾਰਟਵਾਚਾਂ ਰਾਹੀਂ ਵੀ ਟਰੈਕ ਕੀਤਾ ਜਾ ਸਕਦਾ ਹੈ। ਇੱਕ ਬਾਲਗ ਦਾ ਆਮ ਹਾਰਟ ਰੇਟ 60 ਤੋਂ 100 ਬੀਟ ਪ੍ਰਤੀ ਮਿੰਟ ਦੇ ਵਿਚਕਾਰ ਹੁੰਦਾ ਹੈ।
ਦਿਵਿਆ ਪ੍ਰਕਾਸ਼ ਦੇ ਅਨੁਸਾਰ, ਜਦੋਂ ਤੇਜ਼ ਤੁਰਨ ਦੌਰਾਨ ਦਿਲ ਦੀ ਧੜਕਣ ਵਧਦੀ ਹੈ ਤਾਂ ਖੂਨ ਦਾ ਸੰਚਾਰ ਵਧਦਾ ਹੈ ਅਤੇ ਇਹੀ ਇਸ ਵਾਕਿੰਗ ਰੁਟੀਨ ਦਾ ਉਦੇਸ਼ ਹੈ, ਜੋ ਦਿਲ ਨੂੰ ਸਿਹਤਮੰਦ ਰੱਖਦਾ ਹੈ।
6-6-6 ਵਾਕਿੰਗ ਰੁਟੀਨ ਮਾਨਸਿਕ ਸਿਹਤ ਲਈ ਕਿਵੇਂ ਲਾਭਦਾਇਕ ਹੈ?
ਤਸਵੀਰ ਸਰੋਤ, Getty Images
ਮਾਹਿਰਾਂ ਦਾ ਕਹਿਣਾ ਹੈ ਕਿ 6-6-6 ਵਾਕਿੰਗ ਰੁਟੀਨ ਸਾਡੀ ਮਾਨਸਿਕ ਸਿਹਤ ਲਈ ਵੀ ਬਹੁਤ ਫਾਇਦੇਮੰਦ ਹੈ। ਇਸਦਾ ਕਾਰਨ ਇਹ ਹੈ ਕਿ ਸਵੇਰੇ ਜਾਂ ਸ਼ਾਮ ਨੂੰ ਖੁੱਲ੍ਹੀ ਜਗ੍ਹਾ 'ਤੇ ਸੈਰ ਕਰਨ ਲਈ ਕੁਝ ਸਮਾਂ ਕੱਢਣ ਨਾਲ ਮਨ ਨੂੰ ਬਹੁਤ ਆਰਾਮ ਮਿਲਦਾ ਹੈ।
ਦਿਵਿਆ ਪ੍ਰਕਾਸ਼ ਕਹਿੰਦੇ ਹਨ, "ਚੰਗੀ ਤਰ੍ਹਾਂ ਤੁਰਨਾ ਵੀ ਇੱਕ ਤਰ੍ਹਾਂ ਦਾ ਧਿਆਨ ਕਰਨਾ ਹੈ। ਜਦੋਂ ਤੁਸੀਂ ਇਕੱਲੇ ਰਫ਼ਤਾਰ ਨਾਲ ਤੁਰਦੇ ਹੋ ਤਾਂ ਮਨ ਸ਼ਾਂਤ ਹੋ ਜਾਂਦਾ ਹੈ।"
ਉਹ ਕਹਿੰਦੇ ਹਨ ਕਿ ਜੇਕਰ ਤੁਸੀਂ ਸਵੇਰੇ ਇਸ ਵਾਕਿੰਗ ਰੁਟੀਨ ਦੀ ਪਾਲਣਾ ਕਰਦੇ ਹੋ ਤਾਂ ਇੱਕ ਤਰ੍ਹਾਂ ਨਾਲ ਤੁਸੀਂ ਪੂਰੇ ਦਿਨ ਲਈ ਚੰਗੀ ਤਰ੍ਹਾਂ ਤਿਆਰ ਹੋ ਜਾਂਦੇ ਹੋ।
