Akwa Ọkụkọ enwerela onwe ya n'aka ndị ntọ

Onyonyo na-efegharị na soshal midia ugbua na-egosi na otu dibia aha e ji mara ya bụ Akwa Ọkụkọ tiwara akị, onye ndị ntọ tọọrọ n'ụbọchị 23 nke ọnwa Julaị 2023, enwerela onwe ya.

Ndị ojiegbe wakporo obodo Oba, dị n'okpuruọchịchị Idemmili South, ma tọrọ dibia ahụ n'ụlọ ndina ọ rụrụ, bụ ebe ya na ọtụtụ mmadụ nọ enwe aṅụrị.

Akụkọ kwuru na ndị ojiegbe ahụ gburu ụfọdụ ndị na-eche nche n'ụlọ ndina ahụ tupu ha tọrọ ya bụ Dibia.

Mana n'ihe onyonyo nke BBC hụrụ n'ụtụtụ Satọde a, dibia a ama dịka Akwa Ọkụkọ tiwara akị, nọ na-akọrọ ndị mmadụ ihe ọ gabigara n'aka ndị ntọ ahụ oge ha kpụụrụ ya.

"Ndị ahụ obi adịghị ha mma, mana onweghị onye m ji ụgwọ, erighi m ego mmadụ, onweghị onye m mejọrọ," dibia ahụ kwuru.

Ndị uweojii Anambra ekwubeghị ihe ọbụla gbasara nke a. Toochukwu Ikenga, bụ ọnụ na-ekwuru ndị uweojii Anambra Steeti azaghachibeghị ozi anyị zigaara ya n'ekwentị.

Cheta na kepukepu fesaburu n'ụbọchị Tuzde, 25 Julaị, na atọhapụla dibia ahụ, mana o mechara bụrụ na akụkọ ahụ abụghị eziokwu.

N'ụbọchị ahụ, BBC kpọtụụrụ ọnụ na-ekwuru ndị uweojii n’Anambra bụ Tochukwu Ikenga n'ụtụtụ Tuzde 25 Julaị, o kwuru na ha enwetebeghi ozi banyere ntọhapụ dibịa anya nzụ a.

Kepukepu a gara n’ihu kwuo na ọ bụ ndị uweojii bịara inwuchi ndị ekperima nọ n’ụlọ ndịna nke Akwa Okuko nwee, bịara nwuchie Akwa Okuko ma buru ya pụọ.

Tochukwu kwuru na ọ bụ asị na aka ndị uweojii adịghị na nwuchi maọbụ ntọrọ Akwa Okuko.

Ọnọdụ enweghị nchekwa na mpaghara Ọwụwa Anyanwụ Naịjirịa agbaliela elu nke ukwu n'ime afọ olemole gara aga.

Akụkọ mwakpo ndị ojiegbe, ntọrọ mmadụ, nakwa ogbugbu mmadụ bụ ihe a na-anụ kwa mgbe kwa mgbe na steeti ise nke mebere mpaghara ọwụwa Anyanwụ Naịjiria.

Etu e si tọrọ dibịa anya nzụ Akwa Okuko Tiwara Aki n'Oba

Ndị uweojii Anambra steeti kọwara etu e si tọrọ Akwa Okuko ma sị na-eme nyocha maka ya.

Tochukwu Ikenga kwuru na ha na-esi imi n’ala ugbua iji nwuchie ndị tọọrọ nwamadị a.

O kwuru na a tọọrọ Akwa ọkụkọ n’ụlọ ndina ọ rụrụ nke dị n’obodo Oba n’okpuruọchịchị Idemili South nke Anambra steeti mgbe o ji ọkara gafee elekere iri na otu nke abalị (11:30pm)

Akụkọ na-ekwu na ndị ojiegbe tọọrọ ya gbagburu ndị nchekwa ya mmadụ abụọ tupu ha tọrọ ya.

Tupu akụkọ a apụta o nwebeghi onye ma ọ bụ ndị maara ndị ojiegbe wakporo ma tọọrọ Akwa Okuko.

Ihe i kwesịrị ịma maka Akwa Okuko