Күйөөсү мыкаачылык менен өлтүргөн Жибек Урустемованын ишин УКМК өзүнө алды

Үч баланын энеси, 47 жаштагы Жибек Урустемованын өлүмү боюнча кылмыш ишин иликтөө Улуттук коопсуздук мамлекеттик комитетине (УКМК) өткөрүлүп берилди.

Учурда атайын ыкчам-тергөө тобу түзүлүп, иштин чоо-жайын иликтөө башталды.

"Өлкөнүн жогорку саясий жетекчилиги тарабынан коомдук коопсуздуктун жана базалык үй-бүлөлүк баалуулуктардын түптөлүшүнө шек келтирген бул одоно факт боюнча так позиция айтылган, ал эми трагедия принципиалдуу укуктук баа берүүнү талап кылат. Белгилей кетсек, тергөө учурунда маркумда убактылуу коргоо ордери болгондугу жана айыпталуучу тарабынан адам өлтүрүү үчүн колдонулган газ-травматикалык куралды мыйзамсыз алып жүрүү жана сактоо фактылары аныкталды. Азыркы учурда айыпталуучу камакка алынып, Кыргыз Республикасынын УКМКнын тергөө абагына жеткирилди. Шектүү ал жакта тергөө бүткүчө кармалып турат" деп айтылат атайын кызматтын маалыматында.

Кылмыш ишин УКМК төрагасы Камчыбек Ташиевдин тапшырмасы менен атайын кызматтын борбордук аппараты иликтейт.

Ички иштер министрлигинин Жибек Урустемованын өлүмү боюнча берген алгачкы маалыматы коомчулукта талаш-тартыш жараткан. Бишкек шаардык ички иштер башкы башкармалыгынын жетекчиси Азамат Токтоналиев Урустемова менен анын күйөөсү үйгө жакшы эле киришкенин, окуяга ичимдик себеп болгонун айткан. "Социалдык тармактарда бул билдирүү "кылмышкерди актоо" катары кабыл алынып, Бишкек ШИИББдин жетекчисинин дарегине катуу сын-пикирлер айтылган.

Ошондой эле ИИМдин маалыматында келиндин коргоо ордери болгондугу, буга чейин да зомбулук көргөнү тууралуу маалыматтар болгон эмес.

25-декабрда УКМК башчысы Камчыбек Ташиев аталган окуяны "бүтүндөй өлкө ичиркенүү менен кабыл алганын" белгилеп, "кылмышкерди актоого эч кандай негиз жок" экенин баса белгиледи.

Жибектин өмүрүн алган каргашалуу окуя

2025-жылдын 23-декабрында Бишкек шаарында Кыргыз экономикалык университетинин 47 жаштагы окутуучусу Жибек Урустемова ажырашып жаткан күйөөсү тарабынан атып өлтүрүлдү. Каргашалуу окуя маркумдун туулган күнүндө, апасынын көзүнчө болгон. Шектүү — 48 жаштагы мурдагы милиция кызматкери, алты жыл мурун пенсияга чыккан Б.Т. аттуу жаран. Ал маркумду травматикалык тапанча менен чыкыйга атып, өмүрүн кыйган. Шектүү окуя болгон үйдөн камакка алынды.

Маркумдун жакындарынын айтымында, Жибек күйөөсү тарабынан көп жылдар бою системалуу түрдө зомбулук көрүп келген. Эки ай мурун катуу токмок жегенден кийин милицияга арыз жазып, коргоо ордерин алган. Окуя болгон күнү сотто ажырашуу маселеси каралып, Жибек күйөөсү менен жарашуудан так кесе баш тарткан. Бирок сот жараяны февраль айына жылдырылган. Шектүү ошол эле күнү аялды үйүнө алып барып, тапанча менен аткан.

Маркумдун сиңдиси окуя болор алдында "102" кызматына бир нече жолу чалып, эжесинин өмүрүнө коркунуч келип жатканын, күйөөсүндө курал бар экенин айтып жардам сураган. Жакындарынын пикиринде, эгер милиция кызматкерлери чакырууга эртерээк келишсе, өлүмдүн алдын алууга мүмкүн болмок деген ойдо. Шаардык милиция чакыруу саат 21:00дө түшүп, ыкчам топ 21:45те барганын билдирген.

Жибек Урустемованын артында үч баласы калды (эң кичүүлөрү 2-3-класстын окуучулары). Улуу баласынын айтымында, апасы ипотека төлөп, үй-бүлөнү жалгыз багып келген. Ал адвокат болууну жана Жапонияга барып сакуранын гүлдөгөнүн көрүүнү кыялданып жүргөн.

Кыргызстанда 2025-жылдын 9 айында эле 16 миңден ашык зомбулук учуру катталган, бул өткөн жылга салыштырмалуу 31%га көп. Кыргызстан Борбор Азиядагы аялдар үчүн эң кооптуу өлкө катары рейтингдерде калууда.