'Siyaasni sababoota qabxiin Olompikii Itoophiyaa xiqqaateef keessaa tokko' - Koree Olompikii

Siyaasni sababoota qabxiin Itoophiyaan Olompikii Tookiyoo irratti galmeessite gadi aanaa ta'eef keessaa tokko akka ta’e Koreen Olompikii Itoophiyaa himeera.

Koreen Olompikii Itoophiyaa qabxii ‘gadi aanaa’ gareen Olompikii Itoophiyaa Olompikii Tookiyoo 2020 irratti galmeessiseef dhiifama gaafateera.

Korichi Olompikii Tookiyoo 2020 ilaalchisee miidiyaaleef ibsa kan laate yemmuu ta’u pireezidantiin korichaa Dr. Ashabbir Waldagoorgis “qabxiin sadarkaa uummatni fi mootummaan eeganitti argamuu dhabuusaatin dhiifama gaafanna” jedhaniiru.

Olompikii Tookiyoo 2020 irratti Itoophiyaan meedaaliyaawwan Warqee tokko, meetii tokko fi naasaa lama kan argatte yemmuu ta’u, kunis erga olompikii Baarseloonaa bara 1992ti as qabxii gadi aanaa biyyattiin waltajjii olompikii irratti galmeessitedha.

Walitti dhufeenyi Koree Olompikii Itoophiyaa fi Federeeshinii Atileetiksii Itoophiyaa jidduu jiru qabxiin biyyattiin Olompikii Tookiyoorratti argatturratti dhiibbaa qabaachuu akka hin oolle yaada hawaasa ispoortiiti.

Haata'u malee dhimmichi gadi bu’uu qabxii garee Itoophiyaaf sababa ijoo akka hin taane Dr. Ashabbir Waldagoorgis himaniiru.

Sababoota sadi…

Koreen Olompikii Itoophiyaa gareen atileetiksii Itoophiyaa Olompikii Tookiyoo 2020 irratti qabxii gadi aanaa akka argatuuf dhimmootni sadi sababa ta’uu ibsa har’a miidiyaalef laaterratti himeera.

Sababni tokko dhimma siyaasaan wal-qabatuun jiddu seentummaa aanga'oota mootummaati jedhe koreen kun.

“Qaamni mootummaa‘ atileetootni Tigraay tapha kanarratti (olompikiirratti) gochaa hin malle raawwachuu danda’u’ jechuun Koree Olompikii Itoophiyaa beeksiseera” kan jedhe Koreen Olompikii Itoophiyaa, inni garuu yaada kana cinatti gochuun atileetootni naannoo Tigraay dorgomicharratti akka hirmaatan taasisuu hime.

Dhimma kanas qaamni dhimmi ilaallatu qoratee uummata akka beeksisu gaafateera.

Gama biraatiin gabaan addunyaa gadi bu’uu qabxii Itoophiyaatif sababa isa biraa ta’uu kan hime Koreen Olompikii Itoophiyaa “filannoon atileetotaa isa dhumaa aangoo Koree Olompikii ta’uunsaa ifatti kaa’amee osoo jiruu koreen aangawa mootummaan hogganamu hojicha haalaan hogganuu dadhabuusaati” jedheera.

Kunis leenjistootni fi hoggantootni gabaa addunyaarratti hirmaachuu isaaniitin walitti bu’iinsi faayidaa /conflict of interest/ uummamuu isaatiin ta’uu korichi himeera.

Akka fakkeenyaattis atileetiin ji’oota sadiif dhukkubarra turte fageenya meetira 10,000 irratti akka hirmaattu taasifamuushee himeera.

Koreen Olompikii Itoophiyaa Olompikii Tookiyoo 2020 irratti gadi bu’uu qabxii Itoophiyaaf sababani inni sadaffaan rakkoo yeroo qophii ture ta'uu hime.

Kunis atileetootni iddoowwan haalli qilleensaa iddoo dorgomichi itti taasifamuun wal fakkaatutti akka leenji’aniif watwaataa turus fudhatama dhabuusaa akka ta’e ibsa har’a laaten himeera.

“Kanaafis atileetota maraatoonii fi dorgommii tarkaanfiin dorgoman torba keessaa jaha dorgommii isaanii adda kutanii bahaniiru” jedhe.

Koreen Olompikii Itoophiyaa dhimmi qophii atileetotaa sababoota gadi bu’uu qabxii Itoophiyaaf sababa isa tokko ta’uu ibsa har’aa irratti himullee ibsa ji’a tokko dura federeeshiniiwwan biyyaalessaa garaagaraa waliin ta’uun kenneen qophiin gaariin taasifamuu himee ture.

“Simannaa qorraatu taasifame”

Koreen Olompikii Itoophiyaa simannaan garee olompikiif Buufata Xayyaaraa Idil-addunyaa Booleetti taasifame qorraa ta’uusaa komateera.

“Atileetoota gootota alaabaa keenya sadarkaa idil-addunyaatti ol kaasanif simannaan gootaa taasifamuufii qabaatullee simannaan taasifame garuu qorraafi aarsaa biyyattiifi alaabaasheef kaffalan kan madaalu akka hin turre taajjabneerra” jedheera.

Gama biraatiin waa’ee mormii wayita gareen olompikii buufata Xayyaaraa Idil Addunyaa Boolee gahu mudate kan gaafataman pirezidaantiin Koree Olompikii Itoophiyaa Dr. Ashabbir Waldagoorgis “mormiin ture diraamaadha. Kaffalameefii kan bahanidha” jechuun deebisan.