ਕੈਲਾਸ਼ ਮੇਨਨ ਕਹਿੰਦੇ ਹਨ ਕਿ ਜੇਕਰ ਤੁਸੀਂ ਸ਼ਾਮ ਨੂੰ ਤੁਰਦੇ ਹੋ ਤਾਂ ਇਹ ਦਿਨ ਦੇ ਤਣਾਅ ਨੂੰ ਘਟਾਉਣ ਵਿੱਚ ਮਦਦ ਕਰਦਾ ਹੈ, ਤੁਹਾਡਾ ਮੂਡ ਬਿਹਤਰ ਹੁੰਦਾ ਹੈ ਅਤੇ ਤੁਸੀਂ ਆਪਣਾ ਪੂਰਾ ਦਿਨ ਪ੍ਰੋਸੈਸ ਕਰ ਪਾਉਂਦੇ ਹੋ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਇੱਕ ਨਿਸ਼ਚਿਤ ਸਮੇਂ 'ਤੇ ਤੁਰਨ ਦੀ ਆਦਤ ਪਾਉਣ ਨਾਲ ਚੰਗੀ ਨੀਂਦ ਲੈਣ ਤੋਂ ਲੈ ਕੇ ਬਾਕੀ ਸਾਰੀਆਂ ਚੀਜ਼ਾਂ ਵੀ ਇੱਕ ਰੁਟੀਨ ਵਿੱਚ ਚੱਲਦੀਆਂ ਹਨ।
ਸਿਹਤਮੰਦ ਜੀਵਨ ਸ਼ੈਲੀ ਲਈ ਕੀ ਕਰਨਾ ਚਾਹੀਦਾ ਹੈ?
ਦਿਵਿਆ ਪ੍ਰਕਾਸ਼ ਕਹਿੰਦੇ ਹਨ ਕਿ ਸਿਹਤਮੰਦ ਜੀਵਨ ਸ਼ੈਲੀ ਲਈ ਦੋ ਚੀਜ਼ਾਂ ਮਹੱਤਵਪੂਰਨ ਹਨ-
1. ਸੰਤੁਲਿਤ ਅਤੇ ਪੌਸ਼ਟਿਕ ਖੁਰਾਕ
2. ਸਰੀਰਕ ਗਤੀਵਿਧੀ
ਅੱਜ ਦੇ ਸਮੇਂ ਵਿੱਚ ਜ਼ਿਆਦਾਤਰ ਲੋਕਾਂ ਲਈ ਸਰੀਰਕ ਤੌਰ 'ਤੇ ਕਿਰਿਆਸ਼ੀਲ ਰਹਿਣਾ ਬਹੁਤ ਮੁਸ਼ਕਲ ਹੋ ਗਿਆ ਹੈ। ਇੱਕ ਤਰ੍ਹਾਂ ਨਾਲ ਸਾਡੇ ਵਿੱਚੋਂ ਜ਼ਿਆਦਾਤਰ ਲੋਕ ਬੈਠਣ ਵਾਲੀ ਜੀਵਨ ਸ਼ੈਲੀ ਜੀ ਰਹੇ ਹਨ।
ਕੈਲਾਸ਼ ਮੇਨਨ ਕਹਿੰਦੇ ਹਨ, "ਅੱਜ ਕੱਲ੍ਹ ਸਹੂਲਤਾਂ ਇੰਨੀਆਂ ਹੋ ਗਈਆਂ ਹਨ ਕਿ ਅਸੀਂ ਆਪਣੇ ਸਰੀਰ ਦੀ ਵਰਤੋਂ ਬਿਲਕੁਲ ਵੀ ਨਹੀਂ ਕਰ ਰਹੇ ਹਾਂ। ਇੱਥੋਂ ਤੱਕ ਕਿ ਪਹਿਲੀ ਮੰਜ਼ਿਲ 'ਤੇ ਜਾਣ ਲਈ ਵੀ ਲਿਫਟ ਦੀ ਵਰਤੋਂ ਕੀਤੀ ਜਾ ਰਹੀ ਹੈ। ਇਸ ਤੋਂ ਇਲਾਵਾ ਲੋਕਾਂ ਦੇ ਸਕ੍ਰੀਨ ਟਾਈਮ ਵਿੱਚ ਵਾਧੇ ਕਾਰਨ ਵੀ ਸਰੀਰਕ ਗਤੀਵਿਧੀਆਂ ਘਟ ਰਹੀਆਂ ਹਨ।"
