Дүйнөлүк саламаттыкты сактоо уюму Европадагы эпидемиянын жаңы толкунуна этияттык чараларын сактабай, мурдагыдай эле жашоо образын күткөн жаштар күнөөлүү деп эсептейт.

Уюмдун регионалдык директору Ханс Клюге Би-Би-Си менен маегинде ар бир өлкөнүн бийлиги өзүнүн кеңешин жана сунуштарын так билдирши керек деп айтты.

"Барган сайын вирустун тарашы күчөгөн өлкөлөр саны артууда. Бизге белгилүү болгондой мунун баары кишилер жүрүм-турумун өзгөрткөндөн улам болду. Айрым өлкөнүн саламаттыкты сактоо расмийлери жаштар арасында вирус аныкталгандар көп экенин кабарлап жатышат. Биз жаштар менен кантип иштөөнүн жолун дагы бир жолу карап көрүшүбүз керек",-деди Клюге.

Клюге өзү дагы эки кыздын атасы экенин, жаштар жай айын көңүлдүү өткөргүсү келерин, бирок алардын дагы жоопкерчилигин эске салып туруу зарылдыгын айтты.

"Алардын дагы өзүнүн, ата-энесинин, чоң ата, чоң энесинин алдындагы жоопкерчилиги бар",-деди ал.

Европа өлкөлөрү чек арасын кайрадан жабуу тууралуу ойлоно баштады. Анткени жаңы учурлар көбөйүп жатат. Мындай курч абал Испанияда байкалып, өзгөчө жабыр тарткан аймактарга карантин чараларын киргизди.

Кыргызстандын Ысык-Көл аймагында дагы кырдаал курчуп баратканына кабатырлануулар айтылууда. Кечээ өлкөнүн премьер-министри Ысык-Көл облусунда эс алуучулардын агымы көп болуп жаткандыктан, аймакта көзөмөлдү күчөтүү тапшырмасын берди.

"Статистикалык маалыматтар боюнча, өткөн айда Ысык-Көлгө эс алуу үчүн 3 миң адам барса, июль айында - 20 күндүн аралыгында 10 миңден ашык киши барды. Эс алуучулардын арасында ооруп, дарыланып жаткандар дагы болушу мүмкүн. Ошондуктан облусту, өзгөчө курорттук аймакты катуу көзөмөлдөө керек. Зарыл болсо кошумча күчтөр тартылсын",-деди өкмөт башчы К.Боронов. (AbA)