ਅਜਿਹੀ ਸਥਿਤੀ ਵਿੱਚ 6-6-6 ਵਾਕਿੰਗ ਚੈਲੇਂਜ ਨੂੰ ਅਪਣਾਉਣਾ ਇੱਕ ਸਿਹਤਮੰਦ ਜੀਵਨ ਸ਼ੈਲੀ ਵੱਲ ਇੱਕ ਸਕਾਰਾਤਮਕ ਕਦਮ ਸਾਬਤ ਹੋ ਸਕਦਾ ਹੈ।
ਨਾਲ ਹੀ, ਇਸਦਾ ਪਾਲਣ ਕਰਨਾ ਆਸਾਨ ਹੈ ਕਿਉਂਕਿ ਤੁਸੀਂ ਇਸਨੂੰ ਆਪਣੀ ਰੁਟੀਨ ਅਤੇ ਰੋਜ਼ਾਨਾ ਰੁਝੇਵਿਆਂ ਦੇ ਅਨੁਸਾਰ ਅਪਣਾ ਸਕਦੇ ਹੋ।
ਕੈਲਾਸ਼ ਮੇਨਨ ਕਹਿੰਦੇ ਹਨ, "ਹਰ ਕੋਈ 6-6-6 ਵਾਕਿੰਗ ਰੁਟੀਨ ਦੀ ਪਾਲਣਾ ਕਰ ਸਕਦਾ ਹੈ। ਇਸਦੇ ਲਈ ਤੁਹਾਨੂੰ ਜਿੰਮ ਮੈਂਬਰਸ਼ਿਪ ਦੀ ਜ਼ਰੂਰਤ ਨਹੀਂ ਹੈ ਜਾਂ ਤੁਹਾਨੂੰ ਕੋਈ ਫੈਂਸੀ ਉਪਕਰਣ ਖਰੀਦਣ ਦੀ ਵੀ ਜ਼ਰੂਰਤ ਨਹੀਂ ਹੈ। ਤੁਹਾਨੂੰ ਸਿਰਫ਼ ਵਾਕਿੰਗ ਵਾਲੇ ਜੁੱਤੇ ਚਾਹੀਦੇ ਹਨ।"
ਦਿਵਿਆ ਪ੍ਰਕਾਸ਼ ਕਹਿੰਦੇ ਹਨ ਕਿ ਹਰ ਕੋਈ ਇਸ ਰੁਟੀਨ ਦੀ ਪਾਲਣਾ ਕਰ ਸਕਦਾ ਹੈ, ਭਾਵੇਂ ਉਹ ਬਜ਼ੁਰਗ ਹੋਵੇ ਜਾਂ ਜਵਾਨ।
ਉਹ ਕਹਿੰਦੇ ਹਨ, "ਜਿਨ੍ਹਾਂ ਲੋਕਾਂ ਦਾ ਪਹਿਲਾਂ ਹੀ ਭਾਰ ਜ਼ਿਆਦਾ ਹੈ, ਉਨ੍ਹਾਂ ਲਈ ਜਾਗਿੰਗ ਜਾਂ ਦੌੜਨਾ ਮੁਸ਼ਕਲ ਹੋ ਸਕਦਾ ਹੈ, ਪਰ ਜੇ ਉਹ ਤੁਰਦੇ ਹਨ ਤਾਂ ਉਨ੍ਹਾਂ ਨੂੰ ਕੋਈ ਸਮੱਸਿਆ ਨਹੀਂ ਹੋਵੇਗੀ।"
ਕੈਲਾਸ਼ ਮੇਨਨ ਕਹਿੰਦੇ ਹਨ ਕਿ ਤੁਹਾਡੇ ਕੋਲ ਅਜਿਹਾ ਨਾ ਕਰਨ ਦਾ ਕੋਈ ਬਹਾਨਾ ਨਹੀਂ ਹੈ, ਤੁਹਾਨੂੰ ਸਿਰਫ਼ ਆਪਣੇ ਲਈ ਸਮਾਂ ਕੱਢਣਾ ਪਵੇਗਾ।
ਇਨ੍ਹਾਂ ਗੱਲਾਂ ਦਾ ਰੱਖੋ ਧਿਆਨ
ਤਸਵੀਰ ਸਰੋਤ, Getty Images
ਇਹ ਦੋਵੇਂ ਮਾਹਰ ਇਸ ਗੱਲ 'ਤੇ ਜ਼ੋਰ ਦਿੰਦੇ ਹਨ ਕਿ ਇਸਦੀ ਤੁਰੰਤ ਪਾਲਣਾ ਕਰਨ ਦੀ ਕੋਈ ਲੋੜ ਨਹੀਂ ਹੈ। ਇਸ ਰੁਟੀਨ ਵਿੱਚ ਹੌਲੀ-ਹੌਲੀ ਆਪਣੇ ਆਪ ਨੂੰ ਢਾਲਿਆ ਜਾ ਸਕਦਾ ਹੈ।
ਕੈਲਾਸ਼ ਮੇਨਨ ਕਹਿੰਦੇ ਹਨ, "ਮੈਨੂੰ ਲੱਗਦਾ ਹੈ ਕਿ ਜਦੋਂ ਅਸੀਂ ਕੋਈ ਟੀਚਾ ਨਿਰਧਾਰਤ ਕਰਦੇ ਹਾਂ ਤਾਂ ਪਹਿਲੀ ਵਾਰ ਅਜਿਹਾ ਕਰਨ ਵਾਲੇ ਲੋਕਾਂ ਲਈ ਇਹ ਮੁਸ਼ਕਲ ਹੋ ਜਾਂਦਾ ਹੈ। ਜਿਵੇਂ, ਹੋ ਸਕਦਾ ਹੈ ਕਿ ਕੋਈ ਵਿਅਕਤੀ ਅੱਧਾ ਘੰਟਾ ਜਾਂ ਇੱਕ ਘੰਟਾ ਲਗਾਤਾਰ ਨਾ ਤੁਰ ਸਕੇ। ਇਸ ਲਈ ਜੇਕਰ ਉਹ 10 ਮਿੰਟਾਂ ਤੋਂ ਵੀ ਸ਼ੁਰੂਆਤ ਕਰ ਲੈਣ, ਤਾਂ ਵੀ ਚੰਗਾ ਹੈ।"
ਉਹ ਕਹਿੰਦੇ ਹਨ ਕਿ ਤੁਸੀਂ ਆਪਣੀ ਵਾਕਿੰਗ ਰੁਟੀਨ ਖੁਦ ਤੈਅ ਕਰ ਸਕਦੇ ਹੋ। ਉਨ੍ਹਾਂ ਦੇ ਅਨੁਸਾਰ, 6-6-6 ਵਾਕਿੰਗ ਰੁਟੀਨ ਦਾ ਸਾਰ ਬਸ ਇਹ ਹੈ ਕਿ ਤੁਹਾਨੂੰ ਸਵੇਰੇ ਅਤੇ ਸ਼ਾਮ ਨੂੰ ਤੁਰਨਾ ਚਾਹੀਦਾ ਹੈ।
ਦਿਵਿਆ ਪ੍ਰਕਾਸ਼ ਇਹ ਵੀ ਕਹਿੰਦੇ ਹਨ ਕਿ ਹਫ਼ਤੇ ਦੇ 6 ਦਿਨ 6 ਵਜੇ 60 ਮਿੰਟ ਦੀ ਸੈਰ ਜਾਂ 6-6-6 ਵਾਕਿੰਗ ਰੁਟੀਨ ਇਸ ਲਈ ਬਣਾਇਆ ਗਿਆ ਹੈ ਤਾਂ ਜੋ ਲੋਕ ਇਸਨੂੰ ਯਾਦ ਰੱਖ ਸਕਣ, ਪਰ ਅਜਿਹਾ ਨਹੀਂ ਹੈ ਕਿ ਜੇਕਰ ਕੋਈ ਵਾਕ ਨਹੀਂ ਕਰਦਾ ਤਾਂ ਵੀ ਉਸਨੂੰ ਪਹਿਲੇ ਦਿਨ ਹੀ 60 ਮਿੰਟ ਲਈ ਤੇਜ਼ ਸੈਰ ਕਰਨੀ ਚਾਹੀਦੀ ਹੈ।
ਉਹ ਕਹਿੰਦੇ ਹਨ, "ਤੁਹਾਨੂੰ ਆਪਣੇ ਸਰੀਰ ਨੂੰ ਵੀ ਸੁਣਨਾ-ਸਮਝਣਾ ਪਵੇਗਾ। 6-6-6 ਵਾਕਿੰਗ ਰੁਟੀਨ ਸੁਣਨ ਵਿੱਚ ਬਹੁਤ ਵਧੀਆ ਲੱਗਦਾ ਹੈ, ਪਰ ਵਿਹਾਰਕ ਦਿਸ਼ਾ-ਨਿਰਦੇਸ਼ਾਂ ਨੂੰ ਸਮਝਣ ਦੀ ਲੋੜ ਹੈ।"
6-6-6 ਵਾਕਿੰਗ ਰੁਟੀਨ ਵਿੱਚ 6 ਮਿੰਟ ਦੇ ਵਾਰਮ ਅੱਪ ਅਤੇ ਕੂਲ ਡਾਊਨ ਬਾਰੇ ਕੈਲਾਸ਼ ਮੇਨਨ ਕਹਿੰਦੇ ਹਨ ਕਿ ਹਾਲਾਂਕਿ ਤੁਰਨ ਲਈ ਕਿਸੇ ਵੀ ਤਰ੍ਹਾਂ ਦੇ ਵਾਰਮ ਅੱਪ ਜਾਂ ਕੂਲ ਡਾਊਨ ਦੀ ਲੋੜ ਨਹੀਂ ਹੈ, ਪਰ ਜੇਕਰ ਤੁਸੀਂ ਤੇਜ਼ ਸੈਰ ਕਰ ਰਹੇ ਹੋ ਤਾਂ ਤੁਰਨ ਤੋਂ ਪਹਿਲਾਂ ਅਤੇ ਬਾਅਦ ਵਿੱਚ ਸਟ੍ਰੈਚਿੰਗ ਕੀਤੀ ਜਾ ਸਕਦੀ ਹੈ।
ਮਾਹਿਰਾਂ ਦੇ ਅਨੁਸਾਰ, ਵਾਰਮ ਅੱਪ ਅਤੇ ਕੂਲ ਡਾਊਨ ਦਾ ਮਤਲਬ ਹੈ ਕਿ ਕੁਝ ਵੀ ਅਚਾਨਕ ਸ਼ੁਰੂ ਨਹੀਂ ਕਰਨਾ ਚਾਹੀਦਾ ਜਾਂ ਅਚਾਨਕ ਬੰਦ ਨਹੀਂ ਕਰਨਾ ਚਾਹੀਦਾ।
ਸੈਰ ਦੀ ਸ਼ੁਰੂਆਤ ਵਿੱਚ, ਹੌਲੀ-ਹੌਲੀ ਤੁਰ ਕੇ ਵਿਅਕਤੀ ਆਪਣੀ ਗਤੀ ਵਧਾ ਸਕਦਾ ਹੈ ਅਤੇ ਤੇਜ਼ ਸੈਰ ਵਿੱਚ ਸਭ ਤੋਂ ਵਧੀਆ ਕੂਲ ਡਾਊਨ ਇਸਦੀ ਗਤੀ ਨੂੰ ਹੌਲੀ-ਹੌਲੀ ਘਟਾਉਣਾ ਹੈ।
ਮਾਹਿਰਾਂ ਦਾ ਕਹਿਣਾ ਹੈ ਕਿ ਜੇਕਰ ਇਸ ਰੁਟੀਨ ਨੂੰ ਸਿਹਤਮੰਦ ਖੁਰਾਕ ਦੇ ਨਾਲ-ਨਾਲ ਸਕਾਰਾਤਮਕ ਢੰਗ ਨਾਲ ਅਪਣਾਇਆ ਜਾਵੇ ਤਾਂ ਇਹ ਸੱਚਮੁੱਚ ਪ੍ਰਭਾਵਸ਼ਾਲੀ ਹੋ ਸਕਦਾ ਹੈ।
